បាល់ទាត់ភ្ជាប់បេះដូង! ការប្រកួតមិត្តភាពសប្បុរសធម៌នៅខេត្តកណ្ដាល ប្រមូលថវិកាជាង៤០០លានរៀល ជួយបងប្អូនភៀសសឹកនៅភូមិរង់ចាំ

(កណ្ដាល)៖ កីឡាមិនត្រឹមតែជាសកម្មភាពលើទីលាន ដើម្បីលើកកម្ពស់សុខភាព និងចំណងមិត្តភាពប៉ុណ្ណោះទេ ប៉ុន្តែក៏អាចក្លាយជាស្ពានភ្ជាប់បេះដូងមនុស្សជាតិ និងបង្កើតកម្លាំងសាមគ្គីសម្រាប់សកម្មភាពមនុស្សធម៌ផងដែរ។ ជាក់ស្ដែង ការប្រកួតកីឡាមិត្តភាពសប្បុរសធម៌ រវាងក្រុមបាល់ទាត់ ស.ស.យ.ក. អលស្តារ និង ក្រុមបាល់ទាត់រដ្ឋបាលខេត្តកណ្ដាល ក្រោមប្រធានបទ «បាល់ទាត់ភ្ជាប់បេះដូង ជួយបងប្អូនភៀសសឹកនៅភូមិរង់ចាំ» បានប្រមូលថវិកាសប្បុរសធម៌បានជាង ៤០០លានរៀល សម្រាប់ចូលរួមជួយសម្រាលការលំបាករបស់បងប្អូនប្រជាពលរដ្ឋដែលបានភៀសសឹក។

នាល្ងាចថ្ងៃទី១៨ ខែមេសា ឆ្នាំ២០២៦ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានអញ្ជើញជាអធិបតីក្នុងព្រឹត្តិការណ៍ដ៏មានអត្ថន័យនេះ នៅឯកីឡដ្ឋានខេត្តកណ្ដាល ដោយមានការអញ្ជើញចូលរួមពី ឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល ថ្នាក់ដឹកនាំ សមាជិក សមាជិកា ស.ស.យ.ក. ថ្នាក់ដឹកនាំខេត្ត សិស្សានុសិស្ស និងប្រជាពលរដ្ឋយ៉ាងច្រើនកុះករ។

ក្នុងឱកាសនោះ ឯកឧត្តម គួច ចំរើន បានថ្លែងស្វាគមន៍យ៉ាងកក់ក្ដៅចំពោះវត្តមានរបស់ថ្នាក់ដឹកនាំ និងប្រជាពលរដ្ឋដែលបានចូលរួមគាំទ្រព្រឹត្តិការណ៍កីឡាមិត្តភាពសប្បុរសធម៌នេះ។ ឯកឧត្តមបានគូសបញ្ជាក់ថា ការចូលរួមរបស់សប្បុរសជន និងប្រជាពលរដ្ឋ គឺជាកម្លាំងដ៏សំខាន់ក្នុងការកៀរគរថវិកា និងសម្ភារៈ ដើម្បីផ្ដល់ការគាំទ្រដល់បងប្អូនជនភៀសសឹកនៅភូមិរង់ចាំ។

ជាមួយគ្នានេះ ឯកឧត្តម ហ៊ុន ម៉ានី បានសម្ដែងនូវសេចក្ដីសោមនស្សរីករាយ និងថ្លែងអំណរគុណដល់រដ្ឋបាលខេត្តកណ្ដាល ដែលបានសហការគាំទ្រ និងរៀបចំការប្រកួតបាល់ទាត់មិត្តភាពសប្បុរសធម៌នេះឡើង ព្រមទាំងថ្លែងអំណរគុណយ៉ាងជ្រាលជ្រៅដល់សប្បុរសជនទាំងអស់ ដែលបានចូលរួមបរិច្ចាគថវិកា និងសម្ភារៈសម្រាប់ជួយដល់បងប្អូនដែលកំពុងជួបការលំបាក។

ឯកឧត្តមបានលើកឡើងថា ការប្រកួតនេះមិនមែនមានគោលដៅត្រឹមតែការជួបជុំ និងបង្កើនចំណងមិត្តភាពតាមរយៈវិស័យកីឡានោះទេ ប៉ុន្តែជាសកម្មភាពមនុស្សធម៌ដែលបង្ហាញពី កម្លាំងនៃសាមគ្គីភាព ការចែករំលែក និងការយកចិត្តទុកដាក់ចំពោះប្រជាពលរដ្ឋដែលកំពុងជួបការលំបាក។

ជាពិសេស ការប្រមូលថវិកាសប្បុរសធម៌បានជាង ៤០០លានរៀល គឺជាសក្ខីភាពមួយបង្ហាញពីទឹកចិត្តសប្បុរស និងការចូលរួមរបស់សង្គមទាំងមូល ក្នុងការរួមចំណែកជួយបងប្អូនប្រជាពលរដ្ឋដែលបានភៀសសឹកនៅភូមិរង់ចាំ។

ក្រៅពីនេះ ឯកឧត្តម ហ៊ុន ម៉ានី ក៏បានអំពាវនាវដល់ប្រជាពលរដ្ឋទាំងអស់ បន្តរក្សាស្មារតីសាមគ្គីភាព ជឿជាក់ និងចូលរួមគាំទ្រយ៉ាងសកម្មជាមួយរាជរដ្ឋាភិបាល ព្រមទាំងផ្ដល់កម្លាំងចិត្តដល់វីរជនកងទ័ពជួរមុខ និងកងកម្លាំងប្រដាប់អាវុធ ដែលកំពុងបំពេញបេសកកម្មការពារជាតិ និងបូរណភាពទឹកដី។

ព្រឹត្តិការណ៍ «បាល់ទាត់ភ្ជាប់បេះដូង ជួយបងប្អូនភៀសសឹកនៅភូមិរង់ចាំ» បានក្លាយជាសារដ៏មានអត្ថន័យថា កីឡាអាចបង្កើតមិត្តភាព ហើយមិត្តភាពអាចបង្កើតសាមគ្គីភាព ខណៈសាមគ្គីភាពអាចក្លាយជាកម្លាំងដ៏ធំសម្រាប់សកម្មភាពមនុស្សធម៌ និងការជួយគ្នាក្នុងគ្រាលំបាក។

ជាមួយនឹងទឹកចិត្តសប្បុរសរបស់សប្បុរសជន និងប្រជាពលរដ្ឋខេត្តកណ្ដាល ការរួមចំណែកជាង៤០០លានរៀលនេះ មិនត្រឹមតែជាតម្លៃជារូបិយវត្ថុប៉ុណ្ណោះទេ ប៉ុន្តែជាតម្លៃនៃ ក្តីស្រឡាញ់ ការចែករំលែក និងស្មារតីខ្មែរជួយខ្មែរ៕