រដ្ឋមន្ត្រីព័ត៌មានជំរុញយុវជនប្រឆាំងព័ត៌មានក្លែងក្លាយ និងប្រើបណ្តាញសង្គមដោយការទទួលខុសត្រូវ

(ភ្នំពេញ)៖ លោក នេត្រ ភក្ត្រា រដ្ឋមន្ត្រីក្រសួងព័ត៌មាន បានគូសបញ្ជាក់ថា ការផ្សព្វផ្សាយយុទ្ធនាការ «និយាយថាទេចំពោះព័ត៌មានក្លែងក្លាយ» ដំណាក់កាលទី២ ដែលចាប់ផ្ដើមពីគ្រឹះស្ថានសិក្សា មានគោលបំណងបញ្ជ្រាបចំណេះដឹងផ្នែកព័ត៌មាន និងប្រព័ន្ធផ្សព្វផ្សាយ ដើម្បីលើកកម្ពស់ការយល់ដឹងអំពីផលប៉ះពាល់នៃព័ត៌មានក្លែងក្លាយទៅលើយុវវ័យ និងសិស្សានុសិស្ស សំដៅរួមចំណែកទប់ស្កាត់ និងលុបបំបាត់ការរីករាលដាលព័ត៌មានមិនពិតក្នុងសង្គមឌីជីថល។

ការលើកឡើងនេះ ធ្វើឡើងក្នុងពិធីបើកយុទ្ធនាការ «និយាយថាទេចំពោះព័ត៌មានក្លែងក្លាយ» ជំហានទី២ ក្រោមប្រធានបទ «ពង្រឹងអក្ខរកម្មព័ត៌មាន និងប្រព័ន្ធផ្សព្វផ្សាយដើម្បីសុវត្ថិភាពព័ត៌មាន» ដែលបានប្រារព្ធធ្វើឡើងជាផ្លូវការ នៅថ្ងៃទី១៨ ខែឧសភា ឆ្នាំ២០២៦ នៅ វិទ្យាល័យ ហ៊ុន សែន ប៊ុនរ៉ានី វត្តភ្នំ រាជធានីភ្នំពេញ ដោយមានការចូលរួមពីថ្នាក់ដឹកនាំក្រសួងព័ត៌មាន ក្រសួងអប់រំ យុវជន និងកីឡា ប្រធានមន្ទីរព័ត៌មានរាជធានី-ខេត្ត លោកគ្រូ អ្នកគ្រូ និងសិស្សានុសិស្សប្រមាណ ២,៥០០នាក់។

លោករដ្ឋមន្ត្រី បានអំពាវនាវដល់យុវជន និងសិស្សានុសិស្ស ត្រូវប្រើប្រាស់បណ្តាញសង្គមដោយការប្រុងប្រយ័ត្ន មិនត្រូវចែករំលែកព័ត៌មានដែលគ្មានប្រភពផ្លូវការ ឬមិនទាន់បានផ្ទៀងផ្ទាត់ឱ្យបានច្បាស់លាស់នោះទេ។ ជាមួយគ្នានេះ លោកក៏បានលើកទឹកចិត្តឱ្យយុវជនប្រើប្រាស់ទូរស័ព្ទ និងបច្ចេកវិទ្យាឌីជីថលសម្រាប់ការសិក្សា ការស្វែងយល់ចំណេះដឹង និងការចែករំលែកព័ត៌មានដែលមានប្រយោជន៍ដល់សង្គម។

លោក នេត្រ ភក្ត្រា បានសង្កត់ធ្ងន់ថា ការចូលរួមរបស់យុវជន និងប្រជាពលរដ្ឋក្នុងការប្រឆាំងព័ត៌មានក្លែងក្លាយ គឺជាចំណែកដ៏សំខាន់ក្នុងការពង្រឹងសន្តិសុខព័ត៌មាន រក្សាសណ្តាប់ធ្នាប់សង្គម និងកសាងភាពធន់ឌីជីថលសម្រាប់ប្រទេសជាតិ។

ទន្ទឹមនឹងនេះ លោករដ្ឋមន្ត្រីក៏បានចែករំលែកពីវិធីសម្គាល់ព័ត៌មានពិត និងព័ត៌មានក្លែងក្លាយ ដោយណែនាំឱ្យពិនិត្យប្រភពព័ត៌មានឱ្យបានច្បាស់លាស់ ជាពិសេសព័ត៌មានដែលចេញពីស្ថាប័នរដ្ឋ មន្ត្រីជំនាញ និងអាជ្ញាធរផ្លូវការ មុននឹងធ្វើការចែករំលែកបន្ត។
លោកបានសង្កត់ធ្ងន់ថា៖ «ត្រូវពិនិត្យប្រភពឱ្យច្បាស់លាស់ មុននឹងចែករំលែកព័ត៌មាន» ខណៈដែលពិភពឌីជីថលកំពុងវិវត្តយ៉ាងឆាប់រហ័ស និងបង្កើនហានិភ័យនៃព័ត៌មានបំភាន់ បំផ្លើស និងព័ត៌មានក្លែងក្លាយក្នុងសង្គម។

ជាមួយគ្នានេះ លោករដ្ឋមន្ត្រីបានរំលេចថា យុទ្ធនាការ «និយាយថាទេចំពោះព័ត៌មានក្លែងក្លាយ» មានសារៈសំខាន់ខ្លាំងក្នុងបរិបទដែលប្រជាពលរដ្ឋ ជាពិសេសយុវវ័យ កំពុងប្រើប្រាស់បច្ចេកវិទ្យាទំនើប និងបណ្តាញសង្គមយ៉ាងទូលំទូលាយ។ លោកបន្តថា ប្រសិនបើគ្មានការអប់រំ និងពង្រឹងអក្ខរកម្មព័ត៌មាន អក្ខរកម្មឌីជីថល និងការយល់ដឹងអំពីប្រព័ន្ធផ្សព្វផ្សាយទេ នោះការប្រើប្រាស់បច្ចេកវិទ្យាអាចនាំឱ្យកើតផលប៉ះពាល់អវិជ្ជមានដល់សង្គម។

លោក នេត្រ ភក្ត្រា បានអំពាវនាវឱ្យយុវវ័យពង្រឹងសមត្ថភាពរបស់ខ្លួន ដើម្បីក្លាយជាភ្នាក់ងារសុវត្ថិភាពព័ត៌មានដ៏រឹងមាំ ក្នុងការចូលរួមបន្សុទ្ធលំហព័ត៌មាន ការពារគ្រួសារ សហគមន៍ និងសង្គមជាតិពីគ្រោះថ្នាក់នៃការផ្សាយព័ត៌មានបំភ្លៃ បំផ្លើស ក្លែងបន្លំ និងបំពុលសង្គម។

គួរបញ្ជាក់ថា យុទ្ធនាការ «និយាយថាទេចំពោះព័ត៌មានក្លែងក្លាយ» គឺជាយន្តការសំខាន់មួយរបស់ក្រសួងព័ត៌មាន ក្នុងការប្រយុទ្ធប្រឆាំងព័ត៌មានក្លែងក្លាយគ្រប់ទម្រង់ ដើម្បីលើកកម្ពស់សន្តិសុខព័ត៌មាន គុណភាពព័ត៌មាន និងធានាសិទ្ធិរបស់ប្រជាពលរដ្ឋក្នុងការទទួលបានព័ត៌មានពិត និងត្រឹមត្រូវ៕