ពលរដ្ឋឃុំល្វាសរ ស្នើមន្ទីររ៉ែ និងថាមពលខេត្តកណ្ដាល ចុះពិនិត្យសកម្មភាពបូមខ្សាច់របស់ក្រុមហ៊ុនមួយ

(កណ្តាល)៖ ក្រោយរងការរិះគន់ថា អនុវត្តមិនតាមគោលការណ៍ ប្រជាពលរដ្ឋរស់នៅឃុំល្វាសរ ស្រុកល្វាឯម ខេត្តកណ្ដាល បានស្នើសុំដោយក្តីព្រួយបារម្ភទៅកាន់លោក ប៉ុន ប៊ុនធឿន ប្រធានមន្ទីររ៉ែ និងថាមពលខេត្តកណ្ដាល មេត្តាចុះពិនិត្យ និងស្រាវជ្រាវលើសកម្មភាពអាជីវកម្មបូមខ្សាច់របស់ក្រុមហ៊ុន «គ្លូប៊លហ្រ្គីន ខេមបូឌា អេនើជី ឌីវេឡុបមេន» ដែលកំពុងរងការរិះគន់ពីប្រជាពលរដ្ឋថា អនុវត្តមិនស្របតាមគោលការណ៍ និងកិច្ចព្រមព្រៀងដែលធ្លាប់បានដាក់ចេញកាលពីឆ្នាំ២០២៣។ នេះបើតាមប្រភព ដែលបណ្ដាញសារព័ត៌មាន The Mirror News ទទួលបាននៅថ្ងៃទី១២ ខែឧសភា ឆ្នាំ២០២៦។

តាមការលើកឡើងរបស់ប្រជាពលរដ្ឋ កន្លងមកអាជ្ញាធរ និងភាគីពាក់ព័ន្ធធ្លាប់បានឯកភាពថា ការបូមយកខ្សាច់ត្រូវរក្សាគម្លាតយ៉ាងហោចណាស់៣០០ម៉ែត្រពីតំបន់ប្រជាពលរដ្ឋរស់នៅ ឬតំបន់ដែលអាចប៉ះពាល់ដល់ច្រាំងទន្លេ និងសុវត្ថិភាពសាធារណៈ។ ប៉ុន្តែជាក់ស្តែង ប្រជាពលរដ្ឋអះអាងថា ក្រុមហ៊ុនបានធ្វើសកម្មភាពបូមខ្សាច់ក្នុងចម្ងាយត្រឹមប្រមាណ១៥០ ទៅ២០០ម៉ែត្រប៉ុណ្ណោះ ដែលបង្កឲ្យមានការព្រួយបារម្ភពីផលប៉ះពាល់រយៈពេលវែង។

មិនតែប៉ុណ្ណោះ ប្រជាពលរដ្ឋក៏បានលើកឡើងថា មានសកម្មភាពដឹកជញ្ជូន និងបូមខ្សាច់នៅពេលយប់ផងដែរ ដែលធ្វើឲ្យពួកគាត់មានការព្រួយបារម្ភពីសុវត្ថិភាព បរិស្ថាន និងផលប៉ះពាល់ដល់ការរស់នៅប្រចាំថ្ងៃ។

ប្រជាពលរដ្ឋស្នើឲ្យមន្ទីរជំនាញ និងអាជ្ញាធរពាក់ព័ន្ធ ចុះត្រួតពិនិត្យទីតាំងជាក់ស្តែង ដើម្បីធានាថា អាជីវកម្មបូមខ្សាច់អនុវត្តត្រឹមត្រូវតាមច្បាប់ បទដ្ឋានបច្ចេកទេស និងគោលការណ៍ដែលបានឯកភាពជាមួយប្រជាពលរដ្ឋ។

ជាមួយគ្នានេះ ប្រជាពលរដ្ឋក៏សំណូមពរឲ្យក្រុមហ៊ុនធ្វើការបោះពោងសម្គាល់ទីតាំងបូមខ្សាច់ឲ្យបានច្បាស់លាស់ ដើម្បីបង្កើនតម្លាភាព និងជៀសវាងការបង្កផលប៉ះពាល់ដល់ប្រជាពលរដ្ឋ និងអ្នកធ្វើដំណើរតាមផ្លូវទឹក។

ប្រជាពលរដ្ឋសង្ឃឹមថា លោកប្រធានមន្ទីរ និងស្ថាប័នពាក់ព័ន្ធ នឹងយកចិត្តទុកដាក់លើសំណើនេះ ដោយចុះពិនិត្យ និងដោះស្រាយជាបន្ទាន់ ដើម្បីរក្សាតុល្យភាពរវាងការវិនិយោគ និងផលប្រយោជន៍របស់ប្រជាពលរដ្ឋក្នុងមូលដ្ឋាន៕