ឆាតហៅប្ដីមកផ្ទះវិញ បែរជាត្រូវប្ដីដេញកាប់ និងច្របាច់ក ព្រោះខឹងប្រពន្ធហាមផឹកស្រាច្រើន

(កំពង់ស្ពឺ)៖ ករណីហិង្សាក្នុងគ្រួសារដ៏គួរឲ្យតក់ស្លុតមួយ បានកើតឡើងនៅស្រុកសាមគ្គីមុនីជ័យ ខេត្តកំពង់ស្ពឺ ខណៈស្ត្រីជាប្រពន្ធគ្រាន់តែឆាត និងទូរស័ព្ទហៅប្តីឲ្យត្រឡប់មកផ្ទះ ដោយប្រាប់ថា «កុំផឹកស្រាច្រើនពេក ខូចសុខភាព» ប៉ុន្តែបែរជាប្តីផ្ទុះកំហឹង ប្រើអំពើហិង្សាយ៉ាងសាហាវ រហូតដល់យកកាំបិតបុ័ងតោដេញកាប់ បង្កឲ្យជនរងគ្រោះរងរបួសជាច្រើនកន្លែង។

យោងតាមសមត្ថកិច្ច នៅថ្ងៃទី២៣ ខែកក្កដា ឆ្នាំ២០២៦ កម្លាំងនគរបាលស្រុកសាមគ្គីមុនីជ័យ បានទទួលព័ត៌មានតាមរយៈ Hotline ពីស្ត្រីរងគ្រោះ អំពីករណីហិង្សាក្នុងគ្រួសារ។ ក្រោមការដឹកនាំរបស់លោកឧត្តមសេនីយ៍ទោ ឃឹម សុកខៃ ស្នងការនគរបាលខេត្តកំពង់ស្ពឺ និងការបញ្ជាពីលោកវរសេនីយ៍ទោ សាវ សុភក្ដី អធិការនគរបាលស្រុកសាមគ្គីមុនីជ័យ កម្លាំងជំនាញបានចុះអន្តរាគមន៍ភ្លាមៗ ដល់ផ្ទះជនរងគ្រោះនៅភូមិយស់ជោ ឃុំជើងរាស់។

សមត្ថកិច្ចបានឃាត់ខ្លួនជនសង្ស័យឈ្មោះ សយ សុខឃី អាយុ៣៨ឆ្នាំ ជាប្តី បន្ទាប់ពីធ្វើសកម្មភាពវាយដំ ច្របាច់ក និងយកកាំបិតបុ័ងតោដេញកាប់ប្រពន្ធ។ តាមការរៀបរាប់ បុរសរូបនេះបានបោកចានបាយ ចានសម្ល បោកទូរស័ព្ទ ចាប់ក្បាលប្រពន្ធបោកទៅនឹងវត្ថុរឹង វាយបណ្ដាលឲ្យរងរបួសដៃ ស្មា និងផ្នែកផ្សេងៗនៃរាងកាយ។ ជនរងគ្រោះបានរត់គេចខ្លួនសុំអ្នកជិតខាងជួយ តែបានដួលទាក់បន្លាលួស បណ្ដាលឲ្យរងរបួសបន្ថែម។

ក្រោយការសាកសួរ ជនសង្ស័យបានសារភាពថា ពិតជាបានប្រព្រឹត្តអំពើហិង្សាលើប្រពន្ធប្រាកដមែន។ សមត្ថកិច្ចបានដកហូតវត្ថុតាង រួមមាន កាំបិតបុ័ងតោ១ដើម ពូថៅ១ដើម ក្បាលកែវបែក១ ទូរស័ព្ទ១គ្រឿង និងកម្ទេចចានបែកជាច្រើន។

បច្ចុប្បន្ន ជនសង្ស័យត្រូវបានឃាត់ខ្លួននៅអធិការដ្ឋាននគរបាលស្រុកសាមគ្គីមុនីជ័យ ដើម្បីកសាងសំណុំរឿងបញ្ជូនចាត់ការតាមនីតិវិធីច្បាប់៕