ឯកឧត្តម ទេព អស្នារិទ្ធ៖ សន្តិសុខព័ត៌មានឌីជីថល ជាខែលការពារផលប្រយោជន៍សាធារណៈ និងស្ថិរភាពសង្គមជាតិ

(ភ្នំពេញ)៖ ឯកឧត្តម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន បានគូសបញ្ជាក់ថា ការពង្រឹងសន្តិសុខ និងសុវត្ថិភាពព័ត៌មានក្នុងបរិបទឌីជីថល គឺមិនត្រឹមតែជាកិច្ចការបច្ចេកទេសប៉ុណ្ណោះទេ ប៉ុន្តែជាយុទ្ធសាស្ត្រស្នូលដ៏សំខាន់ក្នុងការការពារផលប្រយោជន៍ប្រជាពលរដ្ឋ ថែរក្សាសន្តិភាព និងធានាស្ថិរភាពសង្គមជាតិ នៅក្នុងសម័យបច្ចេកវិទ្យាទំនើប និងបញ្ញាសិប្បនិម្មិត (AI) កំពុងវិវត្តយ៉ាងឆាប់រហ័ស។

ការលើកឡើងនេះ ធ្វើឡើងក្នុងឱកាសឯកឧត្តមអញ្ជើញចូលរួមពិធីសំណេះសំណាល និងពិភាក្សាការងារជាមួយថ្នាក់ដឹកនាំ និងមន្ត្រីរាជការនៃមន្ទីរព័ត៌មានរាជធានីភ្នំពេញ នារសៀលថ្ងៃទី១២ ខែឧសភា ឆ្នាំ២០២៦ ដោយមានការចូលរួមពី ឯកឧត្តម ហ៊ឹម សុទិត្យា រដ្ឋលេខាធិការក្រសួងព័ត៌មាន ទទួលបន្ទុកមន្ទីរព័ត៌មានរាជធានីភ្នំពេញ ព្រមទាំងសមាជិកលេខាធិការដ្ឋានក្រុមការងាររៀបចំយុទ្ធនាការ «និយាយថាទេ ចំពោះព័ត៌មានក្លែងក្លាយ» ផងដែរ។

ក្នុងជំនួបនោះ ឯកឧត្តម ទេព អស្នារិទ្ធ បានលើកឡើងពីហានិភ័យកាន់តែធ្ងន់ធ្ងរនៃព័ត៌មានក្លែងក្លាយ ដែលកំពុងរីករាលដាលតាមបណ្តាញសង្គម និងវេទិកាឌីជីថល ខណៈបច្ចេកវិទ្យា AI ត្រូវបានក្រុមអគតិ និងក្រុមអមិត្តនៅក្រៅប្រទេសយកទៅប្រើប្រាស់ ដើម្បីបំភ្លៃព័ត៌មាន បំផ្លើសស្ថានការណ៍ និងបង្កការយល់ច្រឡំក្នុងសាធារណមតិ ពាក់ព័ន្ធនឹងការអភិវឌ្ឍន៍ និងស្ថានភាពសង្គមនៅកម្ពុជា។

ឯកឧត្តមបានបញ្ជាក់ថា ព័ត៌មានក្លែងក្លាយមិនត្រឹមតែបង្កការភាន់ច្រឡំប៉ុណ្ណោះទេ ប៉ុន្តែអាចក្លាយជាឧបករណ៍បង្កចលាចល និងបំផ្លាញស្ថិរភាពសង្គមជាតិ ជាពិសេសការបំភ្លៃព័ត៌មានពាក់ព័ន្ធនឹងបញ្ហាព្រំដែន និងបរិបទជម្លោះក្នុងតំបន់ ដែលអាចជះឥទ្ធិពលដល់សន្តិសុខ និងសណ្តាប់ធ្នាប់សាធារណៈ ប្រសិនបើគ្មានវិធានការទប់ស្កាត់ទាន់ពេលវេលា។
ជាមួយគ្នានេះ ឯកឧត្តមក៏បានរំលឹកថា ក្រោមការដឹកនាំរបស់ ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ក្រសួងបានអនុវត្តយុទ្ធនាការ «និយាយថាទេ ចំពោះព័ត៌មានក្លែងក្លាយ (Say No to Fake News)» ដំណាក់កាលទី១ ក្នុងឆ្នាំ២០២៥ ដោយអាចផ្សព្វផ្សាយដល់អ្នកប្រើប្រាស់បណ្តាញសង្គមជាង ៩លាននាក់ ក្នុងចំណោមអ្នកប្រើប្រាស់សកម្មជិត ១៥លាននាក់នៅទូទាំងប្រទេស។

