លោក ចេង ឌីណា ដឹកនាំកម្លាំងចុះពិនិត្យទីតាំងចាក់ដី ដោយឯកសារបញ្ជាក់ថា ជាដីកម្មសិទ្ធិស្របច្បាប់ និងមិនពាក់ព័ន្ធដីសាធារណៈរបស់រដ្ឋទេ!

(កណ្តាល)៖ បន្ទាប់ពីមានការចុះផ្សាយព័ត៌មានពាក់ព័ន្ធនឹងករណីចាក់ដីមួយកន្លែង ស្ថិតនៅភូមិឈូក ឃុំសន្លង ស្រុកខ្សាច់កណ្តាល ខេត្តកណ្តាល កាលពីថ្ងៃទី១០ ខែសីហា ឆ្នាំ២០២៦ លោក ចេង ឌីណា អភិបាលស្រុកខ្សាច់កណ្តាល បានដឹកនាំក្រុមការងារ ព្រមទាំងមានការចូលរួមពីអាជ្ញាធរឃុំ និងភូមិ ចុះពិនិត្យ និងស្វែងយល់ជាក់ស្តែងនៅទីតាំងខាងលើ។

តាមលទ្ធផលនៃការចុះពិនិត្យ និងការកំណត់និយាមការដោយការិយាល័យរៀបចំដែនដី នគរូបនីយកម្ម សំណង់ និងភូមិបាល បានបញ្ជាក់ថា ទីតាំងដែលបានចាក់ដីមានទំហំប្រមាណ ២២,៩២០ម៉ែត្រការ៉េ និងស្ថិតនៅក្នុងវិញ្ញាបនបត្រសម្គាល់ម្ចាស់អចលនវត្ថុរបស់លោក ចាប ហុងលី ដែលមានទំហំសរុបប្រមាណ ៤៣៥,០៣៥ម៉ែត្រការ៉េ។

ប្រភពអះអាងថា ទីតាំងចាក់ដីខាងលើ មិនជាប់ពាក់ព័ន្ធនឹងដីសាធារណៈរបស់រដ្ឋឡើយ ហើយដីរបស់លោក ចាប ហុងលី ត្រូវបានបញ្ជាក់ថា ជាដីដែលមានកម្មសិទ្ធិស្របច្បាប់ត្រឹមត្រូវ។

ជាមួយគ្នានេះ ឯកសារក៏បានបង្ហាញថា លោក ចាប ហុងលី បានដាក់ពាក្យស្នើសុំចាក់ដីបំពេញដីផ្ទាល់ខ្លួនទំហំ ១០០,០០០ម៉ែត្រការ៉េ ជម្រៅ ២,៥ម៉ែត្រ តាំងពីថ្ងៃទី២៥ ខែមករា ឆ្នាំ២០២៥ ហើយក្រោយពីរដ្ឋបាលបានពិនិត្យលើពាក្យស្នើសុំ ចុះពិនិត្យទីតាំង និងបរិស្ថាន រដ្ឋបាលខេត្តបានឯកភាពតាមសំណើ៕