នគរបាលខេត្តកណ្ដាលចេញបំភ្លឺករណីព្រះសង្ឃដេញវាយគ្នានៅក្រុងអរិយក្សត្រ មិនមែនជាព្រះសង្ឃក្លែងក្លាយ ឬពាក់ព័ន្ធគ្រឿងញៀនឡើយ

(កណ្ដាល)៖ ក្រោយមានការចែករំលែកវីដេអូព្រះសង្ឃដេញវាយគ្នា បង្កឲ្យមានការភ្ញាក់ផ្អើលលើបណ្ដាញសង្គម ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្ដាល បានចេញសេចក្តីបំភ្លឺជាផ្លូវការ ដើម្បីបញ្ជាក់ការពិតជូនសាធារណជន។

តាមការបញ្ជាក់របស់ស្នងការដ្ឋាននគរបាលខេត្តកណ្ដាល ករណីនេះបានកើតឡើងនៅសង្កាត់ពាមឧកញ៉ាអុង ក្រុងអរិយក្សត្រ ខេត្តកណ្ដាល។ ភ្លាមៗក្រោយទទួលព័ត៌មាន លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាល បានបញ្ជាឲ្យកម្លាំងជំនាញចុះស្រាវជ្រាវ និងពិនិត្យស្ថានភាពជាក់ស្តែង។

លទ្ធផលស្រាវជ្រាវបានបង្ហាញថា ព្រះសង្ឃដែលមាននៅក្នុងវីដេអូ គឺជាព្រះសង្ឃពិតប្រាកដ មិនមែនជាជនក្លែងបន្លំ មិនពាក់ព័ន្ធការប្រើប្រាស់គ្រឿងញៀន និងមិនមែនជាបុគ្គលបោកប្រាស់ដូចការសង្ស័យមួយចំនួននៅលើបណ្ដាញសង្គមនោះឡើយ។

ស្នងការដ្ឋានបានឲ្យដឹងថា ព្រះអង្គមានព្រះនាម សុខ រ័ត្ន ព្រះជន្ម ៤៥វស្សា ធ្លាប់និមន្តមកសិក្សាព្រះធម៌នៅរាជធានីភ្នំពេញ ហើយបានគង់នៅវត្តសុវណ្ណសាគរ (វត្តបន្ទាយ) ក្នុងក្រុងអរិយក្សត្រ។ ព្រះអង្គមានជំងឺរលាកស្រោមខួរក្បាលជាយូរមកហើយ ហើយអាការៈជំងឺបានធ្ងន់ធ្ងរឡើង បន្ទាប់ពីខ្វះការព្យាបាលជាបន្តបន្ទាប់។

ជាមួយគ្នានេះ ស្នងការដ្ឋានបានបញ្ជាក់ថា កាលពីថ្ងៃទី២៤ ខែកក្កដា ឆ្នាំ២០២៤ ព្រះចៅអធិការវត្តសុវណ្ណសាគរ រួមជាមួយគណៈកម្មការ និងពុទ្ធបរិស័ទចំណុះជើងវត្ត បានឯកភាពឲ្យព្រះអង្គលាចាកសិក្ខាបទដោយស្ម័គ្រចិត្ត ដើម្បីត្រឡប់ទៅព្យាបាលជំងឺនៅស្រុកកំណើត ខេត្តកំពត។

អាជ្ញាធរនគរបាល ក៏បានអំពាវនាវដល់អ្នកប្រើប្រាស់បណ្ដាញសង្គម សូមពិនិត្យប្រភពព័ត៌មានឲ្យបានច្បាស់លាស់ មុនធ្វើការចែករំលែក ឬបកស្រាយព័ត៌មាន ដែលអាចបង្កឲ្យសាធារណជនមានការយល់ច្រឡំ និងប៉ះពាល់ដល់កិត្តិយសរបស់បុគ្គលពាក់ព័ន្ធ៕