អភិបាលខេត្តកណ្ដាលដាក់បទបញ្ជាឱ្យអាជ្ញាធរមូលដ្ឋាន រៀបចំសណ្ដាប់ធ្នាប់ផ្លូវសាធារណៈឱ្យម៉ឺងម៉ាត់ ខណៈព្រមានមិនលើកលែងចំពោះ Scam Online

(កណ្ដាល)៖ ឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល បានជំរុញឱ្យអភិបាលក្រុង-ស្រុកទាំងអស់ ត្រូវពង្រឹងការរៀបចំសណ្ដាប់ធ្នាប់សាធារណៈតាមដងផ្លូវ ដោយអនុវត្តក្នុងលក្ខណៈ “ទន់ភ្លន់ ម៉ឺងម៉ាត់ មាត់ចត់ និងឆាប់រហ័ស” ដើម្បីលើកកម្ពស់សុវត្ថិភាព របៀបរៀបរយសាធារណៈ កាត់បន្ថយការកកស្ទះ និងទប់ស្កាត់គ្រោះថ្នាក់ចរាចរណ៍នៅក្នុងមូលដ្ឋាន។

ការណែនាំនេះ ត្រូវបានធ្វើឡើងក្នុងកិច្ចប្រជុំគណៈអភិបាលខេត្តកណ្ដាល ប្រចាំអឌ្ឍមាសទី១ ខែឧសភា ឆ្នាំ២០២៦ នាព្រឹកថ្ងៃទី១៩ ខែឧសភា ឆ្នាំ២០២៦ នៅសាលាខេត្តកណ្ដាល ដោយមានការចូលរួមពីអភិបាលរងខេត្ត កងកម្លាំងមានសមត្ថកិច្ច មន្ទីរជំនាញពាក់ព័ន្ធ និងអភិបាលក្រុង-ស្រុកទាំង១៣ តាមប្រព័ន្ធ Zoom Meeting។

ឯកឧត្តមអភិបាលខេត្ត បានលើកឡើងថា ករណីគ្រោះថ្នាក់ចរាចរណ៍ធ្ងន់ធ្ងរថ្មីៗនេះ មួយចំនួន កើតឡើងដោយសារការសាងសង់ ឬការលក់ដូររំលោភលើដីចិញ្ចើមផ្លូវ ដែលបង្កហានិភ័យដល់អ្នកធ្វើដំណើរ។ ដូច្នេះ អាជ្ញាធរមូលដ្ឋានត្រូវបន្តអប់រំ និងណែនាំប្រជាពលរដ្ឋឱ្យគោរពច្បាប់ មិនត្រូវសាងសង់ ឬប្រើប្រាស់ចំណីផ្លូវដោយខុសច្បាប់ឡើយ។

ឯកឧត្តមបញ្ជាក់ថា ការរៀបចំសណ្ដាប់ធ្នាប់មិនមែនជាការបង្កការលំបាកដល់ប្រជាពលរដ្ឋប្រកបអាជីវកម្មនោះទេ ប៉ុន្តែជាវិធានការការពារសុវត្ថិភាពអាយុជីវិត ទ្រព្យសម្បត្តិ និងសណ្ដាប់ធ្នាប់សង្គមទាំងមូល។

ក្នុងកិច្ចប្រជុំនោះដែរ ឯកឧត្តម គួច ចំរើន ក៏បានកោតសរសើរដល់កម្លាំងមានសមត្ថកិច្ច និងអាជ្ញាធរពាក់ព័ន្ធ ដែលបានចុះអនុវត្តវិធានការបង្ការ និងតាមដានសកម្មភាពសង្ស័យពាក់ព័ន្ធបទល្មើស Scam Online ជាបន្តបន្ទាប់ តាមរយៈការប្រើប្រាស់ជំនាញ និងព័ត៌មានពីប្រជាពលរដ្ឋ។

ឯកឧត្តមបានបញ្ជាក់ថា ទោះបីមកដល់ពេលនេះ ខេត្តកណ្ដាលមិនទាន់រកឃើញទីតាំងលួចលាក់ប្រព្រឹត្តសកម្មភាព Scam Online ក៏ដោយ ក៏អាជ្ញាធរគ្រប់លំដាប់ថ្នាក់ ត្រូវបន្តត្រួតពិនិត្យ និងស្រាវជ្រាវឱ្យបានតឹងរឹង។ ជាពិសេស ទីតាំងណាដែលរកឃើញថា មានជាប់ពាក់ព័ន្ធនឹង Scam Online ត្រូវអនុវត្តច្បាប់ឱ្យបានម៉ឺងម៉ាត់ ដោយគ្មានការយោគយល់ និងគ្មានការលើកលែងជាដាច់ខាត។

ក្រៅពីនេះ ឯកឧត្តមអភិបាលខេត្ត ក៏បានណែនាំដល់អាជ្ញាធរមូលដ្ឋាន ឱ្យយកចិត្តទុកដាក់លើបញ្ហាអំពើហិង្សាក្នុងគ្រួសារ ដែលកំពុងក្លាយជាបញ្ហាប្រឈមនៅតាមមូលដ្ឋានមួយចំនួន និងអាចបណ្ដាលឱ្យមានរបួសស្នាម ឬបាត់បង់អាយុជីវិត។ អាជ្ញាធរត្រូវបង្កើនការផ្សព្វផ្សាយ អប់រំ និងកំណត់មុខសញ្ញាហានិភ័យ ដើម្បីទប់ស្កាត់មិនឱ្យសោកនាដកម្មកើតឡើងក្នុងគ្រួសារ និងសហគមន៍៕