ជនជាប់ឃុំនៅពន្ធនាគារខេត្តកណ្តាលប្រមាណ១០០នាក់ ទទួលបានការអប់រំផ្សព្វផ្សាយអំពីការប្រយុទ្ធប្រឆាំងគ្រឿងញៀនខុសច្បាប់

(កណ្តាល)៖ ជនជាប់ឃុំនៅពន្ធនាគារខេត្តកណ្តាលប្រមាណ ១០០នាក់ នៅព្រឹកថ្ងៃទី១៦ ខែកក្កដា ឆ្នាំ២០២៦ បានចូលរួមកម្មវិធីផ្សព្វផ្សាយអប់រំស្តីពី យុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១១ របស់រាជរដ្ឋាភិបាលកម្ពុជា ក្រោមអធិបតីភាព ឯកឧត្តម ណុប ដារ៉ា អភិបាលរងខេត្តកណ្តាល ដោយមានការចូលរួមពីថ្នាក់ដឹកនាំ និងមន្ត្រីពន្ធនាគារ កងកម្លាំងមានសមត្ថកិច្ច មន្ទីរ-អង្គភាពពាក់ព័ន្ធ ព្រមទាំងមន្ត្រីជំនាញជាច្រើនរូប។

ឯកឧត្តម ណុប ដារ៉ា បានបញ្ជាក់ថា កម្មវិធីផ្សព្វផ្សាយនេះមានគោលបំណងលើកកម្ពស់ការយល់ដឹងដល់ជនជាប់ឃុំ អំពីផលប៉ះពាល់នៃគ្រឿងញៀន ច្បាប់ពាក់ព័ន្ធ និងសារៈសំខាន់នៃការចូលរួមអនុវត្តយុទ្ធនាការជាតិប្រយុទ្ធប្រឆាំងគ្រឿងញៀន ស្របតាមគោលនយោបាយរបស់រាជរដ្ឋាភិបាល ដើម្បីកាត់បន្ថយ និងឈានទៅលុបបំបាត់ការប្រើប្រាស់ ការជួញដូរ ការចែកចាយ និងការផលិតគ្រឿងញៀនខុសច្បាប់នៅក្នុងសង្គម។

ឯកឧត្តមបានគូសបញ្ជាក់ថា បញ្ហាគ្រឿងញៀននៅតែជាបញ្ហាសង្គមដ៏ស្មុគស្មាញ ដែលបង្កផលប៉ះពាល់យ៉ាងធ្ងន់ធ្ងរដល់សុខភាព អនាគតគ្រួសារ សន្តិសុខ សណ្តាប់ធ្នាប់សាធារណៈ និងការអភិវឌ្ឍប្រទេសជាតិ។ ដូច្នេះ ការអប់រំ និងការកែប្រែឥរិយាបថរបស់ជនជាប់ឃុំ គឺជាផ្នែកដ៏សំខាន់ក្នុងការជួយឱ្យពួកគេយល់ដឹងពីគ្រោះថ្នាក់នៃគ្រឿងញៀន កែប្រែខ្លួន និងត្រៀមខ្លួនវិលត្រឡប់ទៅរស់នៅក្នុងសង្គមវិញប្រកបដោយទំនួលខុសត្រូវ។

ឯកឧត្តមអភិបាលរងខេត្ត ក៏បានលើកទឹកចិត្តដល់ជនជាប់ឃុំទាំងអស់ ឱ្យខិតខំកែប្រែអាកប្បកិរិយា គោរពបទបញ្ជាផ្ទៃក្នុងពន្ធនាគារ ទទួលយកចំណេះដឹង និងការអប់រំដែលទទួលបាន ដើម្បីក្លាយជាពលរដ្ឋល្អក្រោយពេលអនុវត្តទោសរួច និងរួមចំណែកកសាងគ្រួសារ និងសហគមន៍ដែលគ្មានគ្រឿងញៀន។ ឯកឧត្តមបានបញ្ជាក់ថា ពន្ធនាគារ មិនមែនជាកន្លែងអនុវត្តទោសតែមួយមុខនោះទេ ប៉ុន្តែជាកន្លែងផ្តល់ឱកាសសម្រាប់ការអប់រំ កែប្រែខ្លួន បណ្តុះគំនិតវិជ្ជមាន និងរៀបចំសមាហរណកម្មទៅក្នុងសង្គមវិញ។

ក្នុងឱកាសនោះដែរ ឯកឧត្តមបានអំពាវនាវដល់មន្ត្រីពន្ធនាគារ កងកម្លាំងមានសមត្ថកិច្ច និងស្ថាប័នពាក់ព័ន្ធ បន្តពង្រឹងកិច្ចសហការក្នុងការទប់ស្កាត់ការលួចនាំចូលគ្រឿងញៀន និងវត្ថុហាមឃាត់ចូលក្នុងពន្ធនាគារ ព្រមទាំងអនុវត្តវិធានការត្រួតពិនិត្យ និងអប់រំជាប្រចាំ ដើម្បីធានាឱ្យពន្ធនាគារក្លាយជាបរិស្ថានមានសុវត្ថិភាព សណ្តាប់ធ្នាប់ និងគ្មានគ្រឿងញៀន។

ជាមួយគ្នានេះ រដ្ឋបាលខេត្តកណ្តាល នឹងបន្តសហការយ៉ាងជិតស្និទ្ធជាមួយអាជ្ញាធរជាតិប្រយុទ្ធប្រឆាំងគ្រឿងញៀន អគ្គនាយកដ្ឋានពន្ធនាគារ កងកម្លាំងមានសមត្ថកិច្ច និងភាគីពាក់ព័ន្ធ ដើម្បីអនុវត្តយុទ្ធនាការប្រយុទ្ធប្រឆាំងគ្រឿងញៀនឱ្យកាន់តែមានប្រសិទ្ធភាព សំដៅធានាសន្តិសុខ សុវត្ថិភាព សណ្តាប់ធ្នាប់សាធារណៈ និងការអភិវឌ្ឍប្រកបដោយចីរភាព។

សូមបញ្ជាក់ថា ក្នុងកម្មវិធីនេះ មន្ត្រីជំនាញក៏បានធ្វើបទបង្ហាញអំពីច្បាប់ពាក់ព័ន្ធនឹងបទល្មើសគ្រឿងញៀន ទោសទណ្ឌ និងផលប៉ះពាល់នៃគ្រឿងញៀនទៅលើសុខភាព សេដ្ឋកិច្ចគ្រួសារ និងសង្គម ដើម្បីជាចំណេះដឹងដល់ជនជាប់ឃុំ និងជំរុញឱ្យពួកគេចូលរួមផ្សព្វផ្សាយបន្តអំពីគ្រោះថ្នាក់នៃគ្រឿងញៀនដល់សហគមន៍ ក្រោយពេលវិលត្រឡប់ទៅរស់នៅក្នុងសង្គមវិញ៕