អាជ្ញាធរខេត្តកណ្តាលចុះផ្អាកសំណង់ខុសច្បាប់ ២ទីតាំង ក្រោយរកឃើញសាងសង់រំលោភលើដីចំណីទន្លេរបស់រដ្ឋ នៅស្រុកស្អាង

(កណ្តាល)៖ អាជ្ញាធរខេត្តកណ្តាល បានបង្ហាញជំហរម៉ឺងម៉ាត់ក្នុងការការពារ និងថែរក្សាដីសាធារណៈរបស់រដ្ឋ ដោយបានចុះត្រួតពិនិត្យ និងបញ្ឈប់ជាបន្ទាន់នូវការសាងសង់សំណង់ខុសច្បាប់ចំនួន ២ទីតាំង ដែលកំពុងរំលោភលើដីសាធារណៈរបស់រដ្ឋ (ដីចំណីទន្លេ) ស្ថិតក្នុងភូមិសាស្ត្រស្រុកស្អាង ខេត្តកណ្តាល។

ប្រតិបត្តិការនេះ បានធ្វើឡើងនៅព្រឹកថ្ងៃទី១៩ ខែមិថុនា ឆ្នាំ២០២៦ ក្រោមការដឹកនាំផ្ទាល់របស់ឯកឧត្តម ហាក់ សុខមករា អភិបាលរងខេត្តកណ្តាល ដោយមានការចូលរួមពីក្រុមការងារចម្រុះ រួមមានមន្ទីរជំនាញពាក់ព័ន្ធ កម្លាំងសមត្ថកិច្ច អាជ្ញាធរស្រុកស្អាង និងមន្ត្រីបច្ចេកទេសជាច្រើនរូប។

តាមការពិនិត្យជាក់ស្តែង សំណង់ផ្ទះថ្មទាំង ២ទីតាំង ដែលកំពុងដំណើរការសាងសង់ ត្រូវបានរកឃើញថា បានរំលោភកាន់កាប់លើដីចំណីទន្លេ ដែលជាទ្រព្យសម្បត្តិសាធារណៈរបស់រដ្ឋ។ ទីតាំងទី១ ស្ថិតនៅភូមិបារ៉ែនលើ ឃុំស្វាយប្រទាល និងទីតាំងទី២ ស្ថិតនៅភូមិក្បាលជ្រោយ ឃុំព្រែកគយ ស្រុកស្អាង។

ក្នុងឱកាសចុះពិនិត្យនោះ ឯកឧត្តម ហាក់ សុខមករា បានធ្វើការណែនាំ និងព្រមានយ៉ាងតឹងរ៉ឹងដល់ម្ចាស់សំណង់ ក្រុមជាង និងអ្នកពាក់ព័ន្ធទាំងអស់ ឱ្យបញ្ឈប់ការសាងសង់ជាបន្ទាន់ ដោយមិនអនុញ្ញាតឱ្យបន្តសកម្មភាពណាមួយឡើយ រហូតដល់មានការសម្រេចពីស្ថាប័នជំនាញពាក់ព័ន្ធ។

ឯកឧត្តមបានបញ្ជាក់ថា ក្នុងករណីដែលភាគីពាក់ព័ន្ធនៅតែបន្តសាងសង់ដោយផ្គើននឹងការណែនាំរបស់អាជ្ញាធរ នឹងត្រូវប្រឈមមុខចំពោះវិធានការច្បាប់យ៉ាងម៉ឺងម៉ាត់ ដោយអាជ្ញាធរអាចចាត់វិធានការដកហូតសម្ភារៈសំណង់ បិទការដ្ឋាន និងអនុវត្តនីតិវិធីច្បាប់ជាធរមានដោយគ្មានការលើកលែង។

ជាមួយគ្នានេះ អភិបាលរងខេត្តក៏បានហាមឃាត់ដាច់ខាតការស្នាក់នៅ ឬការប្រើប្រាស់សំណង់ទាំងនោះក្នុងអំឡុងពេលផ្អាកការដ្ឋាន ដើម្បីបង្ការហានិភ័យ និងគ្រោះថ្នាក់ផ្សេងៗ ដែលអាចកើតឡើងដោយសារសំណង់មិនទាន់មានការអនុញ្ញាតត្រឹមត្រូវ និងមិនទាន់ឆ្លងកាត់ការវាយតម្លៃតាមស្តង់ដារបច្ចេកទេស។

តាមការបញ្ជាក់ពីមន្ទីរជំនាញ សំណង់ទាំងពីរនេះ មិនបានដាក់ពាក្យស្នើសុំលិខិតអនុញ្ញាតសាងសង់ពីស្ថាប័នពាក់ព័ន្ធនោះទេ ដែលជាមូលហេតុធ្វើឱ្យសំណង់ទាំងនេះត្រូវបានចាត់ទុកថាជា សំណង់ខុសច្បាប់ និងមិនអាចបន្តដំណើរការបានឡើយ លុះត្រាតែមានការពិនិត្យ និងអនុម័តពីក្រសួង និងស្ថាប័នមានសមត្ថកិច្ចជាមុនសិន។

សកម្មភាពនេះបានឆ្លុះបញ្ចាំងពីការប្តេជ្ញាចិត្តរបស់រដ្ឋបាលខេត្តកណ្តាល ក្នុងការការពារទ្រព្យសម្បត្តិសាធារណៈរបស់រដ្ឋ ទប់ស្កាត់ការរំលោភកាន់កាប់ដីធ្លីដោយខុសច្បាប់ និងធានាឱ្យការអភិវឌ្ឍនៅក្នុងមូលដ្ឋានប្រព្រឹត្តទៅស្របតាមច្បាប់ និងផែនការគ្រប់គ្រងដីធ្លីជាតិ។

ជាមួយនឹងការអនុវត្តច្បាប់យ៉ាងម៉ឺងម៉ាត់នេះ អាជ្ញាធរខេត្តកណ្តាលក៏បានអំពាវនាវដល់ប្រជាពលរដ្ឋ អ្នកវិនិយោគ និងម្ចាស់គម្រោងសំណង់ទាំងអស់ ត្រូវសិក្សាឱ្យបានច្បាស់លាស់អំពីស្ថានភាពដីធ្លី និងបំពេញនីតិវិធីស្នើសុំអនុញ្ញាតសាងសង់ឱ្យបានត្រឹមត្រូវ មុននឹងចាប់ផ្តើមអនុវត្តគម្រោង ដើម្បីជៀសវាងការខាតបង់ថវិកា និងការប្រឈមនឹងវិធានការផ្លូវច្បាប់នាពេលក្រោយ៕