សម្តេចតេជោ ហ៊ុន សែន រំលឹកទិវាជាតិនៃការចងចាំ ២០ ឧសភា អំពាវនាវឱ្យរួមគ្នាការពារសន្តិភាព

(ភ្នំពេញ)៖ សម្តេចតេជោ ហ៊ុន សែន បានបង្ហោះសាររំលឹកក្នុងឱកាសទិវាជាតិនៃការចងចាំ ២០ ឧសភា ដោយបានលើកឡើងពីសោកនាដកម្មដ៏ឈឺចាប់ដែលប្រជាជនកម្ពុជាបានឆ្លងកាត់ក្រោមរបបកម្ពុជាប្រជាធិបតេយ្យ ឬរបបប្រល័យពូជសាសន៍ ប៉ុល ពត ក្នុងអំឡុងឆ្នាំ១៩៧៥ ដល់ឆ្នាំ១៩៧៩។

សម្តេចតេជោ បានគូសបញ្ជាក់ថា ថ្ងៃទី២០ ខែឧសភា គឺជាថ្ងៃដែលប្រជាជនកម្ពុជាមិនអាចបំភ្លេចបានឡើយ ព្រោះជារបបដ៏ឃោរឃៅ និងខ្មៅងងឹត ដែលបានធ្វើឱ្យប្រជាពលរដ្ឋរាប់លាននាក់ស្លាប់បាត់បង់ជីវិត និងទទួលរងទុក្ខវេទនាយ៉ាងធ្ងន់ធ្ងរ។

តាមរយៈសារនោះ សម្តេចតេជោ ក៏បានរំលឹកដល់ការកាប់សម្លាប់ ការបង្ខំជម្លៀសប្រជាពលរដ្ឋចេញពីលំនៅឋាន ការបង្ខំឱ្យធ្វើការហួសកម្លាំង ការខ្វះអាហារ ថ្នាំសង្កូវ និងការបាត់បង់សិទ្ធិសេរីភាព ដែលជាសោកនាដកម្មដ៏ជូរចត់មួយក្នុងប្រវត្តិសាស្ត្រកម្ពុជា។

ជាមួយគ្នានេះ សម្តេចតេជោ ហ៊ុន សែន បានអំពាវនាវដល់ប្រជាពលរដ្ឋខ្មែរគ្រប់រូប ឱ្យរួមគ្នាថែរក្សាការពារសន្តិភាពឱ្យបានគង់វង្ស ដើម្បីកុំឱ្យរបបប្រល័យពូជសាសន៍វិលត្រឡប់មកវិញ ព្រោះសន្តិភាពគឺជាមូលដ្ឋានដ៏សំខាន់សម្រាប់ការកសាងគ្រួសារ សហគមន៍ និងការអភិវឌ្ឍប្រទេសជាតិឱ្យកាន់តែរីកចម្រើនទៅមុខ៕