កណ្ដាប់ដៃដែក លោក ហន ពិសិដ្ឋ អភិបាលស្រុកគងពិសី! បញ្ជាឱ្យផ្អាកសំណង់អត់ច្បាប់ភ្លាមៗ ក្រោយទទួលព័ត៌មានពីប្រជាពលរដ្

(កំពង់ស្ពឺ)៖ បង្ហាញពីការយកចិត្តទុកដាក់ខ្ពស់ចំពោះសណ្ដាប់ធ្នាប់សាធារណៈ និងការទប់ស្កាត់ភាពអាណាធិបតេយ្យក្នុងមូលដ្ឋាន លោក ហន ពិសិដ្ឋ អភិបាលស្រុកគងពិសី បានបញ្ជាឱ្យមន្ត្រីជំនាញចុះពិនិត្យ និងផ្អាកការសាងសង់សំណង់អត់ច្បាប់មួយកន្លែងភ្លាមៗ បន្ទាប់ពីទទួលបានព័ត៌មានថា មានសំណង់កំពុងសាងសង់ដោយមិនទាន់មានច្បាប់អនុញ្ញាតត្រឹមត្រូវ។

ប្រតិបត្តិការចុះពិនិត្យនេះ បានធ្វើឡើងនៅថ្ងៃទី១១ ខែឧសភា ឆ្នាំ២០២៦ ស្ថិតនៅចំណុចជាប់ផ្លូវបេតុងចូលវត្តចំប៉ាចារ៍ ភូមិស្វាយទាប ឃុំអង្គពពេល ស្រុកគងពិសី ខេត្តកំពង់ស្ពឺ ដែលមានម្ចាស់សំណង់ឈ្មោះ ស្ពឺ ចាន់ឌី។

ក្នុងការចុះអនុវត្តការងារនេះ មានការចូលរួមពីលោក យិន នឿន មន្ត្រីភូមិបាលស្រុក លោក ហាស់ រ៉េម មេភូមិស្វាយទាប រួមទាំងភាគីពាក់ព័ន្ធផ្សេងទៀត ដោយបានធ្វើការណែនាំ និងហាមឃាត់ការសាងសង់ជាបណ្ដោះអាសន្ន រង់ចាំការស្នើសុំច្បាប់ស្របតាមនីតិវិធីជាមុនសិន។

មន្ត្រីជំនាញបានបញ្ជាក់ថា សំណង់ខាងលើជាប្រភេទ «ពាក់កណ្ដាលភូមិគ្រឹះ» ដែលហួសពីដែនសមត្ថកិច្ចរបស់រដ្ឋបាលស្រុក ហើយតម្រូវឱ្យម្ចាស់សំណង់ទៅសុំច្បាប់អនុញ្ញាតនៅថ្នាក់ខេត្តជាមុនសិន ទើបអាចបន្តការសាងសង់បាន។

ក្រៅពីការផ្អាកសំណង់ មន្ត្រីជំនាញក៏បានណែនាំឱ្យម្ចាស់សំណង់ រៀបចំទុកដាក់សម្ភារៈសំណង់ដូចជា ខ្សាច់ ថ្ម ឥដ្ឋ និងសម្ភារៈផ្សេងៗ ឱ្យមានរបៀបរៀបរយ ជៀសវាងរំខានដល់ការធ្វើដំណើររបស់ប្រជាពលរដ្ឋ និងត្រូវយកចិត្តទុកដាក់ខ្ពស់លើសុវត្ថិភាពការដ្ឋាន។

ចំណាត់ការដ៏រហ័ស និងម៉ឺងម៉ាត់របស់លោក ហន ពិសិដ្ឋ ត្រូវបានមហាជនមើលឃើញថា ជាការអនុវត្តតួនាទីដោយទំនួលខុសត្រូវ និងមិនបណ្ដោយឱ្យមានការសាងសង់អនាធិបតេយ្យកើតឡើងដោយគ្មានការត្រួតពិនិត្យនោះឡើយ។

ប្រជាពលរដ្ឋជាច្រើនបានសម្ដែងការកោតសរសើរ ចំពោះការចុះអន្តរាគមន៍ទាន់ពេលវេលា និងការពារផលប្រយោជន៍សាធារណៈក្នុងមូលដ្ឋាន៕