ពលរដ្ឋទទូចឱ្យពង្រឹងការបង្ក្រាបល្បែងស៊ីសងនៅឃុំដូង ស្រុកបាទី

(តាកែវ)៖ ប្រជាពលរដ្ឋរស់នៅក្នុងឃុំដូង ស្រុកបាទី ខេត្តតាកែវ បានសម្តែងការខកចិត្ត និងលើកឡើងនូវការព្រួយបារម្ភយ៉ាងខ្លាំង ចំពោះការកើតមានសកម្មភាពល្បែងស៊ីសងជល់មាន់ខុសច្បាប់ ដែលត្រូវបានអះអាងថាបានប្រព្រឹត្តទៅកាលពីថ្ងៃទី២៦ និងទី២៧ ខែកក្កដា ឆ្នាំ២០២៦។ ការលើកឡើងនេះបានជំរុញឱ្យមានការរិះគន់ទៅលើការអនុវត្តតួនាទីរបស់អាជ្ញាធរមូលដ្ឋាន និងសមត្ថកិច្ចពាក់ព័ន្ធ ក្នុងការទប់ស្កាត់បទល្មើសនៅក្នុងដែនសមត្ថកិច្ចរបស់ខ្លួន។

តាមការលើកឡើងរបស់ប្រជាពលរដ្ឋ អាជ្ញាធរមូលដ្ឋាន ជាពិសេសមន្ត្រីនគរបាលដែលប្រចាំនៅក្នុងមូលដ្ឋាន គួរតែជាអ្នកដឹងមុនគេ និងចាត់វិធានការមុនគេ ចំពោះសកម្មភាពខុសច្បាប់ដែលកើតមាននៅក្នុងភូមិសាស្ត្ររបស់ខ្លួន។ ការរង់ចាំឱ្យមានបទបញ្ជាពីថ្នាក់លើ ឬរង់ចាំរហូតដល់ព័ត៌មានត្រូវបានផ្សព្វផ្សាយលើបណ្ដាញសង្គម និងសារព័ត៌មាន ទើបចាប់ផ្តើមចុះអនុវត្តវិធានការ គឺអាចធ្វើឱ្យការទប់ស្កាត់បទល្មើសបាត់បង់ប្រសិទ្ធភាព និងប៉ះពាល់ដល់ជំនឿទុកចិត្តរបស់ប្រជាពលរដ្ឋ។

ពលរដ្ឋបានស្នើថា មន្ត្រីដែលទទួលបន្ទុកថែរក្សាសន្តិសុខសណ្តាប់ធ្នាប់ ត្រូវបង្ហាញភាពម្ចាស់ការខ្ពស់ មានទំនួលខុសត្រូវ និងតាមដានសភាពការណ៍ក្នុងមូលដ្ឋានជាប្រចាំ ដើម្បីបង្ការ និងបង្ក្រាបរាល់សកម្មភាពល្មើសច្បាប់ឱ្យបានទាន់ពេលវេលា។ ការអនុវត្តច្បាប់ដោយស្មើភាព និងគ្មានការលើកលែង គឺជាកត្តាសំខាន់ក្នុងការរក្សាសន្តិសុខសង្គម និងការពារផលប្រយោជន៍សាធារណៈ។

ជុំវិញការលើកឡើងនេះ លោក មូល សារ៉ាត់ អធិការនគរបាលស្រុកបាទីបានបញ្ជាក់ប្រាប់អ្នកសារព័ត៌មានថា លោកមិនទាន់ទទួលបានព័ត៌មានច្បាស់លាស់ជុំវិញករណីខាងលើនៅឡើយទេ។ លោកបានឱ្យដឹងថា កន្លងមកបានចាត់ឱ្យមេប៉ុស្តិ៍នគរបាលរដ្ឋបាលឃុំដូងចុះពិនិត្យ និងស្រាវជ្រាវទីតាំងដែលរងការរាយការណ៍ ប៉ុន្តែមិនទាន់ទទួលបានរបាយការណ៍ត្រឡប់មកវិញ ដោយសារកម្លាំងជំនាញកំពុងបំពេញបេសកកម្មតាមចាប់ជនសង្ស័យក្នុងសំណុំរឿងផ្សេង។

ទោះជាយ៉ាងណា ការបកស្រាយរបស់អាជ្ញាធរមិនទាន់អាចបំបាត់ក្តីបារម្ភរបស់ប្រជាពលរដ្ឋបាននៅឡើយ។ ពលរដ្ឋនៅតែស្នើសុំឱ្យមានការស្រាវជ្រាវដោយតម្លាភាព និងចាត់វិធានការតាមផ្លូវច្បាប់ ប្រសិនបើរកឃើញថាមានសកម្មភាពល្បែងស៊ីសងខុសច្បាប់ពិតប្រាកដ ដើម្បីធានាថាច្បាប់ត្រូវបានអនុវត្តដោយស្មើភាព និងមានប្រសិទ្ធភាព។

មហាជនស្នើសុំឲ្យអាជ្ញាធរមូលដ្ឋានពង្រឹងការអនុវត្តតួនាទីរបស់ខ្លួនឱ្យកាន់តែសកម្ម និងមានប្រសិទ្ធភាព។ ការបង្ក្រាបល្បែងស៊ីសងខុសច្បាប់ មិនត្រឹមតែជាការអនុវត្តច្បាប់ប៉ុណ្ណោះទេ ប៉ុន្តែថែមទាំងជាការរក្សាសន្តិសុខ សណ្តាប់ធ្នាប់ និងការពារសុខុមាលភាពរបស់សហគមន៍ ស្របតាមគោលនយោបាយ «ភូមិ-ឃុំ-សង្កាត់ មានសុវត្ថិភាព» របស់រាជរដ្ឋាភិបាល៕