រឿងរ៉ាវរបងលើផ្លូវដីក្រហម! កំហុសពីអតីតកាល បង្កជាវិវាទដល់បច្ចុប្បន្ន

(កំពង់ស្ពឺ)៖ ករណីសាងសង់របងឈើបន្លាលួសរំលោភលើផ្លូវដីក្រហម នៅភូមិអូររំចេក ឃុំសែនដី ស្រុកសំរោងទង ខេត្តកំពង់ស្ពឺ បានបង្កឱ្យមានការចាប់អារម្មណ៍ និងការពិភាក្សាយ៉ាងទូលំទូលាយនៅលើបណ្តាញសង្គម។ ករណីនេះបង្ហាញឱ្យឃើញថា ការមិនគោរពច្បាប់ និងការមិនអនុវត្តតាមប្លង់ដីតាំងពីដើម អាចបង្កើតជាបញ្ហាបន្តបន្ទាប់ដល់អ្នកក្រោយ និងនាំឱ្យកើតជម្លោះមិនចេះចប់។

តាមព័ត៌មានបានឱ្យដឹងថា ម្ចាស់ដីឈ្មោះ មុំ សំបូរ ភេទប្រុស អាយុ ៤៧ឆ្នាំ រស់នៅភូមិអូររំចេក ឃុំសែនដី ស្រុកសំរោងទង ខេត្តកំពង់ស្ពឺ បានសាងសង់របងឈើបន្លាលួសនៅលើផ្លូវដីក្រហម ដែលធ្វើឱ្យមានការងឿងឆ្ងល់ពីសាធារណជន។

យ៉ាងណាមិញ បើពិនិត្យឱ្យបានស៊ីជម្រៅ បញ្ហានេះមិនមែនកើតឡើងដោយសារម្ចាស់ដីម្នាក់តែប៉ុណ្ណោះទេ ប៉ុន្តែអាចជាលទ្ធផលនៃការសាងសង់បន្តៗគ្នាពីមុន ដែលមិនបានឈរលើការវាស់វែងតាមប្លង់ដីជាផ្លូវការ ប៉ុន្តែធ្វើតាមទម្លាប់ និងការកំណត់ព្រំប្រទល់ដោយការសន្មត់។ នៅពេលអ្នកក្រោយយកប្លង់ដីមកអនុវត្តតាមច្បាប់វិញ បែរជាទិដ្ឋភាពជាក់ស្តែងមានការលើសចូលផ្លូវសាធារណៈ ដែលនាំឱ្យកើតជម្លោះ និងការយល់ច្រឡំ។

ករណីនេះគឺជាសាររំលឹកដ៏សំខាន់ថា ការគ្រប់គ្រងដីធ្លីត្រូវតែផ្អែកលើប្លង់ វាស់វែង និងនីតិវិធីច្បាប់ មិនមែនផ្អែកលើទម្លាប់ ឬការធ្វើតាមអ្នកមុននោះទេ។ បើអ្នកមុនធ្វើខុស ហើយអ្នកក្រោយបន្តធ្វើតាម នោះកំហុសនឹងក្លាយជាបញ្ហារ៉ាំរ៉ៃ ដែលប៉ះពាល់ដល់សិទ្ធិម្ចាស់ដី អត្ថប្រយោជន៍សាធារណៈ និងសណ្តាប់ធ្នាប់សង្គម។

គួរឱ្យកត់សម្គាល់ថា បន្ទាប់ពីអាជ្ញាធរស្រុក និងក្រុមការងារចុះសម្របសម្រួល ភាគីម្ចាស់ដីបានយល់ព្រមរុះរើរបងឈើបន្លាលួសចេញវិញ តាមសំណើរបស់អាជ្ញាធរ ដើម្បីរក្សាផ្លូវសាធារណៈ និងបញ្ចប់វិវាទដោយសន្តិវិធី។

ជាការរិះគន់ក្នុងន័យស្ថាបនា អាជ្ញាធរពាក់ព័ន្ធគួរពង្រឹងការត្រួតពិនិត្យ និងវាស់វែងព្រំដីឱ្យបានច្បាស់លាស់ មុនអនុញ្ញាតឱ្យសាងសង់ ឬធ្វើរបងគ្រប់ប្រភេទ។ ជាពិសេស ត្រូវចាត់វិធានការស្មើភាពចំពោះអ្នកដែលរំលោភលើដី ឬផ្លូវសាធារណៈ ដោយមិនគួរឱ្យមានស្តង់ដារពីរ។

ការអនុវត្តច្បាប់ឱ្យបានស្មើភាព និងតម្លាភាព គឺជាគន្លឹះក្នុងការការពារផលប្រយោជន៍សាធារណៈ និងទប់ស្កាត់ជម្លោះដីធ្លីកុំឱ្យកើតឡើងជាបន្តបន្ទាប់៕