គម្រោងសាងសង់រោងចក្រទឹកស្អាតធំបំផុតនៅកម្ពុជា សម្រេចការសាងសង់បានប្រមាណ ៧២%

(ភ្នំពេញ)៖ គម្រោងសាងសង់រោងចក្រប្រព្រឹត្តកម្មទឹកស្អាតបាក់ខែង ដំណាក់កាលទី៣ ដែលជារោងចក្រទឹកស្អាតធំបំផុតនៅកម្ពុជា សម្រេចការសាងសង់បានប្រមាណ ៧២% ហើយ គ្រោងបញ្ចប់ជាស្ថាពរនៅក្នុងត្រីមាសទី២ ឆ្នាំ២០២៧ ខាងមុខ។

ក្នុងឱកាសដឹកនាំគណៈប្រតិភូចុះពិនិត្យវឌ្ឍនភាពគម្រោង ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានវាយតម្លៃខ្ពស់ចំពោះដំណើរការសាងសង់ និងការខិតខំរបស់ក្រុមការងារបច្ចេកទេស ក្នុងការជំរុញគម្រោងឱ្យប្រព្រឹត្តទៅតាមផែនការកំណត់។

ក្រោយបញ្ចប់ការសាងសង់ដំណាក់កាលទី៣នេះ រោងចក្រទឹកស្អាតបាក់ខែង នឹងបន្ថែមសមត្ថភាពផលិតទឹកស្អាតចំនួន ១៩៥.០០០ ម៉ែត្រគូបក្នុងមួយថ្ងៃ ដែលនឹងធ្វើឱ្យសមត្ថភាពផលិតសរុបរបស់រោងចក្របាក់ខែង កើនដល់ ៥៨៥.០០០ ម៉ែត្រគូបក្នុងមួយថ្ងៃ ខណៈសមត្ថភាពផលិតសរុបរបស់រដ្ឋាករទឹកស្វយ័តក្រុងភ្នំពេញ នឹងកើនដល់ ១,២ លានម៉ែត្រគូបក្នុងមួយថ្ងៃ។

គម្រោងដ៏ធំនេះ ត្រូវបានចាត់ទុកជាហេដ្ឋារចនាសម្ព័ន្ធដ៏សំខាន់សម្រាប់វិស័យទឹកស្អាតនៅកម្ពុជា ដែលនឹងរួមចំណែកពង្រឹងការផ្គត់ផ្គង់ទឹកស្អាតប្រកបដោយគុណភាព និងនិរន្តរភាព ជូនប្រជាពលរដ្ឋក្នុងរាជធានីភ្នំពេញ និងតំបន់ជុំវិញ ស្របតាមកំណើនតម្រូវការប្រើប្រាស់ទឹកស្អាត ការរីកចម្រើនសេដ្ឋកិច្ច និងការលើកកម្ពស់គុណភាពជីវិតរបស់ប្រជាពលរដ្ឋ៕