ឯកឧត្តមបានចាត់ទុកថា យុទ្ធនាការនេះ បានក្លាយជាយន្តការដ៏មានប្រសិទ្ធភាពក្នុងការការពារប្រជាពលរដ្ឋពីហានិភ័យព័ត៌មានក្លែងក្លាយ ព្រមទាំងរួមចំណែកបន្សុទ្ធបរិយាកាសព័ត៌មាន និងលើកកម្ពស់អក្ខរកម្មព័ត៌មាន និងប្រព័ន្ធផ្សព្វផ្សាយសាធារណៈឱ្យកាន់តែប្រសើរឡើង។

ឯកឧត្តមបន្តថា យន្តការប្រឆាំងព័ត៌មានក្លែងក្លាយរបស់ក្រសួងព័ត៌មាន ដោយសហការជាមួយក្រសួងស្ថាប័នពាក់ព័ន្ធ និងបណ្តាញព័ត៌មានរាជធានី-ខេត្ត បានដើរតួនាទីយ៉ាងសំខាន់ក្នុងការទប់ស្កាត់ការរីកសាយភាយព័ត៌មានប្រឌិត ក្លែងបន្លំ និងព័ត៌មានបំពុលសង្គម រួមទាំងព័ត៌មានក្លែងក្លាយដែលបង្កើតឡើងដោយបច្ចេកវិទ្យា AI ផងដែរ។

ក្នុងន័យនេះ ឯកឧត្តមបានជំរុញឱ្យបណ្តាញព័ត៌មានរដ្ឋទាំងថ្នាក់ជាតិ និងក្រោមជាតិ បន្តពង្រឹងសមត្ថភាពប្រើប្រាស់បណ្តាញសង្គមដូចជា Facebook, Telegram, YouTube និង TikTok ប្រកបដោយគុណភាព និងវិជ្ជាជីវៈ ដើម្បីផ្សព្វផ្សាយព័ត៌មានពិតឱ្យបានទាន់ពេលវេលា ទូលំទូលាយ និងមានប្រសិទ្ធភាព ព្រមទាំងឆ្លើយតបចំពោះការបំភ្លៃ និងព័ត៌មានមិនពិតឱ្យបានឆាប់រហ័ស។

ឯកឧត្តម ទេព អស្នារិទ្ធ បានអំពាវនាវដល់ប្រជាពលរដ្ឋទាំងអស់ ឱ្យបង្កើនការប្រុងប្រយ័ត្នក្នុងការប្រើប្រាស់បណ្តាញសង្គម ដោយត្រូវពិនិត្យ និងវិភាគព័ត៌មានឱ្យបានគ្រប់ជ្រុងជ្រោយ មុននឹងជឿ ឬចែករំលែកបន្ត ខណៈការយល់ដឹងអំពីសុវត្ថិភាពទិន្នន័យផ្ទាល់ខ្លួន គឺជាខែលការពារដ៏រឹងមាំបំផុត ប្រឆាំងនឹងការបោកប្រាស់ និងឧបាយកលរបស់ជនខិលខូច ដែលមានបំណងទាញយកផលប្រយោជន៍ផ្នែកហិរញ្ញវត្ថុ នយោបាយ និងបង្កអស្ថិរភាពក្នុងសង្គមជាតិ៕