ឯកឧត្តម ផន រឹម៖ គម្រោងប្រព័ន្ធប្រព្រឹត្តកម្មទឹកកខ្វក់ក្រុងតាខ្មៅ សម្រេចបានជាង៣២% ខណៈរាជរដ្ឋាភិបាលបន្តជំរុញការអភិវឌ្ឍហេដ្ឋារចនាសម្ព័ន្ធដើម្បីលើកកម្ពស់គុណភាពជីវិតប្រជាពលរដ្ឋ

(កណ្ដាល)៖ ឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូន បានលើកឡើងតាមរយៈបណ្ដាញសង្គមហ្វេសប៊ុក នាព្រឹកថ្ងៃទី៣ ខែមិថុនា ឆ្នាំ២០២៦ ថា គម្រោងអភិវឌ្ឍន៍ធំៗជាច្រើនដែលកំពុងដំណើរការនាពេលបច្ចុប្បន្ន គឺជាសក្ខីភាពបង្ហាញយ៉ាងច្បាស់ពីការយកចិត្តទុកដាក់ និងការខិតខំប្រឹងប្រែងឥតឈប់ឈររបស់រាជរដ្ឋាភិបាល ក្រោមការដឹកនាំដ៏ឈ្លាសវៃ និងម៉ឺងម៉ាត់របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា តាមរយៈក្រសួងសាធារណការ និងដឹកជញ្ជូន ជាសេនាធិការក្នុងការអនុវត្តគោលនយោបាយអភិវឌ្ឍន៍ជាតិ។

ឯកឧត្តមបានគូសបញ្ជាក់ថា ក្នុងចំណោមគម្រោងអាទិភាពទាំងនោះ គម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់ក្នុងក្រុងតាខ្មៅ ខេត្តកណ្ដាល ត្រូវបានចាត់ទុកថាជាគម្រោងយុទ្ធសាស្ត្រដ៏សំខាន់មួយ ដែលមានគោលដៅបម្រើដល់សេចក្ដីត្រូវការ និងផលប្រយោជន៍រយៈពេលវែងរបស់ប្រជាពលរដ្ឋ ព្រមទាំងរួមចំណែកដោះស្រាយបញ្ហាបរិស្ថាន បញ្ហាទឹកជំនន់ និងការគ្រប់គ្រងកាកសំណល់រាវក្នុងតំបន់ក្រុងតាខ្មៅឱ្យកាន់តែមានប្រសិទ្ធភាព។

ជាមួយគ្នានេះ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់ក្រុងតាខ្មៅ បានដឹកនាំក្រុមការងារបច្ចេកទេសចុះត្រួតពិនិត្យ និងតាមដានវឌ្ឍនភាពការងារជាប្រចាំ ដើម្បីធានាថាការអនុវត្តគម្រោងប្រព្រឹត្តទៅតាមផែនការ ស្តង់ដារបច្ចេកទេស និងកាលកំណត់ដែលបានគ្រោងទុក។

អ្នកនាំពាក្យក្រសួងសាធារណការ និងដឹកជញ្ជូន បានទទួលស្គាល់ថា ការអនុវត្តគម្រោងហេដ្ឋារចនាសម្ព័ន្ធទ្រង់ទ្រាយធំបែបនេះ ជៀសមិនផុតពីផលប៉ះពាល់មួយចំនួនដល់ការរស់នៅ និងការធ្វើដំណើររបស់ប្រជាពលរដ្ឋនោះទេ ប៉ុន្តែក្រុមការងារបាននិងកំពុងខិតខំប្រឹងប្រែងយ៉ាងខ្លាំង ដើម្បីកាត់បន្ថយផលប៉ះពាល់ទាំងនោះឱ្យស្ថិតក្នុងកម្រិតអប្បបរមាបំផុត។

បើតាមការបញ្ជាក់របស់ក្រសួង គម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់ក្រុងតាខ្មៅ ត្រូវបានបែងចែកជាពីរផ្នែកសំខាន់ៗ រួមមាន៖
*ទី១៖ ការសាងសង់ប្រព័ន្ធប្រព្រឹត្តកម្មទឹកកខ្វក់ ដោយរួមមានការសាងសង់ស្ថានីយប្រព្រឹត្តកម្មទឹកកខ្វក់តាមវិធីសាស្ត្រអាងចម្រោះបែបធម្មជាតិ (Waste Stabilization Pond) ស្ថានីយបូមទឹកកខ្វក់ចំនួន ៧កន្លែង បណ្តាញលូទឹកកខ្វក់ប្រវែងសរុប ១២៥,៣គីឡូម៉ែត្រ និងការតភ្ជាប់ប្រព័ន្ធលូពីលំនៅឋានប្រជាពលរដ្ឋចូលទៅក្នុងប្រព័ន្ធប្រព្រឹត្តកម្មទឹកកខ្វក់។
*ទី២៖ ការសាងសង់ប្រព័ន្ធរំដោះទឹកជំនន់ រួមមានការដាក់បណ្តាញលូប្រអប់ និងលូមូលតាមបណ្តោយផ្លូវជាតិលេខ២១ ចាប់ពីរង្វង់មូលតាខ្មៅ ប្រវែងប្រមាណ ៥គីឡូម៉ែត្រ ព្រមទាំងការសាងសង់ និងស្តារស្ថានីយបូមទឹក ក៏ដូចជាបណ្តាញលូរំដោះទឹកភ្លៀងក្នុងក្រុងតាខ្មៅទាំងមូល។

គួរបញ្ជាក់ថា គិតត្រឹមដំណាច់ខែឧសភា ឆ្នាំ២០២៦ គម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់ក្រុងតាខ្មៅ សម្រេចលទ្ធផលជារួមបាន ៣២,៦៤ភាគរយ ហើយ ខណៈគម្រោងទាំងមូលត្រូវបានគ្រោងបញ្ចប់នៅក្នុងអំឡុងឆ្នាំ២០២៨ខាងមុខ។

គម្រោងនេះត្រូវបានគេរំពឹងថា នឹងក្លាយជាសមិទ្ធផលដ៏មានសារៈសំខាន់មួយក្នុងការលើកកម្ពស់អនាម័យ បរិស្ថាន ការគ្រប់គ្រងទឹកកខ្វក់ និងការរំដោះទឹកជំនន់ក្នុងក្រុងតាខ្មៅ ដែលជាទីក្រុងកំពុងមានការរីកចម្រើនយ៉ាងឆាប់រហ័ស ស្របតាមទិសដៅអភិវឌ្ឍន៍ទីក្រុងប្រកបដោយចីរភាពរបស់រាជរដ្ឋាភិបាល។

ក្រសួងសាធារណការ និងដឹកជញ្ជូន ក៏បានថ្លែងអំណរគុណចំពោះការយោគយល់ ការគាំទ្រ និងការអធ្យាស្រ័យពីសំណាក់បងប្អូនប្រជាពលរដ្ឋ ចំពោះផលប៉ះពាល់បណ្តោះអាសន្នដែលអាចកើតមានក្នុងអំឡុងពេលអនុវត្តគម្រោងនេះផងដែរ៕