ឯកឧត្តម គួច ចំរើន៖ ការវិនិយោគលើវិស័យអប់រំ គឺជាការកសាងធនធានមនុស្សសម្រាប់អនាគតប្រទេសជាតិ

(កណ្ដាល)៖ ឯកឧត្តម គួច ចំរើន អភិបាលខេត្តកណ្ដាល បានគូសបញ្ជាក់ថា ការកសាងសាលារៀន និងអគារសិក្សាប្រកបដោយគុណភាព គឺមិនត្រឹមតែផ្តល់បរិយាកាសល្អសម្រាប់ការសិក្សាប៉ុណ្ណោះទេ ប៉ុន្តែជាមូលដ្ឋានសំខាន់ក្នុងការបណ្តុះបណ្តាលសិស្សានុសិស្សឱ្យមានចំណេះដឹង សមត្ថភាព និងសក្ដានុពលខ្ពស់ ដើម្បីក្លាយជាធនធានមនុស្សដ៏មានតម្លៃសម្រាប់ការអភិវឌ្ឍប្រទេសជាតិនាពេលអនាគត។

ការលើកឡើងនេះ បានធ្វើឡើងក្នុងពិធីសម្ពោធដាក់ឱ្យប្រើប្រាស់សមិទ្ធផលនានាក្នុងវិស័យអប់រំ នៅវិទ្យាល័យ ហ៊ុន សែន សំពៅពូន ក្រុងសំពៅពូន នាព្រឹកថ្ងៃទី២៤ ខែមិថុនា ឆ្នាំ២០២៦ ក្រោមអធិបតីភាពរបស់ឯកឧត្តម គួច ចំរើន អភិបាលខេត្តកណ្ដាល និងឯកឧត្តម នូ សាខន ប្រធានក្រុមប្រឹក្សាខេត្តកណ្ដាល។

ឯកឧត្តមអភិបាលខេត្តបានបញ្ជាក់ថា ប្រទេសកម្ពុជាកំពុងត្រូវការយ៉ាងខ្លាំងនូវធនធានមនុស្សប្រកបដោយសមត្ថភាព និងជំនាញគ្រប់វិស័យ រួមទាំងវិស័យការពារជាតិ សេដ្ឋកិច្ច សង្គម វិទ្យាសាស្ត្រ បច្ចេកវិទ្យា និងជំនាញឯកទេសផ្សេងៗ ដើម្បីរួមចំណែកជំរុញការអភិវឌ្ឍជាតិឱ្យកាន់តែរីកចម្រើន និងមានភាពប្រកួតប្រជែង។

ឯកឧត្តមបានអំពាវនាវដល់សិស្សានុសិស្សទាំងអស់ ត្រូវចាប់យកឱកាសដ៏មានតម្លៃនេះ ដោយខិតខំប្រឹងប្រែងសិក្សារៀនសូត្រ អភិវឌ្ឍចំណេះដឹង ជំនាញ និងបទពិសោធន៍ឱ្យបានពេញលេញ ដើម្បីក្លាយជាពលរដ្ឋល្អ ធនធានមនុស្សប្រកបដោយគុណភាព និងជាកម្លាំងចលករសម្រាប់ការអភិវឌ្ឍគ្រួសារ សហគមន៍ និងប្រទេសជាតិ។

សាររបស់ថ្នាក់ដឹកនាំខេត្តកណ្ដាលបានឆ្លុះបញ្ចាំងពីការយកចិត្តទុកដាក់ខ្ពស់លើវិស័យអប់រំ ដែលជាមូលដ្ឋានគ្រឹះនៃការកសាងមូលធនមនុស្ស និងជាកត្តាសំខាន់ក្នុងការធានាការអភិវឌ្ឍប្រកបដោយចីរភាពរបស់កម្ពុជា៕