លោកមេបញ្ជាការ ម៉េង ស្រ៊ុន ដឹកនាំក្រុមការងាររៀបចំពិធីបុកគ្រឹះអគារស្នាក់នៅសម្រាប់កម្លាំងអាវុធហត្ថបន្ថែម ក្នុងបញ្ជាការដ្ឋានកងរាជអាវុធហត្ថខេត្តថ្មី

(កំពង់ស្ពឺ)៖ ដោយអនុវត្តតាមការចង្អុលបង្ហាញតម្រង់ទិសរបស់ ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការ កងរាជអាវុធហត្ថលើផ្ទៃប្រទេស នាព្រឹកថ្ងៃពុធ ទី១៥ ខែកក្កដា ឆ្នាំ២០២៦ លោកឧត្តមសេនីយត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ បានអញ្ជើញដឹកនាំក្រុមការងារកងរាជអាវុធហត្ថ រៀបចំពិធីបុកគ្រឹះអគារស្នាក់នៅសម្រាប់កម្លាំងអាវុធហត្ថបន្ថែម ក្នុងបញ្ជាការដ្ឋានកងរាជអាវុធហត្ថខេត្តថ្មី។

ក្នុងឱកាសនោះ លោកឧត្តមសេនីយត្រី ម៉េង ស្រ៊ុន និងក្រុមការងារ ក៏បានរៀបចំពិធីអុជធូបសែនព្រេន ដើម្បីសូមសេចក្តីសុខសប្បាយ និងបួងសួងសុំការពារពីម្ចាស់ទឹកម្ចាស់ដី ទេវតា ព្រមទាំងគោរពដួងវិញ្ញាណក្ខន្ធបុព្វបុរសផងដែរ។ ពិធីនេះបានប្រព្រឹត្តទៅដោយភាពសមរម្យ និងមានអត្ថន័យជ្រាលជ្រៅ ស្របតាមប្រពៃណី និងទំនៀមទម្លាប់ដ៏ល្អរបស់ជាតិ។

អគារស្នាក់នៅថ្មីនេះ ត្រូវបានរំពឹងថានឹងដើរតួនាទីយ៉ាងសំខាន់ក្នុងការផ្តល់លំនៅឋាន និងបរិយាកាសការងារសមរម្យសម្រាប់កម្លាំងកងរាជអាវុធហត្ថខេត្តកំពង់ស្ពឺ ដើម្បីបំពេញភារកិច្ចរួមជាមួយអាជ្ញាធរ និងកងកម្លាំងមានសមត្ថកិច្ច ក្នុងការរក្សាសន្តិសុខ សណ្តាប់ធ្នាប់សាធារណៈ ពង្រឹងការអនុវត្តច្បាប់ និងចូលរួមកសាងនីតិរដ្ឋនៅព្រះរាជាណាចក្រកម្ពុជា។

ពិធីបុកគ្រឹះនេះ ក៏បានបង្ហាញពីការយកចិត្តទុកដាក់របស់ថ្នាក់ដឹកនាំកងរាជអាវុធហត្ថ ក្នុងការលើកកម្ពស់សមត្ថភាពប្រតិបត្តិការ និងលក្ខខណ្ឌការងាររបស់កម្លាំងនៅមូលដ្ឋាន ដើម្បីឆ្លើយតបទៅនឹងតម្រូវការបេសកកម្ម និងការបម្រើប្រជាពលរដ្ឋឱ្យកាន់តែមានប្រសិទ្ធភាពខ្ពស់៕