ឯកឧត្តម ឯម ច័ន្ទមករា អញ្ជើញដឹកនាំក្រុមការងារ អ.ដ.ក. ចុះសិក្សា និងសម្រុះសម្រួលដោះស្រាយវិវាទដីធ្លីជូនប្រជាពលរដ្ឋ នៅខណ្ឌព្រែកព្នៅ

(ភ្នំពេញ)៖ នៅថ្ងៃទី១២ ខែឧសភា ឆ្នាំ២០២៦ ឯកឧត្តម ឯម ច័ន្ទមករា រដ្ឋលេខាធិការក្រសួងយុត្តិធម៌ និងជាសមាជិកអាជ្ញាធរដោះស្រាយវិវាទក្រៅប្រព័ន្ធតុលាការ (អ.ដ.ក.) បានដឹកនាំក្រុមការងារ ចុះធ្វើការសិក្សា និងសម្រុះសម្រួលដោះស្រាយវិវាទជូនប្រជាពលរដ្ឋដល់មូលដ្ឋាន នៅសាលាខណ្ឌព្រែកព្នៅ រាជធានីភ្នំពេញ។

ក្នុងដំណើរចុះបំពេញការងារនេះ ឯកឧត្តមបានអមដំណើរដោយមន្ត្រីសម្រុះសម្រួលដោះស្រាយវិវាទនៃ អ.ដ.ក. រួមមាន លោក ស៊ុន រិទ្ធី និងលោក ងន សុខជា ដើម្បីពិនិត្យ និងសិក្សាលម្អិតលើករណីវិវាទដីធ្លីមួយ ដែលកំពុងកើតមាននៅក្នុងភូមិសាស្ត្រខណ្ឌព្រែកព្នៅ។

សូមគូសបញ្ជាក់ថា ផ្អែកតាមបទប្បញ្ញត្តិរបស់ អ.ដ.ក. មន្ត្រីសម្រុះសម្រួលដោះស្រាយវិវាទ ឬក្រុមការងារពាក់ព័ន្ធ មានសិទ្ធិស្នើសុំកិច្ចសហការពីស្ថាប័ន និងអាជ្ញាធរមូលដ្ឋានដែលពាក់ព័ន្ធ ដើម្បីជំរុញការដោះស្រាយសំណុំរឿងវិវាទឲ្យបានមានប្រសិទ្ធភាព សមស្របតាមនីតិវិធី និងក្របខ័ណ្ឌច្បាប់របស់ អ.ដ.ក.។

ការចុះសិក្សានេះមានគោលបំណងពង្រឹងយន្តការដោះស្រាយវិវាទក្រៅប្រព័ន្ធតុលាការ ដើម្បីលើកកម្ពស់សន្តិភាពសង្គម និងបន្ថយវិវាទនៅមូលដ្ឋាន៕