ក្រសួងយុត្តិធម៌បញ្ជាក់៖ ករណី «ស្លេះ វ៉ើត» មិនមែនជាការចាប់ច្រឡំមនុស្ស តែជាការរួចផុតពីបទចោទ ដោយសារភស្តុតាងមិនគ្រប់គ្រាន់

(ស្ទឹងត្រែង)៖ ក្រសួងយុត្តិធម៌ បានចេញការបញ្ជាក់ជូនសាធារណជន និងអ្នកសារព័ត៌មាន ពាក់ព័ន្ធករណីបុគ្គលឈ្មោះ ស្លេះ វ៉ើត ដែលកន្លងមកមានការលើកឡើងជាសាធារណៈថា អាចជាករណី «ចាប់ច្រឡំមនុស្ស»។

ផ្អែកតាមរបាយការណ៍របស់សាលាដំបូងខេត្តស្ទឹងត្រែង ករណីនេះ មិនមែនជាការចាប់ច្រឡំមនុស្សនោះទេ។ ក្រុមប្រឹក្សាជំនុំជម្រះបានសម្រេចឱ្យបុគ្គលរូបនេះ រួចផុតពីបទចោទប្រកាន់ និងទទួលបានសេរីភាពឡើងវិញ បន្ទាប់ពីបញ្ចប់នីតិវិធីសវនាការតាមផ្លូវច្បាប់។

ក្រសួងយុត្តិធម៌បញ្ជាក់ថា ក្នុងដំណាក់កាលនៃនីតិវិធី ពាក់ព័ន្ធនឹងការស៊ើបសួរ និងការជំនុំជម្រះ អត្តសញ្ញាណរបស់ជនត្រូវចោទត្រូវបានផ្ទៀងផ្ទាត់តាមនីតិវិធី ហើយសាមីខ្លួនមិនបានបដិសេធថា ខ្លួនមិនមែនជាបុគ្គលឈ្មោះ ស្លេះ វ៉ើត នៅចំពោះមុខស្ថាប័នតុលាការឡើយ។

ចំណុចសំខាន់ដែលក្រសួងយុត្តិធម៌ចង់បញ្ជាក់ គឺការសម្រេចឱ្យរួចផុតពីបទចោទ មិនមែនដោយសារតុលាការរកឃើញថាមានការចាប់ច្រឡំមនុស្សឡើយ ប៉ុន្តែដោយផ្អែកលើការវាយតម្លៃរបស់ក្រុមប្រឹក្សាជំនុំជម្រះ បន្ទាប់ពីស្តាប់ចម្លើយសាក្សី ភាគីពាក់ព័ន្ធ និងមេធាវីការពារក្តី ហើយយល់ឃើញថា ពុំមានភស្តុតាងគ្រប់គ្រាន់ និងរឹងមាំ ដើម្បីដាក់បន្ទុកផ្តន្ទាទោសលើឈ្មោះ ស្លេះ វ៉ើត។

ជាលទ្ធផល ក្រុមប្រឹក្សាជំនុំជម្រះបានសម្រេចឱ្យបុគ្គលរូបនេះរួចផុតពីបទចោទពាក់ព័ន្ធនឹង ការកាប់គាស់ រុករានដីព្រៃ ឆ្ការ ដុត និងឈូសឆាយដីព្រៃ ដើម្បីយកធ្វើជាកម្មសិទ្ធិ ដោយផ្អែកលើអង្គហេតុ និងអង្គច្បាប់ដែលត្រូវបានពិនិត្យក្នុងសវនាការ។

ទោះជាយ៉ាងណា ក្រសួងយុត្តិធម៌ក៏បានបញ្ជាក់ថា នឹងបន្តតាមដានករណីនេះដោយយកចិត្តទុកដាក់ ខណៈយន្តការអធិការកិច្ចរបស់ក្រសួងនៅតែបន្តដំណើរការ ដើម្បីពិនិត្យមើលភាពត្រឹមត្រូវនៃការអនុវត្តនីតិវិធីពាក់ព័ន្ធនឹងករណីខាងលើ។

ករណីនេះជាឧទាហរណ៍មួយដែលបង្ហាញថា ការរួចផុតពីបទចោទប្រកាន់របស់តុលាការ មិនស្មើនឹងការបញ្ជាក់ថា មានការចាប់ខុសមនុស្សនោះទេ ប៉ុន្តែអាចជាលទ្ធផលនៃការវាយតម្លៃថា ភស្តុតាងដែលមាន មិនទាន់គ្រប់គ្រាន់សម្រាប់ការផ្តន្ទាទោសតាមច្បាប់៕