ស្នងការដ្ឋាននគរបាលខេត្តកណ្ដាលបំភ្លឺករណីសង្ស័យទីតាំងល្បែងអនឡាញនៅក្រុងអរិយក្សត្រ៖ ចុះពិនិត្យផ្ទាល់ មិនរកឃើញបទល្មើសដូចការផ្សព្វផ្សាយនោះទេ!

(កណ្ដាល)៖ ស្នងការដ្ឋាននគរបាលខេត្តកណ្ដាល បានចេញសេចក្ដីបំភ្លឺជាផ្លូវការ ក្រោយគេហទំព័រ CHNG TV online បានផ្សព្វផ្សាយថា មានទីតាំងល្បែងស៊ីសងអនឡាញមួយកន្លែង ស្ថិតក្នុងភូមិអរិយក្សត្រ សង្កាត់អរិយក្សត្រ ក្រុងអរិយក្សត្រ និងអះអាងថា អាជ្ញាធរមូលដ្ឋានមិនបានចាត់វិធានការបង្ក្រាប។

ភ្លាមៗក្រោយទទួលបានព័ត៌មាននេះ ដោយអនុវត្តតាមបទបញ្ជារបស់លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាល កម្លាំងជំនាញពាក់ព័ន្ធបានចុះស្រាវជ្រាវ និងពិនិត្យទីតាំងជាបន្ទាន់។

នៅព្រឹកថ្ងៃទី១៧ ខែកក្កដា ឆ្នាំ២០២៦ លោកវរសេនីយ៍ទោ រស់ បាលីន អធិការនគរបាលក្រុងអរិយក្សត្រ បានដឹកនាំកម្លាំងជំនាញ សហការជាមួយប៉ុស្តិ៍នគរបាលរដ្ឋបាលអរិយក្សត្រ ចុះពិនិត្យទីតាំងដែលត្រូវបានរាយការណ៍។ លទ្ធផលនៃការត្រួតពិនិត្យជាក់ស្ដែង មិនបានរកឃើញឧបករណ៍ ឬសម្ភារណាមួយសម្រាប់បើកល្បែងស៊ីសងអនឡាញខុសច្បាប់ ដូចការចុះផ្សាយនោះឡើយ។

ជាមួយគ្នានេះ ស្នងការដ្ឋាននគរបាលខេត្តកណ្ដាល ក៏បានបញ្ជាក់ថា ការលើកឡើងពាក់ព័ន្ធនឹងបុគ្គលឈ្មោះ «ឌីណា» និង «ឃាង» ថាបានពង្រីកបណ្តាញល្បែងស៊ីសងអនឡាញពេញមូលដ្ឋានខេត្តកណ្ដាល គឺជាព័ត៌មានដែល មិនពិត និងមិនមានប្រភពច្បាស់លាស់។

ទោះបីមិនរកឃើញបទល្មើសក៏ដោយ កម្លាំងជំនាញបានធ្វើការអប់រំ និងណែនាំម្ចាស់ទីតាំង មិនឱ្យជួល ឬផ្តល់ទីតាំងសម្រាប់បើកល្បែងស៊ីសងគ្រប់ប្រភេទជាដាច់ខាត។ សមត្ថកិច្ចក៏បានព្រមានថា ប្រសិនបើរកឃើញមានការលួចលាក់ប្រព្រឹត្តបទល្មើស នឹងចាត់វិធានការតាមផ្លូវច្បាប់យ៉ាងម៉ឺងម៉ាត់ ដោយគ្មានការលើកលែង។

ស្នងការដ្ឋាននគរបាលខេត្តកណ្ដាល អំពាវនាវដល់សាធារណជន និងបណ្ដាញសារព័ត៌មាន ឱ្យផ្សព្វផ្សាយព័ត៌មានដោយផ្អែកលើការផ្ទៀងផ្ទាត់ និងប្រភពដែលអាចជឿទុកចិត្តបាន ដើម្បីជៀសវាងការបង្កការភាន់ច្រឡំ និងរក្សាបាននូវទំនុកចិត្តរបស់សាធារណជន៕