ផ្ទុះការចម្រូងចម្រាសរឿងដី ៤ហិកតា! ម្ចាស់គណនី Ly Chan Vatey ប្រកាសស្វែងរកយុត្តិធម៌ ខណៈអាជ្ញាធរស្រុកល្វាឯមបញ្ជាក់ថា ជាដីសាធារណៈរបស់រដ្ឋ

(កណ្ដាល)៖ ករណីវិវាទដីធ្លីមួយនៅភូមិព្រែករៃ ឃុំព្រែករៃ ស្រុកល្វាឯម ខេត្តកណ្ដាល កំពុងទទួលការចាប់អារម្មណ៍ពីសាធារណជន បន្ទាប់ពីគណនីហ្វេសប៊ុកឈ្មោះ Ly Chan Vatey បានបង្ហោះសារបង្ហាញការឈឺចាប់ និងចោទប្រកាន់ថា មានការឃុបឃិតលួចលក់ដីចំនួន ៤ហិកតា ដែលក្រុមគ្រួសាររបស់ខ្លួនបានដាំឈូក និងអាស្រ័យផលអស់រយៈពេលជាង ១៥ឆ្នាំមកហើយ។

ម្ចាស់គណនីបានអះអាងថា ស្រាប់តែមានគ្រឿងចក្រចូលឈូសឆាយ និងប្រាប់ថា ដីនោះត្រូវបានលក់ និងចេញប្លង់រឹងរួចរាល់ ដោយបានប្រកាសថានឹងបន្តស្វែងរកយុត្តិធម៌ជូនឪពុកម្ដាយរបស់ខ្លួន។

ជុំវិញការលើកឡើងនេះ លោក លីវ វណ្ណថេង អភិបាលស្រុកល្វាឯម បានដឹកនាំកិច្ចប្រជុំពិនិត្យ និងសម្របសម្រួលករណីខាងលើ ដោយមានការចូលរួមពីភាគីពាក់ព័ន្ធ និងតំណាងក្រុមហ៊ុនសាងសង់ផ្លូវ ដើម្បីសិក្សាឯកសារ និងស្វែងយល់ពីការពិតឲ្យបានច្បាស់លាស់។

តាមលទ្ធផលនៃកិច្ចប្រជុំ អាជ្ញាធរបានបញ្ជាក់ថា ផ្ទៃដីដែលឈ្មោះ លី សេង និង លី សីហា កំពុងអាស្រ័យផលនោះ ត្រូវបានក្រសួងរៀបចំដែនដី នគរូបនីយកម្ម និងសំណង់ កំណត់ថាជា ដីសាធារណៈរបស់រដ្ឋ តាមលិខិតលេខ ៥១៤ ដនស/អសដភ ចុះថ្ងៃទី៣ ខែមីនា ឆ្នាំ២០២២។

ដោយឡែក សកម្មភាពគ្រឿងចក្រដែលកំពុងឈូសឆាយ ត្រូវបានអាជ្ញាធរអះអាងថា ជាការជីកស្ដារបឹងដោយក្រុមហ៊ុនទទួលម៉ៅការ ដែលទទួលបានការអនុញ្ញាតត្រឹមត្រូវពីរដ្ឋបាលស្រុក និងខេត្ត ដើម្បីយកអាចម៌ដីទៅសាងសង់ផ្លូវគ្រួសក្រហមសម្រាប់បម្រើផលប្រយោជន៍សាធារណៈ។

អាជ្ញាធរក៏បានបញ្ជាក់ទៀតថា ឈ្មោះ លី សេង, លី សីហា និងក្រុមគ្រួសារ បានឯកភាពរក្សាទុកផ្ទៃដីបឹងកក់ជាសម្បត្តិសាធារណៈរបស់រដ្ឋ និងស្នើសុំអនុញ្ញាតឲ្យប្រជាពលរដ្ឋអាចបន្តប្រើប្រាស់ប្រភពទឹក និងនេសាទជាធម្មតា។

ទោះជាយ៉ាងណា ករណីនេះនៅតែបន្តទាក់ទាញការចាប់អារម្មណ៍ពីមហាជន ខណៈភាគីម្ចាស់គណនីហ្វេសប៊ុកបានបង្ហាញជំហរថា នឹងបន្តបញ្ចេញព័ត៌មាន និងភស្តុតាងបន្ថែម ដើម្បីស្វែងរកការបកស្រាយ និងយុត្តិធម៌តាមផ្លូវច្បាប់។

សាធារណជនកំពុងរង់ចាំមើលថា តើភស្តុតាង និងការបកស្រាយពីគ្រប់ភាគី នឹងអាចបញ្ជាក់ការពិតនៃរឿងរ៉ាវនេះបានកម្រិតណា៕