ឯកឧត្តម នាយឧត្តមសេនីយ៍ ឈន សារ៉ាណេ រំលឹកអនុស្សាវរីយ៍ជាមួយសម្តេចចៅហ្វាវាំង គង់ សំអុល និងលើកឡើងពីការសន្យាសាងសង់ហេដ្ឋារចនាសម្ព័ន្ធសាធារណៈដែលមិនទាន់បានអនុវត្ត

(ភ្នំពេញ)៖ នៅព្រឹកថ្ងៃទី៤ ខែវិច្ឆិកា ឆ្នាំ២០២៦ ឯកឧត្តម នាយឧត្តមសេនីយ៍ ឈន សារ៉ាណេ អនុរដ្ឋលេខាធិការក្រសួងមហាផ្ទៃ បានរំលឹកអនុស្សាវរីយ៍ និងបទពិសោធន៍ការងារកន្លងមកជាមួយសម្តេចចៅហ្វាវាំង គង់ សំអុល ពាក់ព័ន្ធនឹងការអភិវឌ្ឍហេដ្ឋារចនាសម្ព័ន្ធ និងសមិទ្ធផលសាធារណៈនៅខេត្តកំពង់ឆ្នាំង។

តាមរយៈសំណេរលើបណ្តាញសង្គម ឯកឧត្តមបានឱ្យដឹងថា កាលពីឆ្នាំ២០១៧ លោកបានជួបសម្តេចចៅហ្វាវាំង គង់ សំអុល ដោយចៃដន្យនៅលើយន្តហោះ ពេលធ្វើដំណើរត្រឡប់ពីបំពេញការងារនៅខេត្តសៀមរាប។ ក្នុងជំនួបនោះ សម្តេចបានស្នើឱ្យលោកជួយគៀងគរគម្រោងសាងសង់ផ្លូវកៅស៊ូ និងសមិទ្ធផលនានាបន្ថែមទៀតជូនខេត្តកំពង់ឆ្នាំង ដោយរំលឹកពីតួនាទីរបស់លោកក្នុងក្រុមការងារពង្រឹងសង្កាត់ប្អេរ ក្រុងកំពង់ឆ្នាំង កាលពីឆ្នាំ២០០៩ ដល់ឆ្នាំ២០១៥។

ជាពិសេស សម្តេចបានជំរុញឱ្យមានការសាងសង់សួនច្បារ អគារស្នាក់នៅសម្រាប់សន្តិសុខ និងបង្គន់អនាម័យសាធារណៈ ដើម្បីបម្រើសេចក្តីត្រូវការរបស់ប្រជាពលរដ្ឋដែលទៅហាត់ប្រាណ និងលេងកីឡានៅសួនច្បារមុខស៊ីម៉ាក់ ដែលបច្ចុប្បន្នមានឈ្មោះថា «សួនច្បារសម្តេចចៅហ្វាវាំង គង់ សំអុល»។

ឯកឧត្តម ឈន សារ៉ាណេ បានបញ្ជាក់ថា លោកបានអនុវត្តតាមសំណើរបស់សម្តេច ដោយបានសាងសង់អគារស្នាក់នៅ និងបង្គន់អនាម័យសាធារណៈរួចរាល់ និងដាក់ឱ្យប្រើប្រាស់ជាប្រយោជន៍រួម។

ទោះជាយ៉ាងណា ក្រោយពីប្រើប្រាស់បានមួយរយៈពេលខ្លី ក្រុមការងារកម្ចាត់មីនស៊ីម៉ាក់ខេត្តកំពង់ឆ្នាំង បានស្នើសុំរុះរើ និងវាយកម្ទេចអគារស្នាក់នៅសម្រាប់សន្តិសុខ និងបង្គន់អនាម័យសាធារណៈទាំងនោះ ដោយបានសន្យាសាងសង់ឡើងវិញនៅទីតាំងក្បែរនោះ ដើម្បីបន្តបម្រើប្រយោជន៍សាធារណៈ។
ប៉ុន្តែតាមការលើកឡើងរបស់ឯកឧត្តម គិតមកដល់បច្ចុប្បន្ន មានរយៈពេលជិត៥ឆ្នាំហើយ ការសន្យាសាងសង់ឡើងវិញនេះនៅមិនទាន់ត្រូវបានអនុវត្តនៅឡើយទេ។

ជាមួយគ្នានេះ ឯកឧត្តមបានបញ្ជាក់ពីការបំពេញតាមការសន្យារបស់លោកចំពោះសម្តេចចៅហ្វាវាំង គង់ សំអុល រួចរាល់ហើយ ព្រមទាំងបានរំលឹកពីការចូលរួមគោរពវិញ្ញាណក្ខន្ធសម្តេចតាមរយៈតំណាង និងក្រុមកីឡាករបាល់ទាត់ក្រសួងមហាផ្ទៃ ក្នុងពេលលោកកាន់តំណែងជាប្រធានសមាគមកីឡាបាល់ទាត់ក្រសួងមហាផ្ទៃ។

ក្នុងឱកាសនោះ ឯកឧត្តមក៏បានសម្តែងការគោរព និងដឹងគុណចំពោះសម្តេចចៅហ្វាវាំង គង់ សំអុល ព្រមទាំងជូនពរដល់វិញ្ញាណក្ខន្ធសម្តេចបានទៅកាន់សុគតិភព។

ជាចុងក្រោយ ឯកឧត្តមបានថ្លែងអំណរគុណចំពោះឯកឧត្តម ឈួ ចាន់ឌឿន អតីតអភិបាលខេត្តកំពង់ឆ្នាំង ដែលបានសហការយ៉ាងជិតស្និទ្ធ និងរួមចំណែកធ្វើឱ្យគម្រោងសាងសង់សមិទ្ធផលទាំងនេះទទួលបានជោគជ័យ។

ករណីនេះក៏ជាការរំលឹកពីសារៈសំខាន់នៃការរក្សាពាក្យសន្យា និងការទទួលខុសត្រូវចំពោះសំណង់សាធារណៈ ព្រោះសមិទ្ធផលដែលសាងសង់ឡើងដោយធនធាន និងការខិតខំប្រឹងប្រែង គួរតែត្រូវបានថែរក្សា និងធានាឱ្យមានការប្រើប្រាស់ជាប្រយោជន៍របស់ប្រជាពលរដ្ឋឱ្យបានយូរអង្វែង៕

អត្ថបទដែលជាប់ទាក់ទង