ឧកញ៉ា ថោង សារ៉ាត ចេញបកស្រាយជុំវិញវិវាទដីធ្លី ដោយអះអាងថា មិនបានរំលោភយកដីរបស់យោធិនឡើយ

(ភ្នំពេញ)៖ ឧកញ៉ា ថោង សារ៉ាត បានបង្ហោះសារបកស្រាយជាសាធារណៈនៅលើបណ្ដាញសង្គម នាថ្ងៃទី២២ ខែមិថុនា ឆ្នាំ២០២៦ ដោយផ្ញើជូនលោក ផែង វណ្ណៈ ក្នុងគោលបំណងបញ្ជាក់ជំហរ និងបង្ហាញការពិតជុំវិញករណីវិវាទដីធ្លី ដែលកំពុងមានការផ្សព្វផ្សាយថា ក្រុមហ៊ុនរបស់លោកបានរំលោភយកដីរបស់យោធិនម្នាក់។

នៅក្នុងសារនោះ ឧកញ៉ា ថោង សារ៉ាត បានថ្លែងអំណរគុណចំពោះលោក ផែង វណ្ណៈ ដែលកន្លងមកបានខិតខំស្វែងរកយុត្តិធម៌ជូនប្រជាពលរដ្ឋជាច្រើនរូប។ ទន្ទឹមនឹងនេះ លោកបានបញ្ជាក់ថា ការចោទប្រកាន់ដែលថា លោក និងក្រុមហ៊ុនបានរំលោភយកដីរបស់យោធិន គឺជាការយល់ច្រឡំធ្ងន់ធ្ងរ និងមិនស្របតាមការពិតនោះឡើយ។

លោកបានអះអាងថា ខ្លួនមិនធ្លាប់លក់ដី ឬទទួលប្រាក់ពីបុគ្គលដែលកំពុងទាមទារសិទ្ធិលើដីនោះទេ។ ជាមួយគ្នានេះ លោកក៏បានបដិសេធចំពោះឯកសារ ឬហត្ថលេខាណាដែលត្រូវបានគេអះអាងថាជារបស់លោក ប្រសិនបើឯកសារទាំងនោះមិនបានអនុវត្តតាមនីតិវិធីច្បាប់ និងមិនបានឆ្លងកាត់ម្ចាស់កម្មសិទ្ធិស្របច្បាប់ពិតប្រាកដ។

ឧកញ៉ា ថោង សារ៉ាត បានលើកឡើងថា ប័ណ្ណកម្មសិទ្ធិស្របច្បាប់របស់លោកត្រូវបានចេញតាំងពីឆ្នាំ២០១០ និងមានទិន្នន័យត្រឹមត្រូវក្នុងប្រព័ន្ធរដ្ឋ ខណៈឯកសារទិញលក់ដោយដៃដែលត្រូវបានយកមកអះអាង មានចំណុចមួយចំនួនមិនស៊ីគ្នាជាមួយឯកសារផ្លូវការ។ លោកបានសង្កត់ធ្ងន់ថា ការផ្ទេរកម្មសិទ្ធិដីធ្លីត្រូវធ្វើឡើងតាមនីតិវិធី និងស្ថាប័នមានសមត្ថកិច្ច ដើម្បីជៀសវាងការលក់ជាន់គ្នា និងវិវាទនានា។

បន្ថែមពីនេះ លោកក៏បានអះអាងថា បុគ្គលដែលត្រូវបានគេលើកឡើងថាជាយោធិន និងបុគ្គលដែលមានឈ្មោះក្នុងឯកសារទិញលក់ដោយដៃ មិនមែនជាមនុស្សតែមួយគ្នានោះទេ។ ដូច្នេះ ការភ្ជាប់វិវាទឯកជននេះទៅនឹងស្ថាប័នយោធា អាចបង្កឱ្យមានការយល់ច្រឡំក្នុងសាធារណជន និងប៉ះពាល់ដល់កិត្តិយសរបស់ស្ថាប័នជាតិ។

ក្នុងលិខិតដដែល លោកបានឱ្យដឹងថា ក្រុមមេធាវីរបស់លោកបានរកឃើញសកម្មភាពមួយចំនួនដែលត្រូវការការពិនិត្យផ្លូវច្បាប់ រួមមានការប្រើប្រាស់ឯកសណ្ឋានយោធា ការយករថយន្តយោធាមកទីតាំងវិវាទ និងការបង្កសម្ពាធលើក្រុមហ៊ុន បុគ្គលិក កម្មករ និងអតិថិជន។ ជុំវិញបញ្ហានេះ ក្រុមមេធាវីបានដាក់ពាក្យទៅសាលាដំបូងខេត្តកណ្ដាលរួចហើយ ដើម្បីឱ្យស្ថាប័នតុលាការពិនិត្យ និងសម្រេចតាមនីតិវិធីច្បាប់។

ទោះបីជាវិវាទកំពុងស្ថិតក្នុងដំណាក់កាលផ្លូវច្បាប់ក៏ដោយ ឧកញ៉ា ថោង សារ៉ាត បានបញ្ជាក់ថា លោកនៅតែមានសុច្ឆន្ទៈក្នុងការដោះស្រាយដោយសន្តិវិធី។ លោកអះអាងថា ធ្លាប់បានស្នើផ្តល់ដីមួយកន្លែងនៅជិតទីតាំងដើមដែលមានទំហំ និងតម្លៃសមស្រប ដើម្បីជួយសម្រួលដល់ភាគីទាមទារ ប៉ុន្តែភាគីនោះនៅតែទាមទារប្រាក់បន្ថែមចំនួន ១៨,០០០ ដុល្លារអាមេរិក ដែលលោកមិនអាចទទួលយកបាន។

ឧកញ៉ា ថោង សារ៉ាត បានអំពាវនាវឱ្យគ្រប់ភាគីពាក់ព័ន្ធគោរពច្បាប់ គោរពភស្តុតាង និងដោះស្រាយបញ្ហាតាមនីតិវិធីស្របច្បាប់ ជៀសវាងការបង្កសម្ពាធ ឬការប្រើប្រាស់បណ្ដាញសង្គមជាមធ្យោបាយវិនិច្ឆ័យជំនួសស្ថាប័នមានសមត្ថកិច្ច។ លោកក៏បានបង្ហាញជំហរថា នៅតែបើកចំហចំពោះការចរចា និងដំណោះស្រាយដោយសន្តិវិធី ប្រសិនបើភាគីពាក់ព័ន្ធវិលត្រឡប់មករកការពិភាក្សាដោយសុចរិត និងគោរពគ្នាទៅវិញទៅមក។

សូមបញ្ជាក់ថា ខ្លឹមសារខាងលើគឺជាការបកស្រាយ និងអះអាងរបស់ឧកញ៉ា ថោង សារ៉ាត តាមរយៈសារដែលបានផ្សព្វផ្សាយជាសាធារណៈ ខណៈករណីនេះកំពុងស្ថិតក្នុងដំណើរការពិនិត្យ និងដោះស្រាយតាមផ្លូវច្បាប់៕