ឯកឧត្តម នាយឧត្តមសេនីយ៍ ឈន សារ៉ាណេ ផ្តល់អាវកីឡាចំនួន ១៧២អាវ ជូនក្រុមកីឡាករយុវចាស់ នៅទីលានកីឡាបាល់ទាត់ «ឧត្តមភាព» លើកទឹកចិត្តការលេងកីឡា និងពង្រឹងសាមគ្គីភាពក្នុងសហគមន៍

(ភ្នំពេញ)៖ ឯកឧត្តម នាយឧត្តមសេនីយ៍ ឈន សារ៉ាណេ អនុរដ្ឋលេខាធិការនៃក្រសួងមហាផ្ទៃ នៅព្រឹកថ្ងៃទី១៧ ខែកក្កដា ឆ្នាំ២០២៦នេះ បានបង្ហោះសារលើបណ្ដាញសង្គមហ្វេសប៊ុក ដោយបញ្ជាក់ថា នាល្ងាចថ្ងៃព្រហស្បតិ៍ ២កើត ខែទុតិយាសាឍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១៦ ខែកក្កដា ឆ្នាំ២០២៦ ឯកឧត្តមបានផ្តល់អាវកីឡាចំនួន ១៧២អាវ ជូនដល់ក្រុមកីឡាករយុវចាស់ ដែលតែងតែមកលេងកីឡាជាប្រចាំ នៅទីលានកីឡាបាល់ទាត់ «ឧត្តមភាព»។

សកម្មភាពដ៏មានអត្ថន័យនេះ បានឆ្លុះបញ្ចាំងពីការយកចិត្តទុកដាក់របស់ឯកឧត្តម ចំពោះការលើកកម្ពស់វិស័យកីឡា សុខភាពសាធារណៈ និងការបង្កើនសាមគ្គីភាពក្នុងចំណោមប្រជាពលរដ្ឋ តាមរយៈការចូលរួមលេងកីឡាជាប្រចាំ។ ការផ្តល់អាវកីឡាមិនត្រឹមតែជាការឧបត្ថម្ភផ្នែកសម្ភារៈប៉ុណ្ណោះទេ ប៉ុន្តែថែមទាំងជាការលើកទឹកចិត្តឱ្យយុវជន និងប្រជាពលរដ្ឋគ្រប់វ័យ បន្តចូលរួមក្នុងសកម្មភាពកីឡា ដើម្បីទទួលបានសុខភាពល្អ រស់នៅប្រកបដោយវិន័យ និងជៀសឆ្ងាយពីអំពើអបាយមុខផ្សេងៗ។

ជាមួយគ្នានេះ ក្រុមកីឡាករយុវចាស់ដែលទទួលបានអាវកីឡា បានសម្តែងនូវក្តីរីករាយ និងថ្លែងអំណរគុណយ៉ាងជ្រាលជ្រៅ ចំពោះទឹកចិត្តសប្បុរស និងការយកចិត្តទុកដាក់របស់ឯកឧត្តម នាយឧត្តមសេនីយ៍ ឈន សារ៉ាណេ ដែលតែងតែគាំទ្រ និងជំរុញសកម្មភាពកីឡាក្នុងសហគមន៍។

ការគាំទ្របែបនេះ គឺជាគំរូដ៏ល្អមួយនៃការចូលរួមចំណែកក្នុងការអភិវឌ្ឍធនធានមនុស្ស និងកសាងសង្គមមួយដែលមានសុខភាពល្អ សាមគ្គីភាពរឹងមាំ និងរស់នៅប្រកបដោយភាពសុខដុមរមនា ស្របតាមគោលនយោបាយលើកកម្ពស់វិស័យកីឡារបស់រាជរដ្ឋាភិបាលកម្ពុជា៕