រដ្ឋបាលស្រុកកៀនស្វាយ ចេញសេចក្តីបំភ្លឺពាក់ព័ន្ធព័ត៌មានចុះផ្សាយអំពីដីបឹងពពាលខែ 

(កណ្ដាល)៖ រដ្ឋបាលស្រុកកៀនស្វាយ សូមជម្រាបជូនសាធារណជន និងអ្នកសារព័ត៌មានទាំងអស់ មេត្តាជ្រាបថា ក្រោយពីបានទទួលព័ត៌មានដែលបានចុះផ្សាយកាលពីថ្ងៃទី១១ ខែឧសភា ឆ្នាំ២០២៦ ដោយគេហទំព័រ The Mirror News ពាក់ព័ន្ធនឹងករណី «ធ្វើរបងរឹងមាំ ចាក់ខ្សាច់ព័ទ្ធយកដីបឹងពពាលខែ នៅឃុំដីឥដ្ឋ ស្រុកកៀនស្វាយ» នោះ រដ្ឋបាលស្រុកកៀនស្វាយ បានចាត់វិធានការត្រួតពិនិត្យភ្លាមៗ។

នៅថ្ងៃទី១២ ខែឧសភា ឆ្នាំ២០២៦ រដ្ឋបាលស្រុកបានបំភ្លឺថា បានចាត់ឱ្យមន្ត្រីជំនាញ នៃការិយាល័យរៀបចំដែនដី នគរូបនីយកម្ម សំណង់ និងភូមិបាល សហការជាមួយអាជ្ញាធរឃុំ ចុះទៅពិនិត្យទីតាំងជាក់ស្តែង និងធ្វើការវាស់វែងយ៉ាងម៉ត់ចត់។

ជាលទ្ធផលនៃការត្រួតពិនិត្យ បានបញ្ជាក់ថា ការចាក់ដី និងការសាងសង់របងខាងលើ ស្ថិតនៅក្នុងព្រំដែនដីកម្មសិទ្ធិរបស់ម្ចាស់ដីតែប៉ុណ្ណោះ មិនមានការរំលោភចូលលើដីបឹងដូចដែលបានចុះផ្សាយឡើយ។ ទីតាំងដីនេះជាកម្មសិទ្ធិរបស់ឈ្មោះ ហ៊ឹង ប៊ុនថា និងឈ្មោះ ហ៊ឹង ប៊ុនធី ដែលមានបណ្ណសម្គាល់ម្ចាស់អចលនវត្ថុលេខ ០៨០២០៣០៦-០១៣៦ ចុះថ្ងៃទី២៣ ខែកញ្ញា ឆ្នាំ២០២៤។ ចំពោះការសាងសង់សំណង់ ក៏បានអនុវត្តតាមនីតិវិធីត្រឹមត្រូវ ដោយមានការស្នើសុំ និងទទួលបានលិខិតអនុញ្ញាតពីអាជ្ញាធរពាក់ព័ន្ធរួចរាល់។

សូមបញ្ជាក់ជូនថា កន្លងមក រដ្ឋបាលស្រុកកៀនស្វាយ តែងតែយកចិត្តទុកដាក់ខ្ពស់ ក្នុងការការពារ និងរក្សាទុកផ្លូវសាធារណៈ បឹង ទន្លេ ព្រែក អូរ និងអាងស្តុកទឹក ដែលជាសម្បត្តិរបស់រដ្ឋ ដើម្បីបម្រើផលប្រយោជន៍សាធារណជន ប្រកបដោយតម្លាភាព និងប្រសិទ្ធភាព។

អាស្រ័យហេតុនេះ ខាងក្រោមនេះ ជាខ្លឹមសារទាំងស្រុងនៃសេចក្តីបំភ្លឺព័ត៌មានរបស់រដ្ឋបាលស្រុកកៀនស្វាយ។