លោក ចាន់ តារា ចុះពិនិត្យវឌ្ឍនភាពសាងសង់អគារសិក្សាក្នុងក្រុងអរិយក្សត្រ ជំរុញគុណភាពហេដ្ឋារចនាសម្ព័ន្ធវិស័យអប់រំ

(កណ្ដាល)៖ លោក ចាន់ តារា អភិបាលក្រុងអរិយក្សត្រ នាថ្ងៃទី១៣ ខែឧសភា ឆ្នាំ២០២៦នេះ រួមជាមួយអភិបាលរងក្រុង និងមន្ត្រីពាក់ព័ន្ធ បានអញ្ជើញចុះពិនិត្យវឌ្ឍនភាពការសាងសង់អគារសិក្សានៅតាមគ្រឹះស្ថានអប់រំមួយចំនួនក្នុងភូមិសាស្ត្រក្រុងអរិយក្សត្រ ដើម្បីធានាគុណភាពសំណង់ និងពន្លឿនការងារសាងសង់ឱ្យសម្រេចតាមផែនការកំណត់។
ក្នុងដំណើរចុះពិនិត្យនេះ រដ្ឋបាលក្រុងបានពិនិត្យការដ្ឋានសាងសង់សំខាន់ៗរួមមាន៖

*១. សាលាបឋមសិក្សាព្រែកអំពិល ស្ថិតក្នុងសង្កាត់ព្រែកអំពិល កំពុងសាងសង់អគារសិក្សា ១ខ្នង កម្ពស់២ជាន់ ស្មើ១០បន្ទប់ និងអគារទីចាត់ការ ១ខ្នង

*២.វិទ្យាល័យព្រែកលួង ស្ថិតក្នុងសង្កាត់ព្រែកលួង កំពុងសាងសង់អគារសិក្សា ១ខ្នង កម្ពស់៣ជាន់ ស្មើ១៨បន្ទប់

*៣.សាលាមត្តេយ្យខ្មែរអមតៈ ស្ថិតក្នុងសង្កាត់អរិយក្សត្រ កំពុងសាងសង់អគារសិក្សា ១ខ្នង រាងអក្សរ L មានចំនួន៧បន្ទប់

ក្នុងឱកាសនោះ លោកអភិបាលក្រុងបានណែនាំដល់ក្រុមការងារបច្ចេកទេស និងក្រុមហ៊ុនសាងសង់ ត្រូវយកចិត្តទុកដាក់ខ្ពស់លើស្តង់ដារបច្ចេកទេស គុណភាពសំណង់ សុវត្ថិភាពការងារ និងការអនុវត្តឱ្យបានត្រឹមត្រូវតាមលក្ខណៈបច្ចេកទេសដែលបានកំណត់។

លោក ចាន់ តារា បានបញ្ជាក់ថា ការអភិវឌ្ឍហេដ្ឋារចនាសម្ព័ន្ធវិស័យអប់រំ គឺជាកត្តាសំខាន់ក្នុងការលើកកម្ពស់គុណភាពអប់រំ និងបង្កើតបរិយាកាសសិក្សាល្អប្រសើរសម្រាប់សិស្សានុសិស្ស និងលោកគ្រូ អ្នកគ្រូ ក្នុងក្រុងអរិយក្សត្រ ស្របតាមគោលនយោបាយរបស់រាជរដ្ឋាភិបាលក្នុងការយកចិត្តទុកដាក់លើវិស័យអប់រំជាអាទិភាព៕