ឯកឧត្ដម ខុន សេរីរដ្ឋា៖ «ការធ្វើអាជីវកម្មខ្សាច់ ត្រូវមានការគ្រប់គ្រងត្រឹមត្រូវ ដើម្បីបញ្ចៀសផលប៉ះពាល់ដល់បរិស្ថាន និងជីវភាពប្រជាពលរដ្ឋ» 

(កណ្តាល)៖ រដ្ឋបាលខេត្តកណ្តាលសហការជាមួយក្រសួងធនធានទឹក និងឧតុនិយម បានរៀបចំកិច្ចប្រជុំផ្សព្វផ្សាយស្តីពី «យន្តការគ្រប់គ្រង និងបទដ្ឋានបច្ចេកទេស សម្រាប់ការធ្វើអាជីវកម្មខ្សាច់ប្រកបដោយការទទួលខុសត្រូវ» ក្នុងគោលបំណងពង្រឹងការយល់ដឹង និងជំរុញការអនុវត្តច្បាប់ឱ្យកាន់តែមានប្រសិទ្ធភាព សំដៅធានានិរន្តរភាពបរិស្ថាន និងការអភិវឌ្ឍសេដ្ឋកិច្ចសង្គម។

កិច្ចប្រជុំនេះ បានប្រព្រឹត្តទៅនាព្រឹកថ្ងៃទី១៨ ខែឧសភា ឆ្នាំ២០២៦ ក្រោមអធិបតីភាព ឯកឧត្តម អាន ពេជ្រ ហត្ថដា រដ្ឋលេខាធិការក្រសួងធនធានទឹក និងឧតុនិយម និងជាប្រធានលេខាធិការដ្ឋាន គ.ធ.ខ និងឯកឧត្តម ខុន សេរីដ្ឋា អភិបាលរងខេត្តកណ្តាល ដោយមានការចូលរួមពីថ្នាក់ដឹកនាំមន្ទីរ អង្គភាពពាក់ព័ន្ធ អភិបាលរងក្រុង-ស្រុកទាំង១៣ និងមេឃុំ ចៅសង្កាត់ជាច្រើនរូប។

ក្នុងឱកាសនោះ ឯកឧត្តម អាន ពេជ្រ ហត្ថដា បានបញ្ជាក់ថា កិច្ចប្រជុំនេះផ្តោតសំខាន់លើការពង្រឹងការយល់ដឹងពាក់ព័ន្ធនឹងការគ្រប់គ្រងធនធានខ្សាច់ ដោយគិតគូរលើទិដ្ឋភាពសេដ្ឋកិច្ច សង្គម និងបរិស្ថាន ព្រមទាំងជំរុញកិច្ចសហការរវាងស្ថាប័នពាក់ព័ន្ធ និងក្រុមហ៊ុនអាជីវកម្មខ្សាច់ ដើម្បីអនុវត្តអាជីវកម្មឱ្យបានត្រឹមត្រូវតាមបទដ្ឋានបច្ចេកទេស និងច្បាប់ជាធរមាន។

ដោយឡែក ឯកឧត្តម ខុន សេរីដ្ឋា បានមានប្រសាសន៍ថា ខេត្តកណ្តាល គឺជាខេត្តដំបូងគេនៅទូទាំងប្រទេស ដែលបានរៀបចំពិធីផ្សព្វផ្សាយអំពីបទដ្ឋានគតិយុត្ត និងយន្តការគ្រប់គ្រងការធ្វើអាជីវកម្មខ្សាច់ប្រកបដោយការទទួលខុសត្រូវ ដើម្បីបញ្ចៀសផលប៉ះពាល់អវិជ្ជមានផ្សេងៗ។

ឯកឧត្តមបានបន្តថា ខ្សាច់គឺជាធនធានធម្មជាតិដ៏មានសារៈសំខាន់សម្រាប់វិស័យសំណង់ ហេដ្ឋារចនាសម្ព័ន្ធ និងការអភិវឌ្ឍទីក្រុង ប៉ុន្តែប្រសិនបើការធ្វើអាជីវកម្មខ្សាច់គ្មានការគ្រប់គ្រងត្រឹមត្រូវ នោះអាចបង្កឱ្យមានការបាក់ច្រាំងទន្លេ បាត់បង់ជីវចម្រុះ និងប៉ះពាល់ដល់ជីវភាពរស់នៅរបស់ប្រជាពលរដ្ឋ៕