អភិបាលខេត្តកណ្ដាលជំរុញចែកបណ្ណកម្មសិទ្ធិឱ្យដល់ដៃពលរដ្ឋគ្រប់គ្នា នៅស្រុកស្អាង

(កណ្ដាល)៖ ថ្នាក់ដឹកនាំខេត្តកណ្ដាល និងមន្ត្រីជំនាញ បានរៀបចំពិធីចែកវិញ្ញាបនបត្រសម្គាល់ម្ចាស់អចលនវត្ថុចំនួន ២៧,២៤២បណ្ណ ជូនប្រជាពលរដ្ឋនៅ ២៨ភូមិ ក្នុងឃុំចំនួន៥ នៃស្រុកស្អាង នាព្រឹកថ្ងៃទី០៨ ខែមិថុនា ឆ្នាំ២០២៦។

ក្នុងឱកាសនោះ ឯកឧត្តម គួច ចំរើន អភិបាលខេត្តកណ្ដាល បានជំរុញឱ្យមន្ត្រីពាក់ព័ន្ធបន្តពន្លឿនការប្រគល់បណ្ណកម្មសិទ្ធិជូនប្រជាពលរដ្ឋឱ្យបានគ្រប់គ្នា និងបម្រើសេវាសាធារណៈប្រកបដោយតម្លាភាព ប្រសិទ្ធភាព និងគ្មានការដាក់លក្ខខណ្ឌណាមួយដែលប៉ះពាល់ដល់ផលប្រយោជន៍របស់ប្រជាពលរដ្ឋ។

ឯកឧត្តមក៏បានសង្កត់ធ្ងន់ថា អាជ្ញាធរគ្រប់លំដាប់ថ្នាក់ត្រូវទទួលស្គាល់តែ បណ្ណកម្មសិទ្ធិដីធ្លីដែលបានចុះបញ្ជីត្រឹមត្រូវតាមច្បាប់ ប៉ុណ្ណោះ ដើម្បីបង្ការវិវាទ និងភាពស្មុគស្មាញពាក់ព័ន្ធនឹងដីធ្លីនាពេលអនាគត។

ការចែកបណ្ណកម្មសិទ្ធិនេះ គឺជាជំហានសំខាន់មួយក្នុងការពង្រឹងសិទ្ធិកាន់កាប់ដីធ្លីស្របច្បាប់ និងលើកកម្ពស់ទំនុកចិត្តរបស់ប្រជាពលរដ្ឋលើការគ្រប់គ្រងវិស័យដីធ្លីនៅក្នុងខេត្តកណ្ដាល៕