ស្រុកលើកដែកបិទបញ្ចប់ការចុះបញ្ជីដីធ្លីជាប្រព័ន្ធទាំងស្រុង ខណៈអាជ្ញាធរខេត្តកណ្ដាលបន្តពង្រឹងសិទ្ធិកម្មសិទ្ធិជូនពលរដ្ឋ

(កណ្ដាល)៖ នៅព្រឹកថ្ងៃពុធ ទី១៣ ខែឧសភា ឆ្នាំ២០២៦ ឯកឧត្តម ឈឿន ប៊ុណ្ណារ័ត្ន រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ឯកឧត្តម នូ សាខន ប្រធានក្រុមប្រឹក្សាខេត្ត និងឯកឧត្តម គួច ចំរើន អភិបាលខេត្តកណ្ដាល បានអញ្ជើញចូលរួមក្នុងពិធីប្រគល់វិញ្ញាបនបត្រសម្គាល់ម្ចាស់អចលនវត្ថុចំនួន ១២,៦៤២បណ្ណ ជូនប្រជាពលរដ្ឋនៅឃុំក្អមសំណរ ឃុំកំពង់ភ្នំ និងឃុំព្រែកទន្លាប់ ស្រុកលើកដែក ខណៈការចុះបញ្ជីដីធ្លីលក្ខណៈជាប្រព័ន្ធនៅក្នុងស្រុកនេះ ត្រូវបានបិទបញ្ចប់ទាំងស្រុងដោយជោគជ័យ។

ក្នុងឱកាសនោះ ឯកឧត្តម គួច ចំរើន បានសម្ដែងការកោតសរសើរ និងថ្លែងអំណរគុណចំពោះមន្ត្រីជំនាញ និងមន្ត្រីពាក់ព័ន្ធគ្រប់លំដាប់ថ្នាក់ ដែលបានខិតខំអនុវត្តការងារចុះបញ្ជីដីធ្លីរហូតទទួលបានលទ្ធផលជោគជ័យ ធ្វើឱ្យស្រុកលើកដែកក្លាយជាមូលដ្ឋានមួយដែលបានបញ្ចប់ការចុះបញ្ជីដីធ្លីជាប្រព័ន្ធទាំងស្រុង។

ឯកឧត្តមអភិបាលខេត្ត ក៏បានជំរុញឱ្យមន្ទីរជំនាញ និងរដ្ឋបាលក្រុង-ស្រុក បន្តពន្លឿនការផ្តល់បណ្ណកម្មសិទ្ធិដែលបានចេញរួចជូនដល់ដៃប្រជាពលរដ្ឋឱ្យបានឆាប់រហ័ស ព្រមទាំងណែនាំអាជ្ញាធរមូលដ្ឋានបន្តផ្សព្វផ្សាយដល់ប្រជាពលរដ្ឋឱ្យអញ្ជើញមកទទួលបណ្ណនៅតាមការិយាល័យច្រកចេញចូលតែមួយរដ្ឋបាលក្រុង-ស្រុក ដើម្បីធានាប្រសិទ្ធភាព និងភាពងាយស្រួលក្នុងការផ្តល់សេវាសាធារណៈ។

ឯកឧត្តម គួច ចំរើន បានលើកឡើងថា ការមានបណ្ណកម្មសិទ្ធិស្របច្បាប់ គឺជាកត្តាសំខាន់ក្នុងការធានាសិទ្ធិកាន់កាប់ដីធ្លីពេញលេញ កាត់បន្ថយ និងលុបបំបាត់វិវាទដីធ្លី ព្រមទាំងផ្តល់ទំនុកចិត្តដល់ម្ចាស់ដីក្នុងការប្រើប្រាស់អចលនទ្រព្យរបស់ខ្លួន ដូចជា ការលក់ដូរ ផ្ទេរកម្មសិទ្ធិ ធ្វើអំណោយ ដាក់ហ៊ីប៉ូតែក ឬបញ្ចាំជាដើម។

ឯកឧត្តមបន្តថា ការផ្តល់បណ្ណកម្មសិទ្ធិជូនប្រជាពលរដ្ឋនាពេលនេះ មិនត្រឹមតែបញ្ជាក់ពីសិទ្ធិស្របច្បាប់ប៉ុណ្ណោះទេ ប៉ុន្តែថែមទាំងរួមចំណែកលើកកម្ពស់ជីវភាពប្រជាពលរដ្ឋ កាត់បន្ថយភាពក្រីក្រ និងពង្រឹងស្ថេរភាពសង្គមនៅមូលដ្ឋានឱ្យកាន់តែប្រសើរឡើងផងដែរ៕