រដ្ឋមន្ត្រីក្រសួងព័ត៌មាន៖ Like, Share និង View មិនអាចលើសតម្លៃសីលធម៌ សច្ចធម៌ និងការទទួលខុសត្រូវចំពោះសង្គមបានឡើយ

(ភ្នំពេញ)៖ ឯកឧត្តម នេត្រ ភក្ក្រា រដ្ឋមន្ត្រីក្រសួងព័ត៌មាន បានគូសបញ្ជាក់ថា ចំនួន Like ចំនួន Share និងចំនួន View មិនអាចក្លាយជាគោលដៅសំខាន់ លើសពីតម្លៃសីលធម៌ សច្ចធម៌ សុចរិតភាព និងការទទួលខុសត្រូវចំពោះសង្គមបានឡើយ។

ការលើកឡើងនេះ បានធ្វើឡើងក្នុងឱកាសបិទសិក្ខាសាលាស្តីពី “រួមគ្នាលើកកម្ពស់សីលធម៌ តាមរយៈការផ្សព្វផ្សាយ” ដែលរៀបចំដោយក្រសួងព័ត៌មាន នៅទីស្តីការក្រសួងព័ត៌មាន នាព្រឹកថ្ងៃទី២០ ខែឧសភា ឆ្នាំ២០២៦។

ឯកឧត្តមរដ្ឋមន្ត្រីបានបន្តថា អ្នកសារព័ត៌មាន អ្នកផលិតមាតិកា ពិធីករ ពិធីការិនី និងអ្នកផ្សព្វផ្សាយពាណិជ្ជកម្ម ដែលមានវត្តមានលើប្រព័ន្ធផ្សព្វផ្សាយ និងបណ្តាញសង្គម មានឥទ្ធិពលយ៉ាងខ្លាំងលើការគិត ការយល់ឃើញ និងឥរិយាបថរបស់សាធារណជន ជាពិសេសយុវជន។

ដូច្នេះ មាតិកាដែលត្រូវផលិត និងផ្សព្វផ្សាយ គប្បីផ្អែកលើការពិត ភាពត្រឹមត្រូវ គុណធម៌ និងសីលធម៌ ព្រមទាំងគោរពតម្លៃមនុស្ស ដើម្បីធានាថា មិនត្រឹមតែទាក់ទាញការចាប់អារម្មណ៍ប៉ុណ្ណោះទេ ប៉ុន្តែថែមទាំងរួមចំណែកលើកកម្ពស់ចំណេះដឹង សេចក្តីថ្លៃថ្នូរ និងសាមគ្គីភាពក្នុងសង្គមផងដែរ។

ឯកឧត្តមបានគូសបញ្ជាក់ថា ការចុច Like មួយអាចបាត់បង់ត្រឹមពេលខ្លី ប៉ុន្តែឥទ្ធិពលអវិជ្ជមានពីមាតិកាខ្វះសីលធម៌ អាចបន្សល់ទុកផលប៉ះពាល់យូរអង្វែងដល់ការយល់ឃើញ និងគំនិតរបស់យុវជន និងសង្គមទាំងមូល។

ជាមួយគ្នានេះ ឯកឧត្តមរដ្ឋមន្ត្រីបានលើកឡើងថា សេរីភាពនៃការបញ្ចេញមតិ និងការផ្សព្វផ្សាយ គឺជាសិទ្ធិសំខាន់មួយ ប៉ុន្តែត្រូវដើរទន្ទឹមនឹងការទទួលខុសត្រូវ ការគោរពច្បាប់ និងការគោរពសីលធម៌សង្គម។ សេរីភាពដែលគ្មានការទទួលខុសត្រូវ អាចបង្កហានិភ័យដល់សង្គម និងតម្លៃវប្បធម៌ជាតិ។

ឯកឧត្តម នេត្រ ភក្ត្រា ក៏បានចាត់ទុកសិក្ខាសាលានេះថា មានសារៈសំខាន់ ក្នុងការផ្សព្វផ្សាយសេចក្តីណែនាំអន្តរក្រសួង ដើម្បីលើកកម្ពស់វប្បធម៌ ប្រពៃណី ទំនៀមទម្លាប់ និងសីលធម៌ខ្មែរ ព្រមទាំងការពារកិត្តិយស និងតម្លៃស្ត្រីក្នុងបរិបទឌីជីថល។

ឯកឧត្តមបានបន្ថែមថា ស្ត្រីខ្មែរមិនត្រឹមតែជាមាតា និងអ្នកអប់រំកូនចៅប៉ុណ្ណោះទេ ប៉ុន្តែជាកម្លាំងស្នូលក្នុងការអភិវឌ្ឍសេដ្ឋកិច្ច សង្គម និងវប្បធម៌ជាតិ។ ដូច្នេះ ការប្រើប្រាស់រូបភាពស្ត្រីក្នុងន័យបង្អាប់ បន្ថោកតម្លៃ ឬបម្រើមាតិកាអសីលធម៌ គឺជារឿងដែលមិនអាចទទួលយកបានឡើយ។

ឯកឧត្តមបានសង្កត់ធ្ងន់ថា ការគោរពស្ត្រី គឺជាការគោរពមាតា គោរពគ្រួសារ និងគោរពសង្គមទាំងមូល។ ស្ត្រីមិនគួរត្រូវបានយកទៅធ្វើជាឧបករណ៍សម្រាប់ទាក់ទាញការចាប់អារម្មណ៍ ឬផលប្រយោជន៍ពាណិជ្ជកម្មដែលបំពានលើសីលធម៌នោះឡើយ ខណៈសេចក្តីថ្លៃថ្នូររបស់ស្ត្រី គឺជាតម្លៃមនុស្ស និងជាតម្លៃជាតិដែលត្រូវការពារ និងលើកតម្កើងជានិច្ច៕