ឯកឧត្តម នាយឧត្តមសេនីយ៍ ឈន សារ៉ាណេ ចុះពិនិត្យវឌ្ឍនភាពសាងសង់សាលាបណ្តុះបណ្តាលវិជ្ជាជីវៈ សម្តេចក្រឡាហោម ស ខេង ដែលសម្រេចបាន ៧៥%

(ព្រៃវែង)៖ នៅព្រឹកថ្ងៃសុក្រ ទី២៣ ខែតុលា ឆ្នាំ២០២៦ ឯកឧត្តម នាយឧត្តមសេនីយ៍ ឈន សារ៉ាណេ អនុរដ្ឋលេខាធិការក្រសួងមហាផ្ទៃ បានអញ្ជើញរួមជាមួយភរិយា លោកជំទាវ សែម សម្ផស្ស ក្រុមគ្រួសារ និងសហការី ចុះពិនិត្យវឌ្ឍនភាពការងារសាងសង់សាលាបណ្តុះបណ្តាលវិជ្ជាជីវៈ សម្តេចក្រឡាហោម ស ខេង ដែលស្ថិតនៅស្រុកកំចាយមារ ខេត្តព្រៃវែង។

ការចុះពិនិត្យនេះ មានគោលបំណងតាមដានវឌ្ឍនភាពការងារសាងសង់ជាក់ស្តែង និងវាយតម្លៃលើតម្រូវការថវិកា និងធនធានបន្ថែម ដើម្បីជំរុញឱ្យគម្រោងនេះសម្រេចបានជាស្ថាពរ ខណៈការសាងសង់បច្ចុប្បន្នសម្រេចបានប្រមាណ ៧៥%។

ទោះបីស្ថានភាពសេដ្ឋកិច្ចកំពុងជួបការលំបាកក៏ដោយ ក៏ការយកចិត្តទុកដាក់តាមដានការសាងសង់ដោយផ្ទាល់នេះ បង្ហាញពីបំណងបន្តរួមចំណែកបំពេញគម្រោងឱ្យបានសម្រេច ដើម្បីបង្កើតជាសមិទ្ធផលប្រើប្រាស់យូរអង្វែង សម្រាប់បម្រើដល់ការបណ្តុះបណ្តាលជំនាញវិជ្ជាជីវៈ និងផ្តល់ឱកាសដល់យុវជនជំនាន់ក្រោយ។

គួរបញ្ជាក់ថា កន្លងមក លោកជំទាវ សែម សម្ផស្ស បានចូលរួមផ្តល់ថវិកាសម្រាប់ការសាងសង់សាលាបណ្តុះបណ្តាលវិជ្ជាជីវៈនេះ តាមរយៈឯកឧត្តម នាយឧត្តមសេនីយ៍ ឈន សារ៉ាណេ។ ការចុះពិនិត្យជាក់ស្តែងនាពេលនេះ ក៏ជាផ្នែកមួយនៃការតាមដានការប្រើប្រាស់ធនធានដែលបានចូលរួមឧបត្ថម្ភ ដើម្បីធានាថា ការគាំទ្រនេះប្រែក្លាយជាសមិទ្ធផលជាក់ស្តែង និងមានប្រយោជន៍ដល់សង្គម។

សាលាបណ្តុះបណ្តាលវិជ្ជាជីវៈនេះ ត្រូវបានរំពឹងថា នឹងក្លាយជាធនធានសំខាន់មួយសម្រាប់ការអភិវឌ្ឍជំនាញ និងការកសាងសមត្ថភាពធនធានមនុស្សនៅកម្ពុជា ជាពិសេសសម្រាប់កូនចៅជំនាន់ក្រោយ៕