ឯកឧត្តម នាយឧត្តមសេនីយ៍ ឈន សារ៉ាណេ រំលឹកអនុស្សាវរីយ៍សាងផ្នូស និងការចូលរួមកសាងសមិទ្ធផលជូនសង្គម

(ភ្នំពេញ)៖ នៅថ្ងៃទី៦ ខែតុលា ឆ្នាំ២០២៦ ឯកឧត្តម នាយឧត្តមសេនីយ៍ ឈន សារ៉ាណេ អនុរដ្ឋលេខាធិការក្រសួងមហាផ្ទៃ បានរំលឹកអនុស្សាវរីយ៍ដ៏មានអត្ថន័យ កាលពីឆ្នាំ២០២០ ក្នុងពេលឯកឧត្តមបានសាងផ្នួសជាភិក្ខុសង្ឃនៅវត្តចន្ទបូរីវង្ស ក្រោមព្រះអធិបតី និងជាគ្រូឧបជ្ឈាយ៍របស់ សម្តេចព្រះពោធិវង្ស កិត្តិបណ្ឌិត ណយ ច្រឹក ព្រះសង្ឃនាយករងទី១ នៃគណៈមហានិកាយ។

ក្នុងអំឡុងពេលសាងផ្នួសនោះ ឯកឧត្តម នាយឧត្តមសេនីយ៍ ឈន សារ៉ាណេ បានចូលរួមចំណែកជាមួយ សម្តេចព្រះពោធិវង្ស ក្នុងការកសាង និងអភិវឌ្ឍសមិទ្ធផលនានា ដើម្បីបម្រើផលប្រយោជន៍សាធារណៈ និងប្រជាពលរដ្ឋ រួមមាន៖ សាងសង់ផ្លូវបេតុង និងជួសជុលស្ពានត្រាត ស្ថិតក្នុងឃុំកំពង់ពពិល ស្រុកពារាំង ខេត្តព្រៃវែង។

គួររំលឹកថា ឯកឧត្តម នាយឧត្តមសេនីយ៍បានជួយសាងសង់ផ្លូវបេតុងប្រវែង ១,៤១៣ម៉ែត្រ ស្ថិតក្នុងភូមិតូប ឃុំត្រពាំងព្រីង ស្រុកទឹកឈូ ខេត្តកំពត។ សាងសង់ផ្លូវបេតុងប្រវែង ២,០៣១ម៉ែត្រ ស្ថិតក្នុងភូមិក្សេរ ឃុំព្រែករំដេង ស្រុកស្រីសន្ធរ ខេត្តកំពង់ចាម។ ព្រមទាំងបានចូលរួមចំណែកក្នុងការកសាង និងអភិវឌ្ឍសមិទ្ធផលនានានៅក្នុងវត្តចន្ទបូរីវង្សផងដែរ។

សកម្មភាពទាំងនេះ បានឆ្លុះបញ្ចាំងពីស្មារតីចូលរួមចំណែកក្នុងការងារសង្គម ការកសាងហេដ្ឋារចនាសម្ព័ន្ធមូលដ្ឋាន និងការរួមចំណែកលើកកម្ពស់ជីវភាពរស់នៅរបស់ប្រជាពលរដ្ឋ។ ជាពិសេស ការភ្ជាប់រវាងការបំពេញតួនាទីក្នុងវិស័យសាធារណៈ និងការងារមនុស្សធម៌ កសាងសង្គម គឺជាគុណតម្លៃដ៏គួរឱ្យកោតសរសើរ។

ជាមួយគ្នានេះ ឯកឧត្តម នាយឧត្តមសេនីយ៍ ឈន សារ៉ាណេ បានឧទ្ទិសបុណ្យកុសលជូនដល់វីរជនកងទ័ពទាំងអស់ ដែលកំពុងឈរជើងការពារបូរណភាពទឹកដី និងជូនដល់បងប្អូនជាតិ មិត្តជិតឆ្ងាយ សូមទទួលបាននូវពុទ្ធពរទាំងបួនប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