ឯកឧត្ដម ណុប តារា បន្តដឹកនាំកម្លាំងចុះរៀបចំសណ្តាប់ធ្នាប់សាធារណៈនៅក្រុងតាខ្មៅ ព្រមានចាត់វិធានការច្បាប់ចំពោះអ្នករឹងទទឹងរំលោភចំណីផ្លូវ

(កណ្តាល)៖ អាជ្ញាធរខេត្តកណ្តាល សហការជាមួយរដ្ឋបាលក្រុងតាខ្មៅ និងកម្លាំងសមត្ថកិច្ចពាក់ព័ន្ធ បន្តបើកយុទ្ធនាការចុះត្រួតពិនិត្យ ណែនាំ និងអនុវត្តវិធានការរៀបចំសណ្តាប់ធ្នាប់សាធារណៈ នៅតាមបណ្តាផ្លូវសំខាន់ៗក្នុងភូមិសាស្ត្រក្រុងតាខ្មៅ ដោយផ្តោតលើការរុះរើសំណង់រឹង សំយាប តូបលក់ដូរ ផ្ទាំងប៉ាណូ និងស្លាកផ្សព្វផ្សាយពាណិជ្ជកម្ម ដែលសាងសង់រំលោភលើចំណីផ្លូវសាធារណៈ ដើម្បីលើកកម្ពស់សោភ័ណភាពទីក្រុង សុវត្ថិភាពសាធារណៈ និងកាត់បន្ថយការកកស្ទះចរាចរណ៍។

ប្រតិបត្តិការនារសៀលថ្ងៃទី២០ ខែឧសភា ឆ្នាំ២០២៦នេះ ដឹកនាំដោយឯកឧត្តម ណុប ដារ៉ា អភិបាលរងខេត្តកណ្តាល ដោយមានការចូលរួមពីរដ្ឋបាលក្រុង កម្លាំងនគរបាល និងមន្ត្រីជំនាញពាក់ព័ន្ធជាច្រើនរូប ខណៈអាជ្ញាធរបានបង្ហាញជំហរម៉ឺងម៉ាត់ថា ការរៀបចំសណ្តាប់ធ្នាប់មិនមែនអនុវត្តតែមួយពេលមួយគ្រានោះទេ ប៉ុន្តែនឹងបន្តអនុវត្តជាប្រចាំ “ដូចភ្លៀងរលឹម” ដើម្បីទប់ស្កាត់ភាពអនាធិបតេយ្យលើដងផ្លូវសាធារណៈ។

ឯកឧត្តមអភិបាលរងខេត្ត បានបញ្ជាក់ថា អាជ្ញាធរមិនមានបំណងរារាំងការប្រកបអាជីវកម្មរបស់ប្រជាពលរដ្ឋឡើយ ប៉ុន្តែគ្រប់សកម្មភាពអាជីវកម្មទាំងអស់ ត្រូវគោរពតាមច្បាប់ និងមិនត្រូវរំលោភយកទ្រព្យសម្បត្តិសាធារណៈ ឬបង្កការលំបាកដល់អ្នកប្រើប្រាស់ផ្លូវ និងសាធារណជននោះទេ។

ជាមួយគ្នានេះ ប្រជាពលរដ្ឋ និងអ្នកធ្វើដំណើរជាច្រើន បានសម្តែងការគាំទ្រយ៉ាងពេញទំហឹងចំពោះវិធានការរបស់អាជ្ញាធរ ដោយចាត់ទុកថា ជាចំណាត់ការចាំបាច់ក្នុងការរៀបចំរបៀបរៀបរយទីក្រុង និងស្តារសោភ័ណភាពសាធារណៈឡើងវិញ។ ពលរដ្ឋក៏បានសំណូមពរឱ្យអាជ្ញាធរបន្តអនុវត្តវិធានការនេះឱ្យបានជាប់លាប់ និងស្មើភាពគ្នាគ្រប់ទីកន្លែង ដើម្បីកុំឱ្យមានការរំលោភចំណីផ្លូវកើតឡើងសារជាថ្មី។

គួររំលឹកថា មកទល់ថ្ងៃទី២០ ខែឧសភា ឆ្នាំ២០២៦នេះ រដ្ឋបាលខេត្តកណ្តាល បានចេញសេចក្តីជូនដំណឹងរហូតដល់៣លើករួចមកហើយ ស្តីពីការអនុវត្តវិធានការរដ្ឋបាលរុះរើសំណង់រឹង ផ្ទាំងប៉ាណូ និងស្លាកផ្សាយពាណិជ្ជកម្មគ្មានច្បាប់អនុញ្ញាត ដែលស្ថិតនៅលើដីចំណីផ្លូវសាធារណៈក្នុងភូមិសាស្ត្រខេត្តកណ្តាល ព្រមទាំងបានព្រមានធ្ងន់ៗថា ចំពោះបុគ្គល ឬអាជីវករណាដែលនៅតែរឹងទទឹង មិនព្រមអនុវត្តតាមការណែនាំ អាជ្ញាធរនឹងចាត់វិធានការរដ្ឋបាល និងវិធានការច្បាប់ដោយមិនលើកលែង។

យោងតាមច្បាប់ស្តីពីផ្លូវថ្នល់ ចុះថ្ងៃទី០៨ ខែឧសភា ឆ្នាំ២០១៨ មាត្រា៧១ បានកំណត់ថា ជនណាដែលសាងសង់សំណង់រឹងមាំដោយខុសច្បាប់លើដីសម្រាប់អភិវឌ្ឍហេដ្ឋារចនាសម្ព័ន្ធផ្លូវថ្នល់ ត្រូវទទួលការព្រមាន និងតម្រូវឱ្យរុះរើចេញ។ ក្នុងករណីរឹងទទឹង អាចប្រឈមការផ្តន្ទាទោសដាក់ពន្ធនាគារពី១ខែ ដល់១ឆ្នាំ និងពិន័យជាប្រាក់ពី១០ម៉ឺនរៀល ដល់២លានរៀល។ ដោយឡែក មាត្រា៧៨ ក៏បានចែងថា ជនណាដែលទន្ទ្រាន ឬប្រើប្រាស់ដីចំណីផ្លូវដោយខុសច្បាប់ អាចត្រូវពិន័យ និងបង្ខំឱ្យរុះរើសំណង់ចេញ ហើយក្នុងករណីរឹងទទឹង អាចប្រឈមការជាប់ពន្ធនាគារពី៦ខែ ដល់២ឆ្នាំ និងពិន័យរហូតដល់៤លានរៀលផងដែរ។

រដ្ឋបាលខេត្តកណ្តាល ក៏បានអំពាវនាវដល់ប្រជាពលរដ្ឋ និងអាជីវករទាំងអស់ ចូលរួមសហការជាមួយអាជ្ញាធរ ដោយស្ម័គ្រចិត្តរុះរើសំណង់រំលោភចំណីផ្លូវ គោរពច្បាប់ចរាចរណ៍ និងរួមគ្នាថែរក្សាអនាម័យបរិស្ថាន ដើម្បីប្រែក្លាយក្រុងតាខ្មៅឱ្យក្លាយជាទីក្រុងមានសោភ័ណភាព សុវត្ថិភាព និងរបៀបរៀបរយ គួរជាទីមោទនៈសម្រាប់ប្រជាពលរដ្ឋគ្រប់រូប៕