មេត្តាធម៌ និងការដឹងគុណគ្រូបង្រៀន ជាគំរូដ៏ថ្លៃថ្នូរ ដើម្បីបណ្តុះតម្លៃសីលធម៌ដល់សង្គមទាំងមូល

(ភ្នំពេញ)៖ ទង្វើដ៏ប្រកបដោយមនុស្សធម៌ និងមេត្តាធម៌របស់ឯកឧត្តម នាយឧត្តមសេនីយ៍ ឈន សារ៉ាណេ អនុរដ្ឋលេខាធិការក្រសួងមហាផ្ទៃ និងលោកជំទាវ សែម សម្ផស្ស បានធ្វើឱ្យមហាជនជាច្រើនកោតសរសើរ និងរំភើបចិត្តយ៉ាងខ្លាំង ក្រោយពីបានស្វែងរកឃើញអ្នកគ្រូ ថៃ ឈីវ ដែលបច្ចុប្បន្នមានវ័យ ៧៨ឆ្នាំ ជាគ្រូបង្រៀនថ្នាក់ទី១របស់ឯកឧត្តម កាលពីឆ្នាំ១៩៨០ នៅសាលាបឋមសិក្សាច្បារអំពៅទី១។ នេះបើតាមការលើកឡើងរបស់ឯកឧត្តម នាយឧត្តមសេនីយ៍ ឈន សារ៉ាណេ នៅលើបណ្ដាញសង្គមហ្វេសប៊ុកដែលបណ្ដាញសារព័ត៌មាន The Mirror News ទទួលបាន នារសៀលថ្ងៃទី១៩ ខែកក្ដដា ឆ្នាំ២០២៦។

អ្នកគ្រូ ថៃ ឈីវ គឺជាអ្នកដែលបានបង្ហាត់បង្រៀនឯកឧត្តមឱ្យចេះអក្សរដំបូង ជាគ្រឹះនៃការអប់រំដែលនាំឱ្យឯកឧត្តមមានថ្ងៃនេះ។ ការមិនភ្លេចគុណគ្រូ និងការតបស្នងដោយសេចក្តីគោរព គឺជាតម្លៃសង្គមដ៏ប្រពៃ ដែលគួរឱ្យយកជាគំរូ។

អ្វីដែលកាន់តែគួរឱ្យសរសើរនោះ គឺឯកឧត្តម និងលោកជំទាវ បានសន្យាផ្តល់ប្រាក់ឧបត្ថម្ភជូនអ្នកគ្រូចំនួន ១២ម៉ឺនរៀលក្នុងមួយខែ ជារៀងរាល់ខែ ដើម្បីជាការដឹងគុណ និងជួយសម្រាលជីវភាពរបស់អ្នកគ្រូ។ ទង្វើនេះបានឆ្លុះបញ្ចាំងពីស្មារតីមនុស្សធម៌ មេត្តាធម៌ និងការលើកតម្លៃវិជ្ជាជីវៈគ្រូបង្រៀនយ៉ាងពិតប្រាកដ។

ជាមួយគ្នានេះ ឯកឧត្តម នាយឧត្តមសេនីយ៍ ក៏បានប្រកាសស្វែងរកអ្នកគ្រូ លី មុំ ដែលធ្លាប់បង្ហាត់បង្រៀនឯកឧត្តមនៅឆ្នាំ១៩៨១ផងដែរ។ ប្រសិនបើបងប្អូនប្រជាពលរដ្ឋណាស្គាល់ ឬមានព័ត៌មាន សូមជួយផ្តល់ដំណឹងដល់ឯកឧត្តម ដើម្បីឱ្យលោកមានឱកាសបានជួប និងសម្តែងការដឹងគុណចំពោះអ្នកគ្រូដ៏មានគុណរូបនេះ។

ការដឹងគុណអ្នកមានគុណ មិនមែនជាកិត្តិយសសម្រាប់បុគ្គលតែម្នាក់ទេ ប៉ុន្តែជាការបណ្តុះតម្លៃសីលធម៌ដល់សង្គមទាំងមូល។ ទង្វើដ៏ប្រពៃរបស់ឯកឧត្តម នាយឧត្តមសេនីយ៍ ឈន សារ៉ាណេ និងលោកជំទាវ សែម សម្ផស្ស ពិតជាគំរូដ៏ល្អ សក្តិសមទទួលបានការកោតសរសើរ និងការគាំទ្រពីមហាជន៕