ឧបនាយករដ្ឋមន្ត្រី ស សុខា និងលោកជំទាវ អញ្ជើញជាអធិបតីពិធី “រាត្រីសមោសរ ដើម្បីការងារសង្គមខេត្តព្រៃវែង” បង្ហាញស្មារតីចែករំលែក និងសាមគ្គីភាពសង្គម

(ភ្នំពេញ)៖ ឯកឧត្តម ឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ រួមជាមួយភរិយា បានអញ្ជើញចូលរួមជាអធិបតីក្នុងពិធី “រាត្រីសមោសរ ដើម្បីការងារសង្គមខេត្តព្រៃវែង” ដែលរៀបចំឡើងនៅដឹព្រេមៀសេនធ័រសែនសុខ ស្ថិតក្នុងខណ្ឌសែនសុខ រាជធានីភ្នំពេញ នាយប់ថ្ងៃទី១០ ខែឧសភា ឆ្នាំ២០២៦ ក្រោមបរិយាកាសអធិកអធម និងពោរពេញដោយស្មារតីសប្បុរសធម៌។

ក្នុងឱកាសនោះ ឯកឧត្តម ស សុខា ក្នុងនាមក្រុមការងាររាជរដ្ឋាភិបាលចុះមូលដ្ឋានខេត្តព្រៃវែង បានសម្ដែងការកោតសរសើរ និងវាយតម្លៃខ្ពស់ចំពោះថ្នាក់ដឹកនាំ និងសមាជិកគណៈកម្មការរៀបចំពិធីទាំងអស់ ដែលបានលះបង់កម្លាំងកាយចិត្ត ពេលវេលា និងប្រាជ្ញាស្មារតី ក្នុងការចាត់ចែងរៀបចំព្រឹត្តិការណ៍នេះឱ្យប្រព្រឹត្តទៅដោយរលូន និងទទួលបានជោគជ័យតាមការរំពឹងទុក។

ជាមួយគ្នានេះ ឯកឧត្តម ក៏បានថ្លែងអំណរគុណយ៉ាងជ្រាលជ្រៅចំពោះសប្បុរសជនទាំងក្នុង និងក្រៅប្រទេស ដែលបានចូលរួមឧបត្ថម្ភថវិកា និងសម្ភារៈផ្ទាល់ខ្លួន ដើម្បីគាំទ្រកិច្ចការសង្គមក្នុងខេត្តព្រៃវែង។ ឯកឧត្តមបានលើកឡើងថា កាយវិការដ៏សប្បុរសនេះ គឺជាការបង្ហាញឱ្យឃើញពីឆន្ទៈ និងការទទួលខុសត្រូវខ្ពស់ចំពោះសង្គមជាតិ ពិសេសការរួមចំណែកលើកកម្ពស់សុខុមាលភាពប្រជាពលរដ្ឋនៅមូលដ្ឋាន។

ឯកឧត្តម ស សុខា បានបញ្ជាក់ថា ការចូលរួមរបស់សប្បុរសជន គឺជាការឆ្លុះបញ្ចាំងពីស្មារតីសាមគ្គីភាព និងវប្បធម៌ចែករំលែក ដែលជាមូលដ្ឋានគ្រឹះដ៏សំខាន់សម្រាប់ការកសាងសង្គមមួយប្រកបដោយភាពរឹងមាំ សុខដុមរមនា និងស្ថិតក្រោមដំបូលសន្តិភាព។ ជំនួយទាំងនេះ បានជួយឱ្យរដ្ឋបាលខេត្តព្រៃវែង មានលទ្ធភាពក្នុងការបំពេញសកម្មភាពមនុស្សធម៌ និងជួយសង្គ្រោះប្រជាពលរដ្ឋរងគ្រោះដោយគ្រោះមហន្តរាយ និងឧបទ្ទវហេតុផ្សេងៗ បានទាន់ពេលវេលា ប្រកបដោយប្រសិទ្ធភាព និងតម្លាភាព។

ក្នុងឱកាសដ៏មានអត្ថន័យនេះ ឯកឧត្តម និងភរិយា ក៏បានបួងសួងដល់គុណបុណ្យព្រះរតនត្រ័យ និងវត្ថុស័ក្តិសិទ្ធិទាំងឡាយ សូមតាមថែរក្សា និងប្រទានពរ ជ័យមង្គល សុខភាពល្អ និងភាពចម្រុងចម្រើន ជូនដល់ថ្នាក់ដឹកនាំ សប្បុរសជន និងក្រុមគ្រួសារទាំងអស់ ឱ្យជួបតែសេចក្ដីសុខ និងជោគជ័យគ្រប់ភារកិច្ច៕