ស្នងការដ្ឋាននគរបាលខេត្តកណ្តាល បំភ្លឺករណីបាត់ម៉ូតូ PassApp នៅស្រុកខ្សាច់កណ្តាល ខណៈសមត្ថកិច្ចកំពុងស្រាវជ្រាវរកជនសង្ស័យ

(កណ្តាល)៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល បានចេញសេចក្តីបំភ្លឺព័ត៌មាន ពាក់ព័ន្ធការបង្ហោះរបស់គណនីហ្វេសប៊ុកឈ្មោះ «ប៊ុនថាន ព័ត៌មាន» ដែលបានផ្សព្វផ្សាយថា មានករណីបាត់ម៉ូតូផាស់អាប់ (PassApp) មួយគ្រឿង នៅក្នុងកម្មវិធីអាពាហ៍ពិពាហ៍មួយ ស្ថិតនៅភូមិពុកឬស្សីក្រោម ស្រុកខ្សាច់កណ្តាល ខេត្តកណ្តាល កាលពីយប់ថ្ងៃទី១៧ ខែឧសភា ឆ្នាំ២០២៦។

ក្រោយទទួលបានព័ត៌មានខាងលើ ដោយអនុវត្តតាមបទបញ្ជារបស់ថ្នាក់ដឹកនាំស្នងការដ្ឋាន លោកអធិការនគរបាលស្រុកខ្សាច់កណ្តាល បានបញ្ជាឱ្យកម្លាំងជំនាញផ្នែកនគរបាលយុត្តិធម៌ និងកម្លាំងប៉ុស្តិ៍នគរបាលរដ្ឋបាលពុកឬស្សី ចុះស្រាវជ្រាវភ្លាមៗទៅលើករណីនេះ។

តាមការបញ្ជាក់របស់សមត្ថកិច្ច ករណីនេះបានកើតឡើងនៅថ្ងៃទី១៧ ខែឧសភា ឆ្នាំ២០២៦ វេលាម៉ោងប្រមាណ ១០យប់ នៅចំណុចភូមិពុកឬស្សីក្រោម ឃុំពុកឬស្សី ស្រុកខ្សាច់កណ្ដាល ខេត្តកណ្ដាល។

ជនរងគ្រោះមានឈ្មោះ អេង សំអាត ភេទប្រុស អាយុ ៥២ឆ្នាំ មានទីលំនៅភូមិព្រែកអំពិល សង្កាត់ព្រែកអំពិល ក្រុងអរិយក្សត្រ ខេត្តកណ្ដាល បានបាត់ម៉ូតូផាស់អាប់មួយគ្រឿង ពណ៌ស ឆ្នាំ២០១៩ ម៉ាកបាចា ពាក់ស្លាកលេខ ព្រៃវែង 1P-7956 ខណៈជនសង្ស័យមិនទាន់ស្គាល់អត្តសញ្ញាណនៅឡើយ។

ប្រភពដដែលបន្តថា បន្ទាប់ពីកើតហេតុ នៅព្រឹកថ្ងៃទី១៨ ខែឧសភា ឆ្នាំ២០២៦ ជនរងគ្រោះបានទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលពុកឬស្សី ដើម្បីឱ្យសមត្ថកិច្ចជួយអន្តរាគមន៍ស្រាវជ្រាវ។

ក្រោយទទួលពាក្យបណ្ដឹង កម្លាំងសមត្ថកិច្ចបានចុះពិនិត្យទីតាំងកើតហេតុ និងធ្វើការឆែកកាមេរ៉ាសុវត្ថិភាពនៅជុំវិញកន្លែងកើតហេតុ ស្របតាមនីតិវិធីជំនាញ ដើម្បីកំណត់មុខសញ្ញាជនសង្ស័យ។

បច្ចុប្បន្ន កម្លាំងផ្នែកនគរបាលយុត្តិធម៌ សហការជាមួយកម្លាំងប៉ុស្តិ៍នគរបាលរដ្ឋបាលពុកឬស្សី កំពុងបន្តស្រាវជ្រាវ និងស្វែងរកអត្តសញ្ញាណជនសង្ស័យ ដើម្បីចាត់ការតាមផ្លូវច្បាប់៕