អនុវត្តបទបញ្ជាយ៉ាងម៉ឺងម៉ាត់! អាជ្ញាធរស្រុកលើកដែក បន្តចុះត្រួតពិនិត្យបន្ទប់ជួល និងផ្ទះសំណាក់ ទប់ស្កាត់បទល្មើសគ្រប់ប្រភេទ ពិសេស Online Scams

(កណ្ដាល)៖ អនុវត្តតាមប្រសាសន៍ណែនាំ និងបទបញ្ជាយ៉ាងម៉ឺងម៉ាត់របស់ ឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល និងជាប្រធានគណៈបញ្ជាការឯកភាពរដ្ឋបាលខេត្តកណ្ដាល កម្លាំងគណៈបញ្ជាការឯកភាពរដ្ឋបាលស្រុកលើកដែក ដឹកនាំដោយលោក ចាប ច័ន្ទវិទ្យា អភិបាល នៃគណៈអភិបាលស្រុក រួមជាមួយលោកអភិបាលរងស្រុក និងកម្លាំងពាក់ព័ន្ធ បានចុះអនុវត្តការត្រួតពិនិត្យរដ្ឋបាលចំហរ តាមទីតាំងបន្ទប់ជួល និងផ្ទះសំណាក់នានា ក្នុងភូមិសាស្ត្រស្រុកលើកដែក។

ប្រតិបត្តិការនេះ ធ្វើឡើងក្នុងគោលបំណងពិនិត្យ និងផ្ទៀងផ្ទាត់ការស្នាក់នៅរបស់ប្រជាពលរដ្ឋ និងជនបរទេស សំដៅធានាឱ្យបាននូវសន្តិសុខ សុវត្ថិភាព និងសណ្ដាប់ធ្នាប់សាធារណៈក្នុងមូលដ្ឋាន ព្រមទាំងទប់ស្កាត់ និងបង្ការរាល់សកម្មភាពខុសច្បាប់ដែលអាចកើតមាន ជាពិសេសការយកទីតាំងស្នាក់នៅទៅប្រើប្រាស់សម្រាប់ប្រព្រឹត្តបទល្មើសបច្ចេកវិទ្យា ឬ Online Scams ដែលកំពុងជាបញ្ហាប្រឈមមួយនៅតាមតំបន់មួយចំនួន។

លោក ចាប ច័ន្ទវិទ្យា ក៏បានអំពាវនាវដល់បងប្អូនប្រជាពលរដ្ឋទាំងអស់ ចូលរួមសហការជាមួយសមត្ថកិច្ច ដោយផ្តល់ព័ត៌មានភ្លាមៗ ប្រសិនបើមានការសង្ស័យលើទីតាំង ឬក្រុមមនុស្សណាមួយដែលមានសកម្មភាពប្រមូលផ្ដុំខុសប្រក្រតី ឬជាប់ពាក់ព័ន្ធនឹងការប្រព្រឹត្តបទល្មើសនានា ដើម្បីឱ្យអាជ្ញាធរ និងសមត្ថកិច្ចមានលទ្ធភាពចុះត្រួតពិនិត្យ ស្រាវជ្រាវ និងបង្ក្រាបបានទាន់ពេលវេលា។

ជាមួយគ្នានេះ អាជ្ញាធរបានបញ្ជាក់ថា ប្រជាពលរដ្ឋអាចរាយការណ៍ព័ត៌មាន ឬទីតាំងគួរឱ្យសង្ស័យ តាមរយៈលេខទូរស័ព្ទ 097 396 0699 ដោយសមត្ថកិច្ចធានារក្សាការសម្ងាត់ជូនម្ចាស់ព័ត៌មានយ៉ាងតឹងរ៉ឹង ដើម្បីរួមគ្នាកសាងមូលដ្ឋានឱ្យមានសុវត្ថិភាព និងគ្មានបទល្មើស៕