លោកមេបញ្ជាការ សំ តុលា ដឹកនាំសំណេះសំណាល និងផ្តល់អំណោយដល់និវត្តជន ក្នុងឱកាសខួបអនុស្សាវរីយ៍លើកទី៣៣ ទិវាបង្កើតកងរាជអាវុធហត្ថ

(កណ្ដាល)៖ ក្នុងឱកាសអបអរសាទរខួបអនុស្សាវរីយ៍លើកទី៣៣ ទិវាបង្កើតកងរាជអាវុធហត្ថ (១៤ កក្កដា ១៩៩៣–១៤ កក្កដា ២០២៦) លោកឧត្តមសេនីយ៍ត្រី សំ តុលា មេបញ្ជាការ កងរាជអាវុធហត្ថខេត្តកណ្តាលបានដឹកនាំថ្នាក់ដឹកនាំកងរាជអាវុធហត្ថខេត្ត និងមេបញ្ជាការកងរាជអាវុធហត្ថក្រុង-ស្រុកទាំង១៣ ចុះសំណេះសំណាល សាកសួរសុខទុក្ខ និវត្តជននៃកងរាជអាវុធហត្ថខេត្តកណ្តាល ព្រមទាំងនាំយកគ្រឿងឧបភោគបរិភោគ និងថវិកាមួយចំនួនទៅឧបត្ថម្ភ។

ក្នុងឱកាសនោះ លោកមេបញ្ជាការបានពាំនាំការផ្តាំផ្ញើសាកសួរសុខទុក្ខ និងការជូនពរពីថ្នាក់ដឹកនាំជាន់ខ្ពស់ ជូនចំពោះនាយទាហាន នាយទាហានរង ពលទាហាន និងយោធិនចូលសោធននិវត្តន៍ទាំងអស់ ជាពិសេសអ្នកដែលកំពុងសម្រាកព្យាបាលជំងឺនៅតាមគេហដ្ឋាន និងមន្ទីរពេទ្យ។

លោកឧត្តមសេនីយ៍បានលើកឡើងថា ថ្នាក់ដឹកនាំកងរាជអាវុធហត្ថលើផ្ទៃប្រទេស តែងតែយកចិត្តទុកដាក់ចំពោះសុខទុក្ខរបស់មន្ត្រីក្រោមឱវាទ និវត្តជន ក្រុមគ្រួសារពលី-មរណៈ និងអ្នកជួបការលំបាក ដោយមិនដែលបំភ្លេចគុណបំណាច់ និងការលះបង់របស់ពួកគាត់ក្នុងការកសាង និងការពារជាតិ។

ជាមួយគ្នានេះ លោកមេបញ្ជាការ ក៏បានថ្លែងអំណរគុណយ៉ាងជ្រាលជ្រៅដល់និវត្តជន និងអតីតយុទ្ធជនទាំងអស់ ដែលបានលះបង់កម្លាំងកាយចិត្ត និងរួមចំណែកយ៉ាងសំខាន់ក្នុងការកសាងកងរាជអាវុធហត្ថខេត្តកណ្តាលឱ្យមានភាពរឹងមាំ និងអភិវឌ្ឍរហូតមកដល់បច្ចុប្បន្ន។

ក្នុងឱកាសដ៏មានអត្ថន័យនេះ លោកឧត្តមសេនីយ៍ក៏បានបួងសួងសូមឱ្យនិវត្តជន នាយទាហាន នាយទាហានរង ពលទាហាន និងក្រុមគ្រួសារទាំងអស់ ជួបតែសេចក្តីសុខ សុខភាពល្អ កម្លាំងមាំមួន សុភមង្គល និងសម្រេចបាននូវពុទ្ធពរទាំងបួនប្រការ គឺ អាយុ វណ្ណៈ សុខៈ និងពលៈ ជានិច្ចនិរន្តរ៍៕