អាជ្ញាធរខេត្តកណ្ដាល ពង្រឹងការអនុវត្តច្បាប់ពាក់ព័ន្ធជនបរទេសអន្តោប្រវេសន្ត និងអត្រានុកូលដ្ឋាន

(កណ្ដាល)៖ នៅព្រឹកថ្ងៃទី២២ ខែឧសភា ឆ្នាំ២០២៦ អគ្គនាយកដ្ឋានអន្តោប្រវេសន្ត បានរៀបចំកិច្ចប្រជុំផ្សព្វផ្សាយប្រកាសលេខ ១២៦៤៤ របស់ក្រសួងមហាផ្ទៃ ស្តីពីបែបបទ និងនីតិវិធីនៃការស្នើសុំបញ្ចូលកូនជនបរទេសអន្តោប្រវេសន្តដែលកើតថ្មី នៅក្នុងតារាងឧបសម្ព័ន្ធ និងស្នើសុំប្រកាសទទួលស្គាល់ជាជនបរទេសអន្តោប្រវេសន្ត ចំពោះកូនអាយុ១៨ឆ្នាំឡើង ដែលមានឈ្មោះក្នុងតារាងឧបសម្ព័ន្ធឪពុក ឬម្ដាយជាជនបរទេសអន្តោប្រវេសន្ត។

ពិធីនេះប្រព្រឹត្តទៅក្រោមអធិបតីភាព ឯកឧត្តម ណុប ដារ៉ា អភិបាលរងខេត្តកណ្ដាល និងឯកឧត្តមឧត្តមសេនីយ៍ទោ សួន សុជាតិ ប្រធាននាយកដ្ឋានជនបរទេស អន្តោប្រវេសន្ត និងជនភៀសខ្លួន នៃអគ្គនាយកដ្ឋានអន្តោប្រវេសន្ត ក្រសួងមហាផ្ទៃ ដោយមានការចូលរួមពីរដ្ឋបាលក្រុង-ស្រុកទាំង១៣ មេឃុំ ចៅសង្កាត់ និងនាយប៉ុស្តិ៍នគរបាលរដ្ឋបាលទូទាំងខេត្តកណ្ដាលផងដែរ។

ឯកឧត្តមឧត្តមសេនីយ៍ទោ សួន សុជាតិ បានមានប្រសាសន៍ថា កន្លងមក ក្រសួងមហាផ្ទៃបានសង្កេតឃើញថា អាជ្ញាធរមូលដ្ឋានមួយចំនួននៅមានភាពស្រពិចស្រពិលចំពោះគោលការណ៍ច្បាប់ ដែលបណ្ដាលឲ្យមានការស្ទាក់ស្ទើរក្នុងការចេញលិខិតរដ្ឋបាល ឬលិខិតអត្រានុកូលដ្ឋាន ជូនដល់សហព័ទ្ធជាខ្មែរ កូន និងជនបរទេសអន្តោប្រវេសន្ត ដែលត្រូវបានដកហូតឯកសាររដ្ឋបាលកម្ពុជាមិនប្រក្រតី ឬត្រូវបានក្រសួងមហាផ្ទៃទទួលស្គាល់ជាជនបរទេសអន្តោប្រវេសន្តរួចហើយ។

ឯកឧត្តមប្រធាននាយកដ្ឋាន បានបញ្ជាក់បន្ថែមថា ដើម្បីលើកកម្ពស់ប្រសិទ្ធភាពនៃការផ្តល់សេវារដ្ឋបាល និងឆ្លើយតបទៅនឹងតម្រូវការចាំបាច់របស់ប្រជាពលរដ្ឋ និងជនបរទេសអន្តោប្រវេសន្ត ក្រសួងមហាផ្ទៃបានណែនាំដល់រដ្ឋបាលថ្នាក់ក្រោមជាតិ និងសមត្ថកិច្ចពាក់ព័ន្ធឲ្យអនុវត្តយ៉ាងម៉ឺងម៉ាត់នូវបែបបទ និងនីតិវិធីជាធរមាន។

ក្នុងនោះ រួមមានការផ្តល់សំបុត្រកំណើត សេចក្តីចម្លងសំបុត្រកំណើត សៀវភៅស្នាក់នៅ (ក២) សៀវភៅគ្រួសារ (ក៤) និងឯកសាររដ្ឋបាលផ្សេងៗ ដល់គ្រួសារជាខ្មែរ និងជនបរទេសដែលមានប័ណ្ណស្នាក់នៅអចិន្ត្រៃយ៍ ស្របតាមច្បាប់ និងគតិយុត្តជាធរមាន។

ដោយឡែក ឯកឧត្តម ណុប ដារ៉ា អភិបាលរងខេត្តកណ្ដាល បានស្នើដល់អាជ្ញាធរ និងកងកម្លាំងពាក់ព័ន្ធ ជាពិសេសមេឃុំ ចៅសង្កាត់ ស្មៀន និងនាយប៉ុស្តិ៍នគរបាលរដ្ឋបាល ត្រូវយកចិត្តទុកដាក់ស្ដាប់ និងសិក្សាខ្លឹមសារបច្ចេកទេសផ្លូវច្បាប់ឲ្យបានច្បាស់ ដើម្បីអនុវត្តការងារឲ្យមានប្រសិទ្ធភាព និងត្រឹមត្រូវតាមនីតិវិធី។

ឯកឧត្តមអភិបាលរងខេត្ត ក៏បានណែនាំឲ្យពង្រឹងការពិនិត្យភស្តុតាង និងឯកសារពាក់ព័ន្ធឲ្យបានម៉ឺងម៉ាត់ ក្នុងការចុះបញ្ជីអត្រានុកូលដ្ឋាន ឬបញ្ចូលឈ្មោះកូនជនបរទេសក្នុងតារាងឧបសម្ព័ន្ធ ដោយហាមដាច់ខាតការយោគយល់មនោសញ្ចេតនា ដែលអាចនាំឲ្យមានការចេញសំបុត្រកំណើតខ្មែរខុសច្បាប់។

ជាមួយគ្នានេះ ឯកឧត្តមក៏បានជំរុញឲ្យអាជ្ញាធរគ្រប់លំដាប់ថ្នាក់ បន្តពង្រឹងស្មារតីសហការ និងការទទួលខុសត្រូវខ្ពស់ ក្នុងការគ្រប់គ្រង និងតាមដានវត្តមានជនបរទេសនៅតាមមូលដ្ឋានឲ្យបានហ្មត់ចត់ ដោយបញ្ជាក់ថា មន្ត្រីណាដែលប្រព្រឹត្តខុស ឬមានចេតនាបំភ័ន្តឯកសារ នឹងត្រូវទទួលខុសត្រូវចំពោះមុខច្បាប់ជាធរមាន៕