អគ្គនាយករង សម្បត្តិ មានហេង គ្រុប៖ ពង្រឹងប្រសិទ្ធភាពការងារ បង្កើនសាមគ្គីភាព និងយកចិត្តទុកដាក់ចំពោះបុគ្គលិក

(ភ្នំពេញ)៖ លោក ឈន សុខមានហេង អគ្គនាយករង នៃសម្បត្តិ មានហេង គ្រុប បានដឹកនាំកិច្ចប្រជុំគណៈគ្រប់គ្រងក្រុមហ៊ុនបេតុង សម្បត្តិ មានហេង ដើម្បីពិនិត្យវឌ្ឍនភាពការងារ វាយតម្លៃបញ្ហាប្រឈម និងកំណត់ទិសដៅអនុវត្តការងារបន្ត សំដៅពង្រឹងប្រសិទ្ធភាពប្រតិបត្តិការ និងលើកកម្ពស់គុណភាពការងាររបស់ក្រុមហ៊ុន។

កិច្ចប្រជុំនេះមានការចូលរួមពីប្រធានគ្រប់គ្រងទូទៅ ប្រធានផ្នែក និងថ្នាក់ដឹកនាំពាក់ព័ន្ធ ដោយបានផ្លាស់ប្តូរយោបល់ ពិនិត្យបញ្ហាប្រឈម និងពិភាក្សារកដំណោះស្រាយជាក់ស្តែង ដើម្បីជំរុញការសហការរវាងផ្នែកនីមួយៗឱ្យកាន់តែមានប្រសិទ្ធភាព ធានាឱ្យដំណើរការការងារប្រព្រឹត្តទៅដោយរលូន និងស្របតាមផែនការដែលបានកំណត់។

ជាមួយគ្នានេះ នាព្រឹកថ្ងៃទី១៥ ខែតុលា ឆ្នាំ២០២៦ លោក ឈន សុខមានហេង ក៏បានអញ្ជើញជួបសួរសុខទុក្ខ និងទទួលទានអាហារពេលព្រឹកជាមួយបងប្អូនកម្មករ ក្នុងបរិយាកាសសាមញ្ញ ស្និទ្ធស្នាល និងកក់ក្តៅ ដែលបង្ហាញពីការយកចិត្តទុកដាក់ចំពោះបុគ្គលិក និងការលើកកម្ពស់ទំនាក់ទំនងល្អរវាងថ្នាក់ដឹកនាំ និងកម្លាំងការងារនៅក្នុងក្រុមហ៊ុន។

សកម្មភាពទាំងនេះឆ្លុះបញ្ចាំងពីសារៈសំខាន់នៃការដឹកនាំដែលភ្ជាប់ការគ្រប់គ្រងការងារជាមួយការយកចិត្តទុកដាក់ចំពោះធនធានមនុស្ស។ ព្រោះភាពរីកចម្រើនរបស់សហគ្រាស មិនអាស្រ័យតែលើផែនការអាជីវកម្ម និងប្រសិទ្ធភាពប្រតិបត្តិការប៉ុណ្ណោះទេ ប៉ុន្តែក៏ពឹងផ្អែកលើសាមគ្គីភាព ការសហការ និងការចូលរួមរបស់បុគ្គលិកគ្រប់រូបផងដែរ។

សម្បត្តិ មានហេង គ្រុប បន្តផ្តោតលើការពង្រឹងប្រសិទ្ធភាពការងារ ការសហការផ្ទៃក្នុង និងការកសាងបរិយាកាសការងារល្អ ដើម្បីរួមចំណែកជំរុញការអភិវឌ្ឍសហគ្រាសឱ្យកាន់តែរីកចម្រើនប្រកបដោយចីរភាព៕