លោក មឿន មាន បដិសេធការចោទប្រកាន់ពីបទរំលោភសេពសន្ថវៈ និងស្នើសមត្ថកិច្ចស៊ើបអង្កេតរកការពិត

(កំពង់ឆ្នាំង)៖ លោក មឿន មាន ម្ចាស់កសិដ្ឋានចិញ្ចឹមគោមួយកន្លែង បានចេញមុខបដិសេធទាំងស្រុងចំពោះការចោទប្រកាន់ពីស្ត្រីម្នាក់ឈ្មោះ លឹម ស្រីភណ្ឌ ដែលបានដាក់ពាក្យបណ្ដឹងចោទប្រកាន់រូបលោកពាក់ព័ន្ធករណីរំលោភសេពសន្ថវៈ។ លោកអះអាងថា ការចោទប្រកាន់នេះមិនមែនជាការពិតឡើយ និងបានស្នើឱ្យសមត្ថកិច្ចបើកការស៊ើបអង្កេតដោយតម្លាភាព ដើម្បីស្វែងរកការពិត និងផ្តល់យុត្តិធម៌ជូនរូបលោក។

លោក មឿន មាន បានអះអាងថា នៅក្នុងអំឡុងពាក់កណ្ដាលខែមិថុនា ឆ្នាំ២០២៦ ដែលដើមបណ្ដឹងអះអាងថា ហេតុការណ៍បានកើតឡើងនៅរោងគោក្នុងស្រុកបាធាយ ខេត្តកំពង់ចាម រូបលោកមិនមានវត្តមាននៅទីនោះឡើយ។ ដើម្បីគាំទ្រការអះអាងនេះ លោកបានបង្ហាញលិខិតបញ្ជាក់ការស្នាក់នៅពីប៉ុស្តិ៍នគរបាលរដ្ឋបាលឃុំពាមឆ្កោក ស្រុកជលគិរី ខេត្តកំពង់ឆ្នាំង ព្រមទាំងមានសាក្សីជាកម្មករមើលថែគោ ដែលអះអាងថា លោកកំពុងស្នាក់នៅក្នុងស្រុកជលគិរីនាពេលនោះ។

ជាមួយគ្នានេះ លោកបានបញ្ជាក់ថា ប្ដីរបស់ដើមបណ្ដឹងធ្លាប់ជាកម្មករនៅកសិដ្ឋានរបស់លោក ប៉ុន្តែត្រូវបានបញ្ឈប់ការងារតាំងពីថ្ងៃទី០៧ ខែមករា ឆ្នាំ២០២៦ ដោយសារបញ្ហាការបំពេញការងារ។ លោកអះអាងថា ចាប់តាំងពីពេលនោះមក ភាគីទាំងពីរមិនមានទំនាក់ទំនងគ្នាទៀតឡើយ។

លោក មឿន មាន ក៏បានបញ្ជាក់ថា កសិដ្ឋានរបស់លោកមានទីតាំងចំនួន៣កន្លែង ដោយមួយស្ថិតនៅស្រុកបាធាយ ខេត្តកំពង់ចាម និងពីរកន្លែងទៀតស្ថិតនៅស្រុកជលគិរី ខេត្តកំពង់ឆ្នាំង។ លោកអះអាងថា រាល់ការផ្លាស់ប្ដូរទីតាំងស្នាក់នៅ តែងមានលិខិតបញ្ជាក់ពីអាជ្ញាធរមូលដ្ឋានជានិច្ច។

ដោយឡែក លោក សាញ់ សាន ដែលត្រូវជាឪពុកមាសាច់ថ្លៃរបស់ដើមបណ្ដឹង ក៏បានផ្តល់ការបំភ្លឺថា ចាប់តាំងពីថ្ងៃទី១៧ ខែឧសភា ឆ្នាំ២០២៦ ក្រុមការងារ និងលោក មឿន មាន បាននាំគោទៅចិញ្ចឹមនៅចំណុចវាលស្រងែ ស្ថិតក្នុងឃុំពាមឆ្កោក ស្រុកជលគិរី ខេត្តកំពង់ឆ្នាំង ហើយលោកយល់ថា ការចោទប្រកាន់ថា ហេតុការណ៍បានកើតឡើងនៅស្រុកបាធាយ ក្នុងអំឡុងខែមិថុនា មិនស្របទៅនឹងពេលវេលាដែលលោកបានដឹងនោះទេ។

បច្ចុប្បន្ន ករណីនេះកំពុងស្ថិតក្នុងការចាប់អារម្មណ៍ពីមហាជន។ លោក មឿន មាន បានអំពាវនាវឱ្យអាជ្ញាធរមានសមត្ថកិច្ច បើកការស៊ើបអង្កេតដោយឯករាជ្យ ស៊ីជម្រៅ និងផ្អែកលើភស្តុតាង ដើម្បីស្វែងរកការពិត និងធានាថា ភាគីទាំងអស់ទទួលបានយុត្តិធម៌ស្របតាមនីតិវិធីច្បាប់។

គួរជម្រាបជូនថា ខ្លឹមសារខាងលើជាការអះអាងរបស់ភាគីលោក មឿន មាន។ ករណីនេះ នៅមិនទាន់មានសេចក្តីសម្រេចពីតុលាការ ឬលទ្ធផលស៊ើបអង្កេតជាផ្លូវការនៅឡើយទេ៕