លោករដ្ឋមន្ត្រី ប៉េង ពោធិ៍នា បានណែនាំរួចហើយ ជុំវិញពាក្យសម្ដីអសុរោះរបស់ប្រធានមន្ទីរសាធារណការ ខេត្តឧត្តរមានជ័យ

(ភ្នំពេញ)៖ បន្ទាប់ពីមានករណីបែកធ្លាយសារសំឡេងរបស់លោក ឈឿង ផល្លាង ប្រធានមន្ទីរសាធារណការ និងដឹកជញ្ជូនខេត្តឧត្តរមានជ័យ ដែលមានខ្លឹមសារបញ្ជាឲ្យមន្ត្រីក្រោមឱវាទស្រាវជ្រាវរកអ្នកផ្តល់ព័ត៌មានទៅអ្នកសារព័ត៌មាន ដើម្បីចាត់វិធានការតាម «ផ្លូវងងឹត» នោះ ត្រូវបានថ្នាក់ដឹកនាំក្រសួងធ្វើការណែនាំរួចហើយ។ នេះបើយោងតាមប្រភពដែលបណ្ដាញសារព័ត៌មាន The Mirror News ទទួលបាននៅថ្ងៃទី២៦ ខែឧសភា ឆ្នាំ២០២៦នេះ។

ពាក់ព័ន្ធករណីនេះ លោក ផន រឹម អនុរដ្ឋលេខាធិការ និងជាអ្នកនាំពាក្យក្រសួងសាធារណការ និងដឹកជញ្ជូនបានបញ្ជាក់ឱ្យបណ្ដាញសារព័ត៌មាន The Mirror News នៅព្រឹកថ្ងៃទី២៦ ខែឧសភានេះ ថា សារសំឡេងដែលកំពុងត្រូវបានចែកចាយលើបណ្ដាញសង្គមនាពេលនេះ គឺជារឿងចាស់កាលពីប៉ុន្មានឆ្នាំមុន ប៉ុន្តែទោះជាយ៉ាងណា ឯកឧត្តមរដ្ឋមន្ត្រី ប៉េង ពោធិ៍នា បានធ្វើការណែនាំរួចហើយតាំងពីដើមអាណត្តិ ពាក់ព័ន្ធនឹងឥរិយាបថ ការប្រើប្រាស់ពាក្យសម្ដី និងក្រមសីលធម៌ក្នុងការដឹកនាំមន្ត្រីរាជការ។

អ្នកនាំពាក្យរូបនេះបានបញ្ជាក់ទៀតថា លោកប្រធានមន្ទីរ បានទទួលស្គាល់ថា សំឡេងក្នុងឃ្លីបនោះពិតជាសំឡេងរបស់ខ្លួនប្រាកដមែន ហើយនៅពេលនោះ គឺស្ថិតក្នុងស្ថានភាពកំហឹងមួយឆាវពាក់ព័ន្ធនឹងបញ្ហាផ្ទៃក្នុងមន្ទីរ។ ទោះបីជាយ៉ាងណា ថ្នាក់ដឹកនាំក្រសួងបានធ្វើការណែនាំ និងក្រើនរំលឹកជាច្រើនលើក ជាពិសេសពាក់ព័ន្ធនឹងការប្រើប្រាស់ពាក្យសម្ដីដែលអាចប៉ះពាល់ដល់កិត្តិយសស្ថាប័ន និងបរិយាកាសការងារ។

គួររំលឹកថា ករណីបែកធ្លាយសារសំឡេងរបស់លោក ឈឿង ផល្លាង កាលពីពេលកន្លងទៅ បានបង្កឲ្យមានការរិះគន់យ៉ាងខ្លាំងពីមជ្ឈដ្ឋានមន្ត្រី និងមហាជន ខណៈមានការលើកឡើងអំពីបញ្ហាអំពើពុករលួយ បក្សពួកនិយម និងការគ្រប់គ្រងផ្ទៃក្នុងមន្ទីរដែលត្រូវបានចោទប្រកាន់ថា ខ្វះតម្លាភាព។

ប្រភពមួយចំនួនក៏បានលើកឡើងផងដែរថា មានការរៀបចំផែនការផ្ទេរតំណែងប្រធានមន្ទីរទៅឲ្យកូនប្រសារ បន្ទាប់ពីលោកចូលនិវត្តន៍ ប៉ុន្តែមកដល់ពេលនេះ មិនទាន់មានការសម្រេចជាផ្លូវការណាមួយនៅឡើយទេ។

ទោះបីជាសារសំឡេង និងការរិះគន់ពាក់ព័ន្ធនឹងការដឹកនាំក្នុងមន្ទីរសាធារណការ និងដឹកជញ្ជូនខេត្តឧត្តរមានជ័យ ត្រូវបានលេចធ្លាយជាយូរឆ្នាំមកហើយក្តី ក៏លោក ឈឿង ផល្លាង នៅតែបន្តកាន់តំណែងយ៉ាងរឹងមាំរហូតមកដល់បច្ចុប្បន្ន។ ស្របពេលជាមួយគ្នានេះ ក៏មានមន្ត្រីមួយចំនួនបង្ហាញការព្រួយបារម្ភអំពីបរិយាកាសការងារ និងសម្ពាធផ្ទៃក្នុង ដែលពួកគេអះអាងថា នៅតែបន្តកើតមានជាបន្តបន្ទាប់៕