បាល់ទាត់ភ្ជាប់បេះដូង! ឧបនាយករដ្ឋមន្ដ្រី ហ៊ុន ម៉ានី ដឹកនាំព្រឹត្តិការណ៍សប្បុរសធម៌ រួមកម្លាំងជួយបងប្អូនភៀសសឹកនៅភូមិរង់ចាំ

(កណ្ដាល)៖ នាល្ងាចថ្ងៃទី១៨ ខែមេសា ឆ្នាំ២០២៦ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានអញ្ជើញជាអធិបតីក្នុងការប្រកួតកីឡាមិត្តភាពសប្បុរសធម៌ រវាងក្រុមបាល់ទាត់ ស.ស.យ.ក. All Star និងក្រុមបាល់ទាត់ រដ្ឋបាលខេត្តកណ្ដាល ក្រោមប្រធានបទ «បាល់ទាត់ភ្ជាប់បេះដូង ជួយបងប្អូនភៀសសឹកនៅភូមិរង់ចាំ» នៅកីឡដ្ឋានខេត្តកណ្ដាល។

កម្មវិធីនេះមានការអញ្ជើញចូលរួមពី ឯកឧត្តម គួច ចំរើន អភិបាលនៃគណៈអភិបាលខេត្តកណ្ដាល ឯកឧត្តម លោកជំទាវ សមាជិកគណៈអចិន្ត្រៃយ៍ គណៈកម្មាធិការកណ្ដាល ស.ស.យ.ក. ថ្នាក់ដឹកនាំខេត្ត ព្រមទាំងសិស្សានុសិស្ស និងប្រជាពលរដ្ឋខេត្តកណ្ដាលយ៉ាងច្រើនកុះករ។ក្នុង

ឱកាសនោះ ឯកឧត្តម គួច ចំរើន បានថ្លែងស្វាគមន៍យ៉ាងកក់ក្ដៅចំពោះវត្តមានថ្នាក់ដឹកនាំ និងប្រជាពលរដ្ឋដែលបានចូលរួម ព្រមទាំងបញ្ជាក់ថា ការប្រកួតកីឡាមិត្តភាពសប្បុរសធម៌នេះ គឺជាការរួមចំណែកដ៏មានអត្ថន័យក្នុងការកៀរគរការចូលរួមពីសប្បុរសជន តាមរយៈការបរិច្ចាគថវិកា និងសម្ភារៈ ដើម្បីជួយគាំទ្រដល់បងប្អូនប្រជាពលរដ្ឋដែលកំពុងភៀសសឹកនៅភូមិរង់ចាំ។

ជាមួយគ្នានេះ ឯកឧត្តម ហ៊ុន ម៉ានី បានសម្ដែងនូវសេចក្ដីសោមនស្សរីករាយ និងថ្លែងអំណរគុណចំពោះរដ្ឋបាលខេត្តកណ្ដាល ដែលបានសហការគាំទ្រ និងរៀបចំព្រឹត្តិការណ៍ដ៏មានអត្ថន័យនេះឡើង។

ឯកឧត្តមបានគូសរំលេចថា ការប្រកួតនេះ មិនត្រឹមតែជាការជួបជុំដើម្បីបង្កើនចំណងមិត្តភាពតាមរយៈវិស័យកីឡាប៉ុណ្ណោះទេ ប៉ុន្តែថែមទាំងជាសកម្មភាពមនុស្សធម៌ ដែលបង្ហាញពីស្មារតីសាមគ្គីភាព ការយកចិត្តទុកដាក់ និងការចែករំលែកក្តីស្រឡាញ់ជូនប្រជាពលរដ្ឋដែលកំពុងជួបការលំបាក។

ឯកឧត្តមក៏បានអំពាវនាវដល់ប្រជាពលរដ្ឋទាំងអស់ បន្តរក្សាស្មារតីសាមគ្គីភាព និងការគាំទ្រយ៉ាងសកម្ម ដោយចូលរួមផ្តល់កម្លាំងចិត្ត និងការគាំទ្រដល់កងកម្លាំងប្រដាប់អាវុធដែលកំពុងបំពេញបេសកកម្មការពារជាតិ និងបូរណភាពទឹកដី។

ព្រឹត្តិការណ៍នេះបានបង្ហាញយ៉ាងច្បាស់ថា កីឡាមិនត្រឹមតែជាការប្រកួតប្រជែងប៉ុណ្ណោះទេ ប៉ុន្តែអាចក្លាយជាស្ពានភ្ជាប់បេះដូងមនុស្ស បង្កើតសាមគ្គីភាព និងបំផុសស្មារតីចែករំលែកក្នុងសង្គម៕