ស្នងការដ្ឋាននគរបាលខេត្តបើកកិច្ចប្រជុំផ្សព្វផ្សាយ និងណែនាំការងារចាំបាច់ ដើម្បីពង្រឹងប្រសិទ្ធភាពការងារប្រតិបត្តិការនគរបាល

(កណ្ដាល)៖ នៅព្រឹកថ្ងៃពុធ ទី១៣ ខែឧសភា ឆ្នាំ២០២៦ ដោយអនុវត្តតាមបទបញ្ជា និងការចង្អុលដឹកនាំដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានអញ្ជើញជាធិបតីដឹកនាំកិច្ចប្រជុំផ្សព្វផ្សាយ និងណែនាំការងារចាំបាច់មួយចំនួន ដល់មន្ត្រីក្រោមឱវាទ។

កិច្ចប្រជុំនេះមានការចូលរួមពី លោកស្នងការរងទទួលផែនការងារជំនាញទាំង១៣ លោកស្នងការរងទទួលជំនួយការដឹកនាំការិយាល័យជំនាញពាក់ព័ន្ធ លោកនាយការិយាល័យជំនាញពាក់ព័ន្ធ លោកអធិការនគរបាលគ្រប់ស្រុក-ក្រុង លោកមេបញ្ជាការវរៈសេនាតូចនគរបាលការពារព្រំដែនគោកលេខ៦០៥ ព្រមទាំងលោកប្រធានប៉ុស្តិ៍នគរបាលច្រកទ្វារអន្តរជាតិជ្រៃធំផងដែរ។

ក្នុងឱកាសនោះ លោកឧត្តមសេនីយ៍ទោ ស្នងការនគរបាលខេត្ត បានធ្វើការផ្សព្វផ្សាយ និងណែនាំអំពីការពង្រឹងវិន័យកងកម្លាំង ការអនុវត្តតួនាទីភារកិច្ចឱ្យបានម៉ឺងម៉ាត់ ការបង្កើនប្រសិទ្ធភាពការងារប្រតិបត្តិការនគរបាល ក៏ដូចជាការពង្រឹងកិច្ចសហការរវាងអង្គភាពជំនាញ និងអធិការដ្ឋាននគរបាលគ្រប់ថ្នាក់ ដើម្បីធានាសន្តិសុខ សុវត្ថិភាព និងសណ្តាប់ធ្នាប់សាធារណៈនៅក្នុងភូមិសាស្ត្រខេត្តកណ្តាល។

លោកឧត្តមសេនីយ៍ទោ ស្នងការ បានផ្តល់អនុសាសន៍ណែនាំឱ្យមន្ត្រីគ្រប់លំដាប់ថ្នាក់បន្តខិតខំអនុវត្តភារកិច្ចដោយការទទួលខុសត្រូវខ្ពស់ ពង្រឹងស្មារតីសាមគ្គីភាពផ្ទៃក្នុង និងបម្រើប្រជាពលរដ្ឋឱ្យបានល្អប្រសើរ ស្របតាមគោលនយោបាយរបស់អគ្គស្នងការនគរបាលជាតិ៕