ឯកឧត្តម នាយឧត្តមសេនីយ៍ ឈន សារ៉ាណេ អញ្ជើញចូលជួបសម្តែងការគួរសម និងជូនពរសិរីមង្គលថ្នាក់ដឹកនាំជាន់ខ្ពស់គណបក្សប្រជាជនកម្ពុជា

(ភ្នំពេញ)៖ កាលពីពេលថ្មីៗកន្លងទៅនេះ ឯកឧត្តម នាយឧត្តមសេនីយ៍ ឈន សារ៉ាណេ អនុរដ្ឋលេខាធិការក្រសួងមហាផ្ទៃ បានអញ្ជើញទៅកាន់ទីស្នាក់ការកណ្តាលគណបក្សប្រជាជនកម្ពុជា (គ៨៥) ដើម្បីចូលជួបសម្តែងការគួរសម និងនាំយកនូវសេចក្តីគោរពដ៏ខ្ពង់ខ្ពស់ ព្រមទាំងជូនពរសិរីមង្គលជូនថ្នាក់ដឹកនាំជាន់ខ្ពស់នៃគណបក្សប្រជាជនកម្ពុជា ដែលបាននិងកំពុងបំពេញបេសកកម្មដ៏ឧត្តុង្គឧត្តមក្នុងបុព្វហេតុបម្រើជាតិ មាតុភូមិ និងប្រជាជនកម្ពុជា។នេះបើយោងតាមការបង្ហោះសារនៅលើទំព័រហ្វេសប៊ុកផ្ទាល់ខ្លួនរបស់ឯកឧត្តម នាយឧត្តមសេនីយ៍ ឈន សារ៉ាណេ ដែលបណ្ដាញសារព័ត៌មាន The Mirror News ទទួលបានៅថ្ងៃទី៦ ខែមិថុនា ឆ្នាំ២០២៦នេះ។

ក្នុងឱកាសដ៏មានអត្ថន័យនេះ ឯកឧត្តម នាយឧត្តមសេនីយ៍ ឈន សារ៉ាណេ បានអញ្ជើញចូលជួបសម្តែងការគួរសម និងគោរពជូនពរចំពោះ សម្តេចវិបុលសេនាភក្តី សាយ ឈុំ អនុប្រធានគណបក្ស និងជាប្រធានគណៈប្រចាំការនៃគណៈអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា ព្រមទាំងឯកឧត្តម សោម សឿន សមាជិកគណៈអចិន្ត្រៃយ៍ និងជាប្រធានគណៈចាត់តាំងនៃគណៈកម្មាធិការកណ្តាលគណបក្សប្រជាជនកម្ពុជា និងឯកឧត្តម តាក ស៊ុនអ៊ី សមាជិកគណៈអចិន្ត្រៃយ៍ និងជាប្រធានគណៈឃោសនាអប់រំនៃគណៈកម្មាធិការកណ្តាលគណបក្សប្រជាជនកម្ពុជា។

ឯកឧត្តម នាយឧត្តមសេនីយ៍ ឈន សារ៉ាណេ បានសម្តែងនូវការគោរព កោតសរសើរ និងវាយតម្លៃខ្ពស់ចំពោះថ្នាក់ដឹកនាំជាន់ខ្ពស់ទាំងអស់ ដែលបានលះបង់កម្លាំងកាយចិត្ត ប្រាជ្ញាស្មារតី និងបទពិសោធន៍ដ៏សម្បូរបែប ក្នុងការចូលរួមថែរក្សាសន្តិភាព ស្ថិរភាពនយោបាយ សន្តិសុខសង្គម និងជំរុញការអភិវឌ្ឍប្រទេសជាតិឱ្យមានការរីកចម្រើនជាបន្តបន្ទាប់លើគ្រប់វិស័យ។

ជាមួយគ្នានេះ ឯកឧត្តមក៏បានបួងសួង និងគោរពជូនពរសិរីមង្គលដ៏ប្រសើរបំផុត ជូនចំពោះសម្តេចវិបុលសេនាភក្តី សាយ ឈុំ និងឯកឧត្តមទាំងពីរ សូមទទួលបាននូវសុខភាពល្អបរិបូរណ៍ កម្លាំងមាំមួន ប្រាជ្ញាឈ្លាសវៃ ជន្មាយុយឺនយូរ សុភមង្គលក្នុងក្រុមគ្រួសារ និងទទួលបានជោគជ័យថ្មីៗបន្ថែមទៀតក្នុងបេសកកម្មដឹកនាំ និងបម្រើប្រទេសជាតិ។

ក្នុងន័យដ៏ថ្លៃថ្លានេះ ឯកឧត្តម នាយឧត្តមសេនីយ៍ ឈន សារ៉ាណេ សូមបួងសួងដល់វត្ថុស័ក្តិសិទ្ធិក្នុងលោក និងគុណបុណ្យព្រះរតនត្រ័យ តាមជួយថែរក្សា ប្រោះព្រំប្រសិទ្ធពរជ័យ ជូនសម្តេចវិបុលសេនាភក្តី សាយ ឈុំ និងឯកឧត្តមទាំងពីរ សូមបានប្រកបដោយពុទ្ធពរទាំង៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ និងសូមសម្រេចបាននូវគ្រប់ភារកិច្ចដ៏ឧត្តុង្គឧត្តម ដើម្បីបន្តរួមចំណែកក្នុងការដឹកនាំ កសាង និងអភិវឌ្ឍន៍ព្រះរាជាណាចក្រកម្ពុជាឱ្យកាន់តែរីកចម្រើន រុងរឿង និងសម្បូរសប្បាយជានិរន្តរ៍៕