សំណង់អត់ច្បាប់ក្បែរសួនសត្វភ្នំតាម៉ៅ រីកដុះដាលគ្មានញញើតច្បាប់! ពលរដ្ឋរិះគន់ថា បើអាជ្ញាធរមិនទប់ស្កាត់ អាចក្លាយជាគំរូអាក្រក់ក្នុងសង្គម

(តាកែវ)៖ សំណង់ឥដ្ឋរឹងមាំជាច្រើនល្វែង កំពុងសាងសង់យ៉ាងសកម្មនៅតាមបណ្ដោយផ្លូវចូលតំបន់ទេសចរណ៍សួនសត្វភ្នំតាម៉ៅ ស្ថិតក្នុងភូមិកណ្ដឹងធំ ឃុំកណ្ដឹង ស្រុកបាទី ខេត្តតាកែវ ខណៈអាជ្ញាធរឃុំបានទទួលស្គាល់ថា សំណង់ទាំងនោះ «មិនទាន់មានច្បាប់អនុញ្ញាតសាងសង់នៅឡើយ»។ ករណីនេះ កំពុងបង្កឲ្យមានការរិះគន់យ៉ាងខ្លាំងពីសំណាក់ប្រជាពលរដ្ឋ ដែលចាត់ទុកថា ជាការបណ្ដោយឲ្យមានអនាធិបតេយ្យក្នុងវិស័យសំណង់។

ប្រជាពលរដ្ឋនៅមូលដ្ឋានបានលើកឡើងថា បើសំណង់ធំៗអាចសាងសង់ដោយគ្មានច្បាប់បានយ៉ាងរលូន នោះវាមិនត្រឹមតែបង្ហាញពីភាពខ្សោយក្នុងការអនុវត្តច្បាប់ប៉ុណ្ណោះទេ ប៉ុន្តែថែមទាំងអាចជំរុញឲ្យអ្នកដទៃហ៊ានធ្វើតាម ដោយមិនខ្វល់ពីនីតិវិធី និងបទប្បញ្ញត្តិរដ្ឋទៀតផង។ ពួកគេបារម្ភថា បើគ្មានការទប់ស្កាត់ឲ្យបានទាន់ពេល ស្រុកបាទីអាចប្រឈមការរីកដុះដាលនៃសំណង់គ្មានស្តង់ដារ ដែលបង្កហានិភ័យដល់សណ្ដាប់ធ្នាប់ និងសុវត្ថិភាពសាធារណៈនៅថ្ងៃអនាគត។

ការលើកឡើងនេះ មិនមែនគ្មានមូលដ្ឋាននោះទេ ខណៈលោកស្រីមេឃុំកណ្ដឹង បានបញ្ជាក់ច្បាស់ថា សំណង់ខាងលើ ពិតជាមិនទាន់មានច្បាប់ត្រឹមត្រូវនៅឡើយ។ ទោះបីជាបែបនេះក្ដី សកម្មភាពសាងសង់នៅតែបន្តដោយមិនទាន់ឃើញមានវិធានការទប់ស្កាត់ភ្លាមៗពីស្ថាប័នជំនាញ ឬអាជ្ញាធរពាក់ព័ន្ធនោះឡើយ។

ជុំវិញបញ្ហានេះ លោក សាយ វណ្ណៈ អភិបាលស្រុកបាទី ដែលទើបទទួលការតែងតាំងថ្មី បានបង្ហាញជំហរតឹងរ៉ឹងថា អាជ្ញាធរមិនអាចអនុញ្ញាតឲ្យការសាងសង់ខុសច្បាប់បន្តដោយគ្មានវិធានការនោះទេ។ លោកបានបញ្ជាក់នៅរសៀលថ្ងៃទី១១ ខែឧសភា ឆ្នាំ២០២៦ថា នៅថ្ងៃទី១២ ខែឧសភា ស្អែកនេះ លោកនឹងចាត់បញ្ជូនអភិបាលរងស្រុក និងមន្ត្រីជំនាញចុះពិនិត្យទីតាំងជាក់ស្ដែង ហើយប្រសិនបើរកឃើញថា មិនមានច្បាប់អនុញ្ញាតសាងសង់ត្រឹមត្រូវ អាជ្ញាធរនឹងចុះផ្អាកសំណង់ជាបណ្ដោះអាសន្ន រង់ចាំឲ្យម្ចាស់សំណង់បំពេញនីតិវិធីស្របច្បាប់ជាមុនសិន។

ទន្ទឹមនឹងនេះ មហាជនកំពុងរង់ចាំមើលថា តើការប្ដេជ្ញាចិត្តរបស់អភិបាលស្រុកថ្មី អាចអនុវត្តបានជាក់ស្ដែងដែរឬទេ ខណៈសំណង់ជាច្រើននៅក្នុងមូលដ្ឋានស្រុកបាទី ត្រូវបានគេសង្កេតឃើញថា កំពុងរីកដុះដាលដោយមិនសូវមានការត្រួតពិនិត្យឲ្យបានម៉ឺងម៉ាត់។

អ្នកតាមដានសង្គមបានលើកឡើងថា ការអភិវឌ្ឍមិនគួរធ្វើឡើងដោយរំលងច្បាប់នោះទេ ព្រោះច្បាប់ត្រូវបានបង្កើតឡើងដើម្បីធានាសុវត្ថិភាព សោភ័ណភាព និងសណ្ដាប់ធ្នាប់សាធារណៈ។ ប្រសិនបើអាជ្ញាធរមូលដ្ឋានមិនពង្រឹងការអនុវត្តច្បាប់ឲ្យបានតឹងរ៉ឹងទេ នោះសំណង់អនាធិបតេយ្យអាចនឹងក្លាយជាបញ្ហារ៉ាំរ៉ៃ និងបង្កផលប៉ះពាល់ធ្ងន់ធ្ងរនៅថ្ងៃខាងមុខ៕