លោកឧត្តមសេនីយ៍ត្រី ម៉េង ស្រ៊ុន បន្តបេសកកម្មមនុស្សធម៌ ចុះជួយគ្រួសារក្រីក្រ និងអ្នកជំងឺជួបការលំបាកនៅក្រុងច្បារមន

(កំពង់ស្ពឺ)៖ ទឹកចិត្តមនុស្សធម៌ពិតប្រាកដ តែងបង្ហាញចេញតាមរយៈទង្វើជាក់ស្តែង។ ជាក់ស្តែង នៅព្រឹកថ្ងៃទី១៩ ខែមិថុនា ឆ្នាំ២០២៦ លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ បានបន្តដឹកនាំក្រុមការងារចុះសួរសុខទុក្ខ និងនាំយកអំណោយមនុស្សធម៌ទៅឧបត្ថម្ភដល់ប្រជាពលរដ្ឋដែលមានជីវភាពខ្វះខាត កំពុងជួបការលំបាក និងមានជំងឺប្រចាំកាយ ស្ថិតក្នុងភូមិដក់ពរ សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ។

ការចុះសួរសុខទុក្ខនេះ បានធ្វើឡើងបន្ទាប់ពីលោកមេបញ្ជាការ ទទួលបានព័ត៌មានពីក្រុមការងារមូលដ្ឋានថា មានគ្រួសារមួយកំពុងរស់នៅក្នុងស្ថានភាពលំបាកខ្លាំង ដោយប្តីមានជំងឺទឹកនោមប្រៃប៉ះពាល់ដល់តម្រងនោម ខណៈជីវភាពគ្រួសារក៏កំពុងប្រឈមនឹងការខ្វះខាត។ ជាមួយគ្នានោះ ក៏មានលោកយាយវ័យ ៧៦ឆ្នាំម្នាក់ ដែលកំពុងមានជំងឺស្លាប់មួយចំហៀងខ្លួន និងត្រូវការជំនួយជាបន្ទាន់ផងដែរ។

ក្នុងស្មារតី «ខ្មែរស្រឡាញ់ខ្មែរ ជួយគ្នាក្នុងគ្រាលំបាក» លោកឧត្តមសេនីយ៍ត្រី ម៉េង ស្រ៊ុន បានដឹកនាំក្រុមការងារកងរាជអាវុធហត្ថខេត្តកំពង់ស្ពឺ ដោយមានការចូលរួមពីក្រុមការងារសហភាពសហព័ន្ធយុវជនកម្ពុជាខេត្តកំពង់ស្ពឺ និងក្រុមការងារកាកបាទក្រហមកម្ពុជាសាខាខេត្តកំពង់ស្ពឺ ចុះទៅដល់លំនៅឋានរបស់ប្រជាពលរដ្ឋដោយផ្ទាល់ ដើម្បីសាកសួរសុខទុក្ខ ផ្តល់កម្លាំងចិត្ត និងស្វែងយល់ពីស្ថានភាពរស់នៅជាក់ស្តែង។

ក្នុងឱកាសនោះ លោកមេបញ្ជាការ និងក្រុមការងារ បានសម្តែងនូវក្តីអាណិតអាសូរយ៉ាងជ្រាលជ្រៅចំពោះក្រុមគ្រួសារដែលកំពុងជួបការលំបាក និងបានផ្តល់អំណោយរួមមាន ថវិកាចំនួន ៣០ម៉ឺនរៀល អង្ករ ៥០គីឡូក្រាម មី១កេស ទឹកសុទ្ធ២កេស ភេសជ្ជៈ១កេស ទឹកត្រី១យួរ ទឹកស៊ីអ៊ីវ១យួរ ត្រីខ១យួរ និងរទេះរុញ១គ្រឿង សរុបជាទឹកប្រាក់ប្រមាណជាង ១លានរៀល។

ប្រជាពលរដ្ឋ និងអាជ្ញាធរមូលដ្ឋាន បានសម្តែងនូវការកោតសរសើរចំពោះទឹកចិត្តដ៏សប្បុរស និងការយកចិត្តទុកដាក់របស់លោកឧត្តមសេនីយ៍ត្រី ម៉េង ស្រ៊ុន ដែលតែងតែចុះដល់មូលដ្ឋាន ស្វែងរក និងជួយដល់ប្រជាពលរដ្ឋដែលកំពុងជួបការលំបាកដោយផ្ទាល់ ដោយមិនប្រកាន់វណ្ណៈ ឬស្ថានភាពណាមួយឡើយ។

គួរបញ្ជាក់ថា សកម្មភាពមនុស្សធម៌របស់លោកឧត្តមសេនីយ៍ត្រី ម៉េង ស្រ៊ុន ត្រូវបានអនុវត្តជាបន្តបន្ទាប់អស់រយៈពេលជាច្រើនឆ្នាំមកហើយ ដោយលោកតែងចំណាយធនធានផ្ទាល់ខ្លួន និងកៀរគរការចូលរួមពីសប្បុរសជន ដើម្បីជួយដល់គ្រួសារក្រីក្រ ជនចាស់ជរា ជនពិការ និងអ្នកជំងឺខ្វះលទ្ធភាពព្យាបាលនៅទូទាំងខេត្តកំពង់ស្ពឺ។

សកម្មភាពដ៏ប្រកបដោយមនុស្សធម៌នេះ បានឆ្លុះបញ្ចាំងពីតួនាទីជាថ្នាក់ដឹកនាំដែលមិនត្រឹមតែបំពេញភារកិច្ចថែរក្សាសន្តិសុខសង្គមប៉ុណ្ណោះទេ ប៉ុន្តែថែមទាំងមានបេះដូងពោរពេញដោយក្តីមេត្តា ការចែករំលែក និងការលះបង់ ដើម្បីជួយលើកកម្ពស់សុខុមាលភាពរបស់ប្រជាពលរដ្ឋក្នុងសង្គមកម្ពុជាឱ្យកាន់តែប្រសើរឡើងផងដែរ៕