ឯកឧត្តម ផន រឹម បញ្ជាក់ថា ការបញ្ចប់មុខតំណែងប្រធានស្ថានីយជញ្ជីងអចល័តថ្នល់ទទឹង ខេត្តត្បូងឃ្មុំ គឺជាការអនុវត្តនីតិវិធីជាធម្មតា តាមរយៈក្រុមប្រឹក្សាវិន័យរបស់ក្រសួង

(ភ្នំពេញ)៖ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានសម្រេចបញ្ចប់មុខតំណែងប្រធានស្ថានីយជញ្ជីងអចល័តថ្នល់ទទឹង ខេត្តត្បូងឃ្មុំ និងបង្វិលឱ្យមកបម្រើការងារនៅអង្គភាពដើមវិញ។ នេះបើតាមប្រកាសស្ដីពីការបញ្ចប់មុខតំណែងប្រធានស្ថានីយជញ្ជីងអចល័ត ថ្នល់ទទឹង​ ខេត្តត្បូងឃ្មុំ​ដែលបណ្ដាញាសារព័ត៌មាន The Mirror News ទទួលបាននៅថ្ងៃទី២០ ខែឧសភា ឆ្នាំ២០២៦នេះ។

ទាក់ទិននឹងករណីនេះ ឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូន បានបញ្ជាក់ឱ្យបណ្ដាញសារព័ត៌មាន The Mirror News ដឹងនៅរសៀលនេះថា ការសម្រេចខាងលើ គឺជាការអនុវត្តនីតិវិធីជាធម្មតា តាមរយៈក្រុមប្រឹក្សាវិន័យរបស់ក្រសួង។

ឯកឧត្តមអ្នកនាំពាក្យបានបន្ថែមថា វិធានការនេះត្រូវបានអនុវត្តស្របតាមនីតិវិធីរដ្ឋបាល លើករណីមន្ត្រីដែលអនុវត្តការងារមិនបានត្រឹមត្រូវ និងដើម្បីពង្រឹងវិន័យ សណ្តាប់ធ្នាប់ និងប្រសិទ្ធភាពក្នុងការបម្រើសេវាសាធារណៈ។

ក្រសួងសាធារណការ និងដឹកជញ្ជូន បានអះអាងថា នឹងបន្តពង្រឹងការត្រួតពិនិត្យ និងការអនុវត្តវិន័យក្នុងគ្រប់អង្គភាព ដើម្បីធានាឱ្យការបម្រើសេវាសាធារណៈមានតម្លាភាព ប្រសិទ្ធភាព និងទំនួលខុសត្រូវខ្ពស់៕