ក្ដៅៗ! ក្រសួងយុត្តិធម៌បញ្ជាក់៖ ចៅក្រម ២៦រូប និងព្រះរាជអាជ្ញា ៧រូប គ្រាន់តែស្ថិតក្រោមការស្រាវជ្រាវវិន័យ មិនទាន់សន្និដ្ឋានថាមានកំហុសនោះទេ

(ភ្នំពេញ)៖ ក្រោយមានការផ្សព្វផ្សាយយ៉ាងទូលំទូលាយនៅលើបណ្តាញសង្គម និងសារព័ត៌មានមួយចំនួន ពាក់ព័ន្ធករណីចៅក្រម ២៦រូប និងព្រះរាជអាជ្ញា ៧រូប ត្រូវបានបញ្ជូនទៅក្រុមប្រឹក្សាវិន័យ ឯកឧត្តមបណ្ឌិត ជិន ម៉ាលីន រដ្ឋលេខាធិការក្រសួងយុត្តិធម៌ និងជាអ្នកនាំពាក្យក្រសួងយុត្តិធម៌ បានចេញមកបញ្ជាក់ថា មានការដកស្រង់ខ្លឹមសារខុសពីប្រកាសព័ត៌មានដើម។

យោងតាមការបញ្ជាក់របស់ឯកឧត្តម នៅថ្ងៃទី២៣ ខែកក្កដា ឆ្នាំ២០២៦ ករណីទាំង ១៤ករណី ដែលពាក់ព័ន្ធនឹង ចៅក្រម ២៦រូប និងព្រះរាជអាជ្ញា ៧រូប គឺគ្រាន់តែមាន តម្រុយសង្ស័យថាអាចមានភាពមិនប្រក្រតី ក្នុងការបំពេញវិជ្ជាជីវៈប៉ុណ្ណោះ ហើយត្រូវបានបញ្ជូនទៅ ក្រុមប្រឹក្សាវិន័យនៃឧត្តមក្រុមប្រឹក្សានៃអង្គចៅក្រម ដើម្បីពិនិត្យ និងស្រាវជ្រាវបន្តតាមនីតិវិធីច្បាប់។

ឯកឧត្តមបានសង្កត់ធ្ងន់ថា ការបញ្ជូនទៅក្រុមប្រឹក្សាវិន័យ មិនមែនមានន័យថាបុគ្គលទាំងនោះមានកំហុសជាស្ថាពរនោះទេ។ ការខុស ឬត្រូវ នឹងអាស្រ័យលើលទ្ធផលនៃការស្រាវជ្រាវ និងសេចក្តីសម្រេចរបស់ក្រុមប្រឹក្សាវិន័យ ស្របតាមនីតិវិធីច្បាប់។

តាមរបាយការណ៍របស់ក្រសួងយុត្តិធម៌ សម្រាប់ឆមាសទី១ ឆ្នាំ២០២៦ លេខាធិការដ្ឋាននៃគណៈបញ្ជាការដឹកនាំយុទ្ធនាការ បានទទួលពាក្យបណ្តឹងថ្មីចំនួន ៤៥៩ករណី ហើយបូករួមជាមួយសំណុំរឿងនៅសល់ពីឆ្នាំ២០២៥ ចំនួន ២២០ករណី ធ្វើឱ្យសំណុំរឿងសរុបដែលត្រូវពិនិត្យមាន ៦៧១ករណី។

ក្នុងចំណោម ៣៤៣ករណី ដែលបានចាត់ការរួច មាន ៣២៣ករណី ត្រូវបានសន្និដ្ឋានថា ពុំមានភាពមិនប្រក្រតី ខណៈ ២០ករណី មានតម្រុយសង្ស័យថាអាចមានភាពមិនប្រក្រតី។ ក្រោយការចុះអធិការកិច្ច មាន ១៤ករណី ត្រូវបានបញ្ជូនទៅក្រុមប្រឹក្សាវិន័យ ខណៈ ៣ករណី ត្រូវបានស្នើសុំជំនុំជម្រះសាជាថ្មី និង ១ករណី ត្រូវបានផ្ទេរសមត្ថកិច្ច។

ការអនុវត្តវិធានការនេះ ត្រូវបានចាត់ទុកថាជាផ្នែកមួយនៃការពង្រឹងវិន័យ វិជ្ជាជីវៈ តម្លាភាព និងគណនេយ្យភាពក្នុងវិស័យយុត្តិធម៌។ ទន្ទឹមនឹងនេះ ក៏ជាសាររំលឹកដល់មន្ត្រីពាក់ព័ន្ធទាំងអស់ឱ្យបំពេញតួនាទីដោយគោរពច្បាប់ ក្រមសីលធម៌ និងទំនួលខុសត្រូវខ្ពស់ ខណៈដែលគោលការណ៍សន្មតថាគ្មានទោស ត្រូវតែគោរពរហូតដល់មានសេចក្តីសម្រេចជាស្ថាពរពីស្ថាប័នមានសមត្ថកិច្ច៕